1 TIMOTHI 2 - Kemethajüh (N) (Re-editing) Bible (BSI)

Kemehujjen wi Kekinyi

¹ Isalethu, tsüdi tu wi la atuwa sala Anyiza wi kekhie, nyu ghena kekhie, nanketizen kekhie, nu anyi tsüdi ghena keseng kekhie salo kesa hi khiben;

² kadimithu nu kekhang kesenthu tsüdi ghena la, isanu ithu na yazishu nu kecca kahang wi Anyiza messikü nu mehaitsü hangya le kesalina.

³ Hawa ha mehai nu ithu Hangshawa Anyiza kenen saben,

⁴ ma anyi tsüdila hangshaya nu atsentsawa tsü chüya thsü mvuben.

⁵ Kepaghenanye ciwi Anyiza kesütan na ben, nu anyi kesü Khrista Jisu, Anyiza nu anyi jüwi jühkepiwa na ben,

⁶ ma ketanla anyi tsüdi hangsha yale ma kahang khuchia. Ha Anyiza na matsü wina anyi tsüdila hangshaya mvuben kesa chüti keya.

⁷ Tsalina hi ya kenondi nu atsentsawa ketsijüh tsü pi thangchilo kesalina hi pi Judah nyi nkenyethu ghena apostel kesü nu kesansiwa sala kesunchi. Hi milimesa nben; hi atsentsawa khiben.

⁸ Hi kemehu kekinyi tsüdi wi la npvüzathu, mathu kahang pi Anyiza cü kesathu na aleben minu nyelela nkeccücanlila mathu kwen zanki pi kekhie sa thsü mvuben.

⁹ Hi nzathu la mathu thsümeni kesen wi mehaitsü nu mayenwa wi pvü thsü mvuben; tsüna alissen pi kesalu kesa, suna, mejüti, nyelela aghe menkedhu kepvü tsü nye,

¹⁰ isala kekuli kemehai, nza Anyiza messikü ketenthu na tsüti kesa-u.

¹¹ Nzathu yala ccen nu nyu jühkeya wina pala chüya thsülo.

¹² Hi mathu yala nyu sansi nu npvüza miwi kekhang sen thsü nten; mathu ccen nbenthu yishü.

¹³ Kepaghenanye atuwa Adam sachi nu tsaseng wi Eve sachi.

¹⁴ Mechuya kesawa tsüