2 KADIMITHU 10 - Kemethajüh (N) (Re-editing) Bible (BSI)

Ahab Shicübvüghathu Kepathi

¹ Samaria nyunutiwa wi Ahab shicübvüghathu achentagü na hangben. Jehu na lesü zhü pi anyunutiwa wi kekhang kesenthu, paghangthu, nu Ahab shicübvügha kenonccathu wi kesunchi. Lesükezhü tsüna hati:

² “Nthu na kadimi shicübvüghathu wi alikesathu, nthu na gorugarithu, goruthu, aghighethu, nu khweti ketheng nyunutithu pi nthu kemeshen saya kemehai ben. Tsalina nthu na lesükezhü ha muya meyi,

³ nthu na kadimiwa shicübvüghathu jawi kemehai ntsawa kessiya nu ma pi kadimiwa sa thsü, nu nthu pvüwa ghena aghisa thsülo.”

⁴ Samaria wi kekhang kesenthu na qhethiketen nu khi, “Kadimi Joram nu Kadimi Ahaziya manyi na Jehu matang nu shun meya lethu, ikhang khatinu ma shunya mehai nu?”

⁵ Tsalina kadijjen wi kediwa, anyunutiwa wi kekhang kesenwa, pi paghangthu nu alikesathu gweghe ketsijüh ha kesun pi Jehu wi chi: “Ikhang na nmaghathu, nu ikhang na no mangwa salo khi khe tsüdila sa ben. Isala ikhang thola pi kadimiwa sa thsü nbenle; ntuwi mangwa mehai ntsawa khe tsü sayalo.”

⁶ Jehu na lesü kepa wi la zhü pi mathu cü: “Keujüla nthu na hi wiwa nu hi ahza khukechi tsüdila sa ben lethu, dhitsü wi hathansha wi Ahab shicübvüghathu li we sengho Jezreel wi hi cülo.” Ahab shicübvüghathu achentagü na Samaria wi paghangthu kekhu wi ben, mathu na tsüthu noncca shhugho.

⁷ Khathansha wi Jehu lesükezhü tsü muya khe Samaria wi accülikesathu na Ahab shicübvüghathu achentagü tsüdi pathia, mathu li we pi ashijüthu wi chiya, nu tsüthu pi Jezreel wi Jehu wi kesunchia.

⁸ Khathansha wi nyu na Ahab shicübvüghathu li we senghodha le kesa Jehu kiza khe, ma tsüthu pi anyunutiwa kaghapeng-jenka wi abhon keni sala saghulo nu pi ghanenwa kecu ciwi ben thsülo kesa ahza khuchia.

⁹ Ma ghanenwa wi kaghapeng-jenka wi shhula anyi ciwi kebenthu wi kiza, “Hi acho sapi Kadimi Joram shun nu ma pathile; tsüna nthu khhi nmile. Isala thowa na hathu tsüdi pathi nu?

¹⁰ Ha Apvüwa na Ahab shicübvüghathu cüki khi ketheng tsüdila ntsakhiwa sacendha kesa chütiyadha. Apvüwa na ma tusenjüh-kechüwa Elijah wi mangwa khishi theng khe tsü sadha le!”

¹¹ Tsaseng wi Jehu na Ahab shilithu Jezreel wi hang kebenthu, ma kekhu wi kedithu tsüdi, ma pvüshangthu, nu keqhaikedithu, mathu kesütanla nheila tsüdi pi shü thsüa.

Kadimi Ahaziya Shilithu Kepathi

¹² Jehu na Jezreel teshi nu Samaria wi wa. Alenca wi apen kesü “Anenikehiethu Kemnanpen” kesa wi

¹³ ma shü kesawa Judah Kadimi Ahaziya shilithu pahan metuya nu mathu wi keü, “Nthu na thothu nu?” Mathu na luneng, “Ahaziya shilithu le. Ikhang na Jezreel wi Kadijja Jezebel tsangathu nu kadi theghithu metuchile waden.”

¹⁴ Jehu na ahza pi ma nyithu cü, “Mathu kahang ghanyalo!” Nu mathu na tsüthu kahang ghanya nu ayyiku kesü Betheked kete wi mathu pathia. Ciwi anyi jügha nu keni tsü kesütanla nheila tsüdi pi shü thsüa.

Ahab Shili Kebenthu Tsüdila Pathikesa

¹⁵ Jehu na kheneng wa nu ma alenca wi Rekhab tsa Jonadab metuya. Jehu na ma shalom sa nu khi, “Ishinyi kemeshen makesüle. No hi kiqa la nu?” Jonadab na luneng, “Anlo.” Jehu na khineng, “Isalethu, nkwen pi hi cülo.” Manyi kwen kemisükiliya nu Jehu na ma kiqa pi gorugari wi donya thsüa nu khi,

¹⁶ “No hi gweghe gha nu hi khatila Apvüwa ghena lebenchi khe ghangchilo.” Manyi gweghe goru miwi na Samaria wi wa.

