2 KADIMITHU 15 - Kemethajüh (N) (Re-editing) Bible (BSI)

Judah Kadimi Uzziya

¹ Israel Kadimi Jeroboam 11 na kadikesa mapi ngwe nu tagüwa wi Amaziya tsa Uzziya na Judah Kadimi saya,

² ma kahang mapi tagha nu tugho wi, nu ma amapi deni nu keni Jerusalem wi kekhang sen. Ma jja na Jerusalem wina kegho Jakolia.

³ Ma ba na tsütsonca sa kechi tsü nie nu ma Apvüwa kenenwa tsü sa.

⁴ Isala Anyiza nkechüthu kekinyipenthu tsü meyasa, nu anyithu na ciwi ahhansha sa nu hankedemvu mecang pi kinyi.

⁵ Apvüwa na agükedsakenaa kesü pi Uzziya miwi chi nu tsüna kahang chu ma miwi ben. Ma makepa sala ajjen kesü wi hang nu kekuli nsa, ma tsa Jotham na diyyiwa maben noncca.

⁶ Uzziya kekuli cükithu na Judah kadimithu cükikezhü wi zhü theng.

⁷ Uzziya na shü nu pi David Nyunutiwa wi kadi shüjjenthu wi vhüa, nu ma tsa Jotham na ma shiwa sa kadimi saya.

Israel Kadimi Zekhariya

⁸ Judah Kadimi Uzziya na kadi kesa mapi changha nu tazenwa wi Jeroboam 11 tsa Zekhariya na Israel Kadimi saya, nu ma Samaria wi asha tugho kekhang sen.

⁹ Ma ma tuwi kadimi kesathu ti ma sami pi Apvüwa shun. Ma Nebat tsa Kadimi Jeroboam na Israel ssi wa kesami wi chi kesawa gheshighena tsütsonca tsü nie wa.

¹⁰ Jabesh tsa Shallum na Kadimi Zekhariya shun shagha nu Ibleam wi ma pathia, nu ma shiwa sa kadimi saya.

¹¹ Zekhariya kekuli cüki tsüdila Israel kadimithu cükikezhü wi zhü theng.

¹² Tsalina Apvüwa na Kadimi Jehu wi khishi ketheng tsü sacen: “Nshicübvüghathu na abvüye mejü kecu wi Israel kadimithu sa ben.”

Israel Kadimi Shallum

¹³ Judah Kadimi Uzziya na kadi kesa mapi changha nu tuguwa wi Jabesh tsa Shallum na Israel Kadimi saya, nu ma Samaria wi asha kesü kekhang sen.

¹⁴ Gadi tsa Menahem na Tirzah wina Samaria wi wa Shallum pathia, nu ma shiwa sa kadimi saya.

¹⁵ Shallum kekuli nu ma acho kesa kekuli cükithu saghula pi Israel kadimithu cükikezhü wi zhü theng.

¹⁶ Menahem na Tirzah wi kewalen sala ma Tappuah nyunutiwa ciwi kahangthu, nu makevü ayyi yasatha sa, kepaghenanye anyunutiwa na ma kwen wi du nsa mvu. Ma nza atsa-npvü ketenthu pvü lela tsüdi hanqhea.

Israel Kadimi Menahem

¹⁷ Judah Kadimi Uzziya na kadikesa mapi changha nu tuguwa wi Gadi tsa Menahem na Israel Kadimi saya, nu ma Samaria wi amapi tagha kekhang sen.

¹⁸ Ma Nebat tsa Kadimi Jeroboam na Israel ssi wa kesami wi chi kesawa gheshighena tsütsonca tsü nie wa ma kahang chu sami pi Apvüwa shun wala ma keshü tsathang chu.

¹⁹ Assiriya Kadimi Tiglath Pileser na Israel nkagho, nu Menahem na ma kekiqa sen nu diyyiwa miwi kekhang senyale kesalina rükatssü kilogram hazar changha nu mejü pi ma cüa.

²⁰ Menahem na Israel wi kebanthu meten pi kesüsü rükatssü deni khuchi thsü nu apisa tsü muya. Tsalina Tiglath Pileser na ma diyyiwa wi wha neng.

²¹ Menahem na kekuli cükithu tsüdi Israel kadimithu cükikezhü wi zhü theng.

²² Ma shü nu pi vhüa, nu ma tsa Pekahia na ma shiwa sa kadimi saya.

Israel Kadimi Pekahia

²³ Judah Kadimi Uzziya na kadikesa mapi deniwa wi Mehahem tsa Pekahia na Israel Kadimi saya, nu ma Samaria wi amapi keni kekhang sen.

²⁴ Ma Nebat tsa Kadimi Jeroboam na Israel ssi wa kesami wi chi kesawa gheshighena tsütsonca tsü nie nu sami pi Apvüwa shun.

²⁵ Pekahia süpahithu wi kedi kesü Remalia tsa Peka na acho sa nu Gilead wina kegho anyi deni ssi wa Samaria khweti non wi kadijjen non wina Pekahia pathia, nu ma shiwa sa kadimi saya.

²⁶ Pekahia kekuli cükithu tsüdi pi Israel kadimithu cükikezhü wi zhü theng.

²⁷ Judah Kadimi Uzziya na kadikesa mapi deni nu keni wi Remalia tsa Peka na Israel Kadimi saya, nu ma Samaria wi amapi ngwe kekhang sen.

²⁸ Ma Nebat tsa Kadimi Jeroboam na Israel ssi wa kesami wi chi kesawa gheshighena tsütsonca tsü nie nu sami pi Apvüwa shun.

²⁹ Peka na kadimi sa keben tsüwi Assiriya Kadimi Tiglath Pileser na anyunuti hathu — Ijon, Abel Beth Maaka, Janoa, Kedesh, Hazor, nu Gilead yyithu, Galilee, nu Naftali nkaya, nu anyithu ghan pi atssüzüthu sala Assiriya wi wa.

³⁰ Uzziya tsa Jotham na Judah kadimi saya nu kadikesa mapi ngwewa wi Elath tsa Hoshea na acho sapi Kadimi Peka shun nu ma pathia, nu ma shiwa sa kadimi saya.

³¹ Peka kekuli cükithu na Israel kadimithu cükikezhü wi zhü theng.

Judah Kadimi Jotham

³² Remalia tsa Peka na Israel Kadimi saya nu kadikesa mapi keniwa wi Uzziya tsa Jotham na Judah Kadimi saya,

³³ ma kahang mapi ngwe nu manga wi, nu ma Jerusalem wi amapi tagha nu tugho kekhang sen. Ma jja na Zadok nga Jerusha.

³⁴ Ma ba Uzziya tsütsonca nie nu Jotham na Apvüwa kenenwa tsü sa.

³⁵ Isala Anyiza nkechüthu kekinyipenthu tsü meyasa nu anyithu na ciwi ahhanshathu sa nu hankedemvu mecang pi kinyi. Jotham na Kekinyijjen wi Aghawa Kaghapeng-jenka tsü sa.

³⁶ Jotham kekuli cükithu na Judah kadimithu cükikezhü wi zhü theng.

³⁷ Ma kadimi sa keben tsüwi Apvüwa na atuwa sa Siriya Kadimi Rezin, nu Israel Kadimi Peka kesun pi Judah ssisa thsüa.

³⁸ Jotham na shü nu pi David Nyunutiwa wi kadi shüjjenthu wi vhüa, nu ma tsa Ahaz na ma shiwa sa kadimi saya.