2 KADIMITHU 11 - Kemethajüh (N) (Re-editing) Bible (BSI)

Judah Kadimi Athaliya

¹ Kadimi Ahaziya jja Athaliya na nyu ma tsa kepathi cüki tsü zaya meyi, ma kadi theghi tsüdila pathilo kesa ahza khuchia.

² Ahaziya tsa Joash ketan bvüya. Ma la pi kepa wi gweghe pathia keten, isala ma nyie Jehosheba, Ahaziya tssüggüwa, Kadimi Joram nga na ma kekashaya. Nzawa na ma nu ma kenonccawa ssi wa Kekinyijjen wi kejenben wi Athaliya kuthia, tsalina ma pathi meyala.

³ Athaliya na amapi tugho kadijja sala kekhangsen keben chu Jehosheba na ghanyiwa pi Kekinyijjen wi kuthi nu ma noncca.

⁴ Isala tagüwa mapi wi keqhaikediwa Jehoiada na kadimi ghikehie nu kadijjen ghikehiethu kenoncca kedithu cipi Kekinyijjen wi chi nu mathu ya ma sale kiden keben tsü sa benle kesa kishen thsüa. Ma Kadimi Ahaziya tsa Joash pi mathu ccüca

⁵ nu ahza hathu pi mathu kecükegwe chia: “Nthu na Sabbath tsathang wi kekuli sa kegho wi nthu gishü kecheng wi kesü na kadijjen hie;

⁶ kepa wi gishü kecheng wi kesü na Sur kaghapeng-jenka tsü hie, nyu kepa wi gishü kecheng wi kesü na aghikehie kepathu seng wi kaghapeng-jenka wi tsü nganlo.

⁷ Akhang keni na Sabbath tsathang wi kekuli nkesa wi Kekinyijjen wi ngan nu kadimiwa khweben.

⁸ Nthu na njünnu hanshi sen nu Kadimiwa Joash na khiewa wa khe ma hie lo. Kesü le kesü lela thowa na nthu kete wi gho khe tsü pathiaben.”

⁹ Kedithu na Jehoiada kecükegwethu tsü yaya nu mathu nyithu Sabbath tsathang wi kekuli sa nkewathu nu sa wa ketenthu la ssinu ma wi gho.

¹⁰ Ma Kadimi David ji apiethu nu atsonhithu pi Kekinyijjen wi ketheng tsüpi kedithu cüa,

¹¹ nu ma anyithu pi njünnu hanshi sen nu Kekinyijjen tuuwa tsüdila vüla kadimiwa khwe thsü.

¹² Tsaseng wi Jehoiada na Joash ssishhu, kadiliwen pi ma pvü thsüa, nu kadi kekhang kesen yenthu pi ma cüa. Tsaseng wi adeli pi Joash nyen nu ma kadimiwa sadhale pi thangchia. Anyithu na mathu kwencen nu jisha. “Kadimiwa ya kesie kahangwa salo!”

¹³ Kadijja Athaliya na aghikehie nu anyithu hhai tsü zaya, tsalina ma kaghajila anyitenti saghu keben Kekinyijjen witsü wa.

¹⁴ Ciwi ma kadimi ketheüwa na pi ayen sa keten ti Kekinyijjen kedulen wi maketon kete wi ngan keben muya. Kedithu nu tutuwa kekhouthu, nu anyithu na tsüdila ma vü nu anonkeghe sala tutuwathu khouben. Athaliya na ma hathakina wina ma thsümeni mezüqhe nu jisha, “Nyu kematsa! Kematsa le!”

¹⁵ Jehoiada na Kekinyijjen kevü wi Athaliya npathi mvu, tsalina ma süpahizi kedithu wi kiza, “Nzawa tsü zan sen nu aghikehiethu jüwi na shhugholo, nu thowa na ma kekashale sa khe tsü pathilo.”

¹⁶ Mathu na ma zanya nu ma ssi wa kadijjen wi Goru Kaghapeng-jenka wi ma pathia.

Jehoiada na Kesapfüthu

¹⁷ Keqhaikediwa Jehoiada na Kadimi Joash nu anyithu yala mathu na Apvüwa nyithu sa benle kesa Apvüwa ssinu cenkethenjüh kesü sa thsüa; ma Kadimiwa nu anyithu jüwi la cenkethenjüh kesü sa thsüa.

¹⁸ Tsaseng wi anyithu na Baal kekinyijjen wi wa tsü pasha; mathu na kekinyipenthu nu atsikezhüthu pacha, nu kekinyipenthu tuwi na Baal keqhaikediwa Mattan tsü pathia. Jehoiada na aghikehiethu pi Kekinyijjen wi ben thsüa,

¹⁹ nu tsaseng wi ma, kedithu kadi ghikehie, nu kadijjen ghikehiethu nu anyithu na mathu niela Kekinyijjen wina kadimiwa ssisen wa kadijjen wi chia. Joash na Aghikehie Jenkawa wina dula ma kadipen wi benya.

²⁰ Anyithu tsüdila anonkeghe sa, nu anyutiwa na ceen sadha, khili tsüwi kadijjen wi Athaliya pathidha.

²¹ Joash na ma kahang mapi tagü wi Judah Kadimiwa saya.