2 KADIMITHU 14 - Kemethajüh (N) (Re-editing) Bible (BSI)

Judah Kadimi Amaziya

¹ Israel Kadimi Jehoahaz tsa Jehoash na kadikesa mapi keniwa wi Joash tsa Amaziya na Judah Kadimi saya,

² ma kahang mapi ngwe nu manga wi, nu ma Jerusalem wi amapi ngwe nu tugu kekhang sen. Ma jja na Jerusalem wina kegho Jehoaddin.

³ Ma Apvüwa kenenwa tsü sa, isala ma ma baqhai David ti sa meya; ma ma ba Joash na kekulithu tsü sa.

⁴ Ma Anyiza nkechüthu kekinyipenthu tsü meyasa, nu anyithu na ciwi ahhansha nu hankedemvu pi mecang.

⁵ Amaziya na ma kekhang sen pi zükeqhe saya meyi, ma ba kadimiwa pathi kesathu kedithu tsü pathia.

⁶ Isala ma mathu tsangathu npathi, isani Apvüwa na Mosa Yenwa wi mangwa le khitheng khe tsü nie: “Atsangathu kesami ghena mathu bajjathu pi nshü thsüla, nu abajjathu kesami ghena mathu tsangathu pi nshü thsüla; anyi kesü ma ketanla ma kesami kesa ghena ketan ma pi shü thsü ben.”

⁷ Amaziya na Amcü Yyiketijü wi Edom nyi süpahithu hazar tagha pathia; ma aghi wi Sela nyunutiwa tsü nkaya nu tsüpi Joktheel ci nu tsüna khilila ben.

⁸ Tsaseng wi Amaziya na nyilothu kesun pi Israel Kadimi Jehoash na gho ma ssisalo nnichi.

⁹ Isala Kadimi Jehoash na hati khinengchia: “Kuti tsüwi Lebanon Yikhathu miwi aghazüton kesü na ketsijüh kesü kesun pi sedar chan kesü wi, ‘N-nga pi itsawa wubvü saya thsülo’ khi. Aghangsa kesü na ciwi pvüdhi wa keten aghazüton tsü cücha.

¹⁰ Amaziya, no khili Edom nyithu chaya, nu no awisa ben. Njjen wi n-nyankemechan ghena n-nonkwenthi benyalo. Mangkesa na no nu n-nyithu ghena kededi sengholo agükeccüwa tsü pfüsi benten nu?”

¹¹ Isala Amaziya na nkinala hhaghe, tsalina Kadimi Jehoash na ma nyithu ssishhu Judah yyiwi Beth Shemesh wi ma shunla ssisa.

¹² Amaziya süpahizi na nyu nchala, nu ma süpahi tsüdi bvü zighe sen nu mathu jjen wi whashan.

¹³ Jehoash na Amaziya ghan pi atssüzü sa sen nu Jerusalem wi gho anyunutiwa khweti tsü Efraim Kaghapeng- jenka na wala Accügwen Kaghapeng-jenka kecu majü meter kecheng-u tsü pasha.

¹⁴ Ma rükatssü nu suna mukeya tsüdi, Kekinyijjen wi atsanqaithu nu kadijjen wi keben tsüdi khuya nu tsüthu pvü nu Samaria wi wa neng. Ma anyithu la pahan ghan sen nu ma gweghe wa.

¹⁵ Jehoash kekuli nu ma kempvüza sala Judah Kadimi Amaziya shunla aghikesa cükithu na Israel Kadimithu cükikezhü wi zhü theng.

¹⁶ Jehoash na shü nu pi Samaria wi kadi shüjjenthu wi vhüa, nu ma tsa Jeroboam 11 na ma shiwa sa kadimi saya.

Judah Kadimi Amaziya Keshü

¹⁷ Judah Kadimi Amaziya na Israel Kadimi Jehoash keshü seng wi amapi taghamanga hang.

¹⁸ Amaziya kekuli cükithu na Judah kadimithu cükikezhü wi zhü theng.

¹⁹ Jerusalem wi acho kesü sa nu Amaziya pathia le sa, tsalina ma bvüsen Lakhish nyunutiwa wi wa, isala ma ghinyithu na ma nie wa ciwi ma pathia.

²⁰ Goru kesü miwi na ma kamang tsü pvü neng ghola Jerusalem, David Nyunutiwa, witsü kadi shüjjenthu wi vhüa.

²¹ Tsaseng wi Judah nyithu na kadiliwen pi ma tsa Uzziya ma kahang amapi tagha nu tughowa tsü pvü thsü nu ma pi kadimiwa sa thsüa.

²² Uzziya na ma ba keshü seng wi Elath tsü nka nengya nu tsü sanengya.

Israel Kadimi Jeroboam 11

²³ Judah Kadimi Joash tsa Amaziya na kadikesa mapi taghamangawa mapi wi Jehoash tsa Jeroboam na Israel Kadimi saya, nu ma Samaria wi amapi jügha nu kesü kekhang sen.

²⁴ Ma ma tuwi kadimi kesawa Nebat tsa Kadimi Jeroboam na Israel ssi wa kesami wi chi kesa gheshighena tsütsonca tsü nie nu sami pi Apvüwa shun.

²⁵ Ma kheni Israel ji kesa ayyi aghawa Hamath Pass na wala acülawa Keshü Tssükedone kecu tsüdila nka nengya. Hawa hana Apvüwa, Israel Nyizawa na Gath Hefer wina keghowa Amittai tsa ma maghawa Jonah wina khishi kethengwa tsüle.

²⁶ Apvüwa na Israel nyithu na qhethiketen ketizenkesa keben tsü mu; ciwi mathu kiqa keya kesüla nmi.

²⁷ Isala anuphanla Israel yasatha sale kesa tsüna Apvüwa kemeshen nye. Tsalina ma Kadimi Jeroboam 11 wina mathu kekashaya.

²⁸ Jeroboam 11 kekuli, ma aghi wi kempvüza kesa, nu ma khatinu Damaska nu Hamath ya neng pi Israel cü khe tsü cükithu tsüdila Israel kadimithu cükikezhü wi zhü theng.

²⁹ Jeroboam na shü nu pi kadi shüjjenthu wi vhüa, nu ma tsa Zekhariya na ma shiwa sa kadimi saya.