1 TIMOTHI 6 - Kemethajüh (N) (Re-editing) Bible (BSI)

¹ Nssümaghathu na alentagha wi la mathu pvüthu kinyikü nsathu yishü, isanu thola Anyiza nyan nu ikhang kesansijüh tsü nkemehai nkhi thsüle kesalina.

² Nssümaghathu, mathu pvüthu na Khristanyi sa kebenthu tsü nkinyikü sa yishü, kepaghenanye mathu na acünyuthu. Tsüti kesawa nye, mathu na tsü miwi mehaiki mathu kekuli salo, kepaghenanye mathu kekuli miwi kekiyi muya ketenthu tsüna mathu tizen keten kenondithu. No hathu ha pi khi nu nyu nsansithu yishü.

Milikemesa Kesansi nu Atsentsa Keben

³ Anyi thowa na ma kesansijüh kepa sa nu ithu Pvüwa Jisu Khrista jüh atsentsathu nu ithu keccüna kesansi tsü makesü nsa khe

⁴ tsüna dithang nu mangla nchü. Ma ajühthu ghena kicennali nu kekitagha kenmvu nkemehai ben, nu tsüna anyonghokepvü, ajühkepapa kesa, nyu kimenni, nyu kemeshensa,

⁵ nu anyi mathu kahang wi pala meshenshi meya nu atsentsawa nkemithu tsü ssinu keshüthangla keccücanli kesa sengho den. Mathu na keccüna hana keban sakeya len le meshen den.

⁶ Keujüla anyi kesü na ma kebenwa tsü pi ma leben ghashu saya lethu, keccüna ha ma sa pi ben ntsa saya thsü nten.

⁷ Kepaghenanye ithu na mangla sen nu ayyi ha wi ngho, tsalina ithu na ayyi ha wina mangla sen nu bvüya nben.

⁸ Tsalina keujüla ithu na kedsakejjü nu athsümeni ben lethu, tsüna ithu ghena mehaidha.

⁹ Isala anyi keban sa mvu ketenthu na kemechu wi khuli du, nu kejüphon nu nkemehai kenmvu ca na mathu ghanya nu ssi wa kededi nu keyasa wi chiden.

¹⁰ Kepaghenanye apisa ketepagha tsüna pala tsüdi nkemehai bvüwa. Anyi pahan na apisa tsü benya mvu ntsa kesalina mathu na kenondi wina deja wa leben gükeccü ghena ahathakina kejon muyaden.

Timothi Kecükegwethu

¹¹ Isala Anyiza nyiwa, no hathu ha tsüdila ghü yalo. Ketsatan, Anyiza kemessi, kenondi, ketizen, kethan-kehikeya, nu keccaketssü hathu ha ghang tenlo.

¹² Kenondi ghena aghikemehai sala aghi salo; anuphan kahang tsü khuya, kepaghenanye no chüzathu kejon tu wi na no kenondi khishi kechi wi Anyiza na kahang ha ghena no ciya.

¹³ Kahang pi tsüdila cü ketenwa Anyiza, nu Pontia Pilat tu wi ma kenondi zükeqhe khishi kechiwa Khrista Jisu tu wi na hi no kizaben,

¹⁴ ithu Pvüwa Jisu Khrista kegho tsathang npi kegho chu ajühkhukechiwa tsü nie nu ajühtsentsa sabenlo.

¹⁵ Kemehai nu kekhangwa ma ketan, kadimithu miwi Kadimiwa, apvüthu miwi Apvüwa, Anyiza na matsü wina ma pi gho thsüaben.

¹⁶ Ma ketan shü nketenwa; ma anyi thola ma tetsakiya nketen kewegü wi tsü hangben. Anyi thola ma npi mu; nu thola ma muya nben. Ma ya kinyikü nu anuphanla kekhangwa salo! Amen.

¹⁷ Ajüh ha pi kahang hawi kebanthu wi nkapvüla, nu mathu kaghang pi nmila keten kebenthu miwi nchila; isala pi pala tsüdila mohho ntsa pi ithu nonkeghe sa cü ketenwa Anyiza miwi chiyalo kizalo.

¹⁸ Mathu wi kemehaiwa kuli, kekuli kemehai wi keban sa, mohho ntsa sa nu pala pi nyu gishü senlo kizalo.

¹⁹ Mathu hati nu haseng wi mathu ghena keben tsü mehaitsü kiden pi theng yaben. Isanu mathu kahang wi atsentsawa kahang tsü muyaben.

²⁰ Timothi, mangwa pi no dhenchi theng khe tsü noncca kemehai sayalo. Anyankekinyen nu kejüphon keccücanli jüh pahan na pi “Palakechü” le khi ketenthu tsü ghü yalo.

²¹ Kepaghenanye anyi pahan na mathu ha benle khi, nu tsü ghena kenondi lenwa tsü cüzzidha. Anyiza nanketizen ya nthu tsüdi ssiben ketenwa salo.