1 TIMOTHI 3 - Kemethajüh (N) (Re-editing) Bible (BSI)

Kemehu wi Accülikesathu

¹ Hati kekhi ha ntsakhiwa: Keujüla anyi kesü na kemehu wi accüli sa mvu lethu, ma kekuli kemehai ntsawa tsü nmvu den.

² Kemehu wi accüli kesawa na nyu ma ghü nkesa nyi pi nsathu yishü; ma awubvü kesütan kesa nyi kiden-kesha nyi, kekheneng keya nyi, nu nyu ma meshen pi mehai keten nyi; ma kijünyi ssiya mvu keten nyi, nu nyu sansiya kemehai nyi nsathu yishü;

³ ma adikina nyi nu kedaggü nyi sayishü, isala ccapeyi nu nyu ssi nkitagha nyi; ma apisa ketepagha nyi sayishü;

⁴ ma ma theghi tsü mehaitsü nonccaya nu ma tsangathu lepi alentagha wi ma kinyikü nu ma jühkeya nyi nsathu yishü.

⁵ Kepaghenanye keujüla anyi kesü na ma ketanla ma theghi kenoncca yen nchü lethu ma khati nu Anyiza kemehu nonccaya mehai nu?

⁶ Ma kenondi wi kezügü nyi nsathu yishü, isanu ma atsaghang ti dithang sen wa kemeshensa wi nkhuli du thsüle kesalina.

⁷ Ayela nyithu na ma kinyikü keten nyi pi nsathu yishü, isanu ma anyankekinyen nu atsaghang ca wi nkhuli du thsüle kesalina.

Kemehu wi Kekiqathu

⁸ Tsüti kemehu kekiqathu la ayencüki mehai nu leben tsentsa kesa nyi pi nsathu yishü; mathu adikina nyi nu apisa ghena apvükemene nyi sayishü;

⁹ mathu kemeshen kemetha wi kenondi tsentsawa pi ccüca kechi tsü ghansen nbenthu yishü.

¹⁰ Atuwa sa mathu ghan-nan nu mathu kemeshensa nmi lethu, mathu ya kekuli sa thsü .

¹¹ Mathu wubvüthu la ayencüki mehai, isala nyu ghükesa nyi sayishü; mathu kiden-kesha nu alentagha wi atsentsa nsathu yishü.

¹² Kemehu kekiqa nyi kesü na awubvü kesütan kesa nyi nu ma tsangathu nu ma jjenku nonccaya kemehai nyi nsathu yishü.

¹³ Kepaghenanye kemehu kekiqathu na mathu kekuli kesa wi mathu ghena kemehaiwa melliya nu Khrista Jisu wi mathu kenondi keben cüki tsü kempvüza sa khiya mehai.

Kekuthi Ketiwa

¹⁴ Hi lesü ha zhü pi no cü keben ti wan gho no muyaben kesa nondiben.

¹⁵ Isala keujüla hi gho minuten lethu, lesükezhü ha wi Anyiza jjen, tsüna hangkeben Nyiza kemehujjen, adonbvüwa nu atsentsa gikedegüwa, wi tsü ithu na ayencüki khati nsathu yishü khe no chüyaben.

¹⁶ Thola ithu keccüna ha wi kekuthi di ntsa keben tsü nmile khiya nben: Ma anyi tsi ceng sen nu gho kesa tsü Aghamu na atsentsa pi ccüca nu tangnyilothu ya muya thsü. Ma cüki pi mizzatenti jawi sansi, ayyi nyi maben wi la nondiya, nu ssi sen nu tangwi kia.