1 TIMOTHI 4 - Kemethajüh (N) (Re-editing) Bible (BSI)

Milikemesa Kesansithu

¹ Asakhen tsüwi anyi pahan na kenondi teshiaben le kesa Aghamu na khimechan chiben; mathu na kemechu ghamuthu jühkina nu atsaghangthu kesansijüh tsü nie waben.

² Kesansijüh tsüti kesa tsüna milikemesa nu nyu mechu ketenthu khiben, mathu kemeshen na amighe kisa pi mecangkea ti keshü sadha.

³ Anyi hati kesathu na keshanyi kesa-u nye nu atsse pahan kedsa tsüna sazziben kesa pi nyu sansiben. Isala kenondithu nu atsentsawa chüya kesathu na keseng kekhie kesa seng wi atsse hathu ha dsalo nu Anyiza na sa chidha.

⁴ Kepaghenanye Anyiza na sa kechi tsüdila mehai; nu mangla meyala kesa-u nye, isala pala tsüdila keseng kekhie sa nu keya-u,

⁵ kepaghenanye Anyiza jüh nu kekhie na tsü sa pi Anyiza tu wi keya qo sacüden.

Khrista Jisu Magha Kemehai

⁶ Keujüla no kecükegwe hathu ha pi acünyuthu kiza lethu, no kenondi jüh nu no nieya kesa atsentsawa kesansijüh pi no ketanla no ghanja keten tsüti no Khrista Jisu magha kemehai kesü sayaben.

⁷ Isala Anyiza nkechü, khalacüki ma men nkemithu tsü nkhila. No ketanla nghena Anyiza messikü kahang wi kiden-kesha yalo.

⁸ Asajjü wi kethansi-kethansa kesa tsüna ma men ben, isala aghamulen wi kethansi-kethansa kesa tsüna alentagha wi ma men ben, kepaghenanye tsüna nansü nu gha keten wi ghena la kahang khishichi cüden.

⁹ Hati kekhi ha ntsakhiwa yathaya nu nondi keya-u.

¹⁰ Ikhang na agüccü ntsa nu kuli, kepaghenanye ikhang kaghangwa tsü pi hangkebenwa Anyiza, anyi tsüdi nu tsü miwi nondi kebenthu Hangshawa miwi chiden.

¹¹ Kecükegwe nu kesansijüh hathu pi mathu cülo.

¹² No kepvünyi ghena thola no nmeshensa thsüla, isala njüh kekhi, n-yencüki, no nanketizen, kenondi, nu kemetha wi kenondithu tsütsonca kesü salo.

¹³ Hi npi kegho chu ntsü tsüdi pi Ntsawajüh si nu nyu sansi tenlo.

¹⁴ Atusenjüh-kechüthu na khi nu keshenpfüthu na akwen chang pi nmiwi kechi wi mukeya aghamulen wi kesawegü nmiwi keben tsü pi ma men nkemi nsala.

¹⁵ Tsüdila no mehai kayi kewa tsü muya thsüle kesalina hathu ha kuli nu ntsü tsüdi pi tsüthu wi chilo.

¹⁶ No ketanla nghena nu no kesansi wi tsü kiden-kesha yalo. Hathu ha kuli bentenlo, kepaghenanye no tsüthu saten lethu, no ketanla no nu njüh kizathu hangsha yaben.