2 JOHAN 1 - Kemethajüh (N) (Re-editing) Bible (BSI)

¹ Keshenpfüwa wina pi— Nzawa nu ma tsangathu hi atsentsa wina tizen ketenthu kecü. Hi ketan nyela atsentsawa chü nu nthu tizen ketenthu tsüdila,

² kepaghenanye atsentsawa na ithu wi ben nu anuphanla ithu ssi benden.

³ Abawa Anyiza nu Abawa Tsa Jisu Khrista ya nanketizen, ketizen, nu kecca pi ithu kecüwa sa; tsüthu ya atsentsa nu ketizen wi ithu ji sa keyawa salo.

Atsentsa nu Ketizen

⁴ Abawa na ayenkhuchi pi ithu kecü tsüti ntsangathu pahan na atsentsawa wi hang keben mukeya wi hi inonghe ntsawa saben.

⁵ Tsalina hi ketizen Nzawa, hi khili no wi khiben: ithu khokho ketizenli nalo. Hi ha ayenkhukechi ketheü zhü pi nthu cü nben; ayenkhukechi hawa ha ithu aghatsan wina muya kesawa tsü.

⁶ Nu hana ketizen: ithu na ma ayenkhukechi tsü nie nu kahang. Nthu tsüdila aghatsan wina ayenkhukechi za keyawa tsüna nthu tsüdila ketizen wi hanglo.

⁷ Kepaghenanye nyu kemechu nyi kejon na ayyi wi wadha, anyi tsüthu na Jisu Khrista na anyi sajjü ceng ghole khishü nten. Tsüti kesa nyi tsüna nyu kemechuwa nu Khrista ghinyiwa.

⁸ Tsalina nthu kiden-kesha yalo, isanu nthu na ikhang kekuli tsü ya nbhatagha thsüla nthu kutimen tsüdi muya thsüle kesalina.

⁹ Anyi kesü le kesü lela Khrista kesansijüh wi nbenla ma gilli sa wa lethu, Anyiza na ma wi nmi. Thowa na Khrista kesansijüh wi ben khe ma Abawa nu Atsawa la ben.

¹⁰ Tsalina keujüla anyi pahan na kesansijüh ha nsenla nthu wi gho lethu, nthu jjen wi ma ssi meyala, nu “Kecca ya no ssiben ketenwa salo” lela nkhila.

¹¹ Kepaghenanye thowa na ma shalom sa khe ma nkemehai kekuli wi tsü ma gweghe ben.

Ajühsakhen

¹² Hi pala kejon pi nthu kekiza-u na ben, isani hi lesü nu kezhütssü nsen mvu; ithu nonkeghe sa yale kesalina hi gho nthu metu nu keccünengliya ben kesa nondi ben.

¹³ Kessiya kesa Npvünonwa tsangathu la nthu shalom saben.