1 TIMOTHI 5 - Kemethajüh (N) (Re-editing) Bible (BSI)

Kenondithu tu wi Kekuli

¹ Npvüza keqhai tsü sa nteküla, isala ma pi nba ti sa nu ma wi keshikenenlo. Npvüza kepvünyithu pi ncünyuthu ti,

² nza keqhaithu pi ajjathu ti, nu nza kepvünyithu pi atssüggüthu ti, tsüdila kemetha wina tsüti salo.

³ Denyile ntsakhiwa mathu ketan ben ketenthu tsü kinyikülo.

⁴ Isala keujüla denyile kesü na ma tsangathu nyelela ma tsangawa tsangathu ben lethu, mathu atuwa sala mathu theghi tu wi keccüna kekuli kesa-u keben tsü chüya thsü, hati nu mathu bajja kutimen tsü dhi nengya thsü; kepaghenanye tsüna Anyiza kenen sayaden.

⁵ Denyile kesü thola ma kenoncca nyi nmila ma ketan ben ketenwa na ma kaghang tsüdi pi Anyiza miwi chi nu aghaja ghanan ma wi kekiqa tsü khieki benden.

⁶ Isala denyile thowa na ma sajjü kenen wi hangten khe ma hangben lela shüdha.

⁷ Thola mathu ghü nsa thsüle kesalina kecükegwe hathu pi mathu cülo.

⁸ Isala keujüla anyi kesü ma shilithu, tsü miwi la ma theghithu tsü noncca meyala lethu, tsüna ma kenondi tsü meya mvu nu nkenondi nyi kesü miwi nmehai.

⁹ Denyile kesü ma kahang mapi achentugho miwi nkesa tsü ma pi denyilethu nyan gweghe nzhüla. Tsümiwi, ma kutitan n-nuwa

¹⁰ nu nyu ma kekuli kemehai khi; ma tsanga mehaitsü nonccakeya kinyibvü kesü, ma jjen wi kijünyi thu ssiya mvu keten, Khristanyithu ghena kekuli kemehai sa, agükeccü wi anyithu kiqa, nu kemehai kekuli wi lebenkechi nyi nsathu yishü.

¹¹ Isala denyile cahlithu nyan pi gweghe nzhüla; kepaghenanye mathu n-nuwa mvu lethu, mathu Khrista wina bvü,

¹² nu mathu kheni ma wi ajüh khishi ketheng tsü kepakhhi ghena sazziden.

¹³ Mathu na matsü dedi pi ajjen ajjen kegoe wa; isala tsümiwi nkemehai, mathu nyu ghüsa nu nyu pakivvü, mathu nkekhi-u kekhi yen la chüyaden.

¹⁴ Tsalina hi denyile cahlithu ya n-nuwa thsü, atsangathu muya, mathu jjenku nonccaya thsü mvuben; isanu ithu ghinyithu yala ithu nkemehai kekhi matsü nmu thsüle kesalina.

¹⁵ Kepaghenanye denyilethu pahan na khapeghe bvü nu Satan nie wadha.

¹⁶ Isala keujüla Khristanyi nza kesü na ma theghi wi denyilethu ben lethu, ma tsüthu nonccaya nu pi kemehu likesaghang nsa thsüla, isanu kemehu ya denyile ma ketan ben ketenthu tsü ghangya thsüle kesalina.

¹⁷ Keshenpfüthu accüli sala kekuli kemehai sa ketenthu, tsüdi miwi apiketsü sala nyu sansi nu ajühkhi ketenthu na kinyikü keni tughu muya qo.

¹⁸ Kepaghenanye Ntsawajüh na khiben, “Nthu amesü süpon ssinu asu ghaceng keben wi ma pang nbhenla,” nu “Kekuliwa na ma kutimen muya qo.”

¹⁹ Meshu keni nyelela kecheng na chüza sen nkegho tsü keshenpfüwa kekimenni jüh kekhi tsü nkinala.

²⁰ Anyi kepathu ya messiya thsüle kesalina nyu tu wi na kesami sa ketenthu tsüdi satekü chilo.

²¹ Anyiza, Khrista Jisu nu tangnyilo kemethathu tu wi na hi no kecükegwe hathu ha nie nu kekuli katsüha kesa tsüdi wi la no kenen nyi sa nyelela nankepapa nsa lalo kizaben.

²² Kaghajila nkwen chang pi nyu miwi chi nu Apvüwa kekuli ghena ma satemetha le nsala. No nyu kepa kesami wi tsü nsaghula, no methasi benya.

²³ Atssü ketan njjüla, isala no kesakinaa ghena nu npvü mehaiya thsüle kesalina kisengtssü kezeng zeng senlo.

²⁴ Anyi pahan kesami na muthatha ben, nu mathu kesamithu na mathu tu wi na ajühkekaghaten wi waden; isala anyi pahan kesami tsü nkhe wina muyaden.

²⁵ Tsü makesü kekuli kemehaithu na muthatha ben; nu tsüti muthatha nkebenthu lela kuthiya nben.