¹⁷ Khathansha wi manyi na wa cuya khe Jehu na Ahab shilithu kesütanla nheila tsüdi pathia. Hawa ha Apvüwa na hati sa benle Elijah wi kiza theng.

Baal Kekinyithu Pathikea

¹⁸ Jehu na Samaria nyithu cighu chi nu khi, “Kadimi Ahab na keu ketan Baal kekuli sa, isala hi ma kekuli ji kayi sa cüden.

¹⁹ Baal tusenjüh-kechüthu, ma kinyi ketenthu, nu ma keqhaikedithu tsüdila cighu chilo. Thola nkegho saya nben; hi ahhansha keti kesü sapi Baal cüden, nu thowa na ciwi ngho khe ma pi shü thsüaben.” (Hawa ha Jehu cho kesü ma Baal kinyi ketenthu tsüdila pathiale kesalina.)

²⁰ Tsaseng wi Jehu na ahza khuchia, “Baal kekinyikü tsathang kesü pi thangchilo.” Tsalina atsathang kesü pi thangchia,

²¹ nu Jehu na ajüh kesun pi Israel yyi maben wi chia. Baal kinyi ketenthu kesüla nkegho nsala mabenla ghoa. Mathu tsüdila Baal kekinyijjen wi dula ma katen kesü na wa pahanwa kecu pongya.

²² Tsaseng wi Jehu na ahza pi kemetha gwomejuwa kaghazuthu tsü kenoncca keqhaikediwa cü nu agwomejuwa senghola kinyi kebenthu tsüdila cü thsüa.

²³ Tsaseng wi Jehu na ma ketanla Rekhab tsa Jonadab gweghe kekinyijjen non wi dula ciwi anyithu kiza, “Baal kekinyithu ketan khe Apvüwa kekinyi kesüla hewi nmile kesa chütiyalo.”

²⁴ Tsaseng wi Jonadab manyi wala ahhansha sa nu mecang pi kekinyi sapi Baal cü. Ma anyi achentazen pi kekinyijjen ameiwa ben thsü nu hati mathu wi kecükegwe chi theng: “Nthu na anyi hathu tsüdila pathiaben; thowa na mathu kesütanla pi bvü thsü khe ma ma kahangli pi tsü dhi ben.”

²⁵ Jehu na kekinyithu sapi cü meyi, ma aghikehie nu kedithu wi khi, “Dula mathu tsüdila pathilo; mathu kesüla nbvü thsüla.” Mathu na njünnu hanshi sen dula mathu tsüdila pathia, nu akamangthu zanshi pi akhemi wi chia. Tsaseng wi mathu na kekinyijjen ndukuwa wi du kekinyipen wi

²⁶ tsikezhüthu tsü sen shhughola mecang.

²⁷ Tsalina mathu na tsikezhüthu nu kekinyijjen tsü yasa, nu kekinyijjen tsüpi kekujjen kesü sa — tsüna nansü kecula ben.

²⁸ Jehu na hatinu Israel wi Baal kinyi ketenthu yasatha sa.

²⁹ Isala ma Kadimi Jeroboam kesami ti Israel ssi wa Bethel nu Dan wi suna pi amesü zza süpon kezhü tsü kinyi nu sami thsüa.

³⁰ Apvüwa na Jehu wi khi, “Hi no ya Ahab shicübvüghathu miwi sa thsü mvu keben tsü no tsüti sadha. Tsalina nshicübvüghathu na abvüye mejü kecu wi Israel kadimithu sa ben.”

³¹ Isala Jehu na ma leben tsüdi pi Apvüwa Israel Nyizawa Yenwa tsü ya meyala; tsüti kesawa nye ma Jeroboam na Israel ssi wa kesami wi kechi tsütsonca tsü nie wa.

Jehu Keshü

³² Tsü tsüwi Apvüwa na Israel yyi tsü sapi zza kayi wa, Siriya Kadimi Hazael na Israel nyi yyi tsüdi nkaya,

³³ Jordan na nishuwa, acülawa na wala Arnon Ghaku miwi Aroer nyutiwa kecu, hana Gilead nu Bashan yyithu wi Gad, Reuben, nu niduwa Manasseh mizzathu na hang keben tsü kesaghu.

³⁴ Jehu kekuli nu ma kempvüza kesa cükithu saghu pi Israel kadimithu cükikezhü wi zhü theng.

³⁵ Ma shü nu pi Samaria wi vhüa, nu ma tsa Jehoahaz na ma shiwa sa kadimi saya.

³⁶ Jehu na Samaria wi amapi ngwe nu tazen Israel kadimi sala kekhang sen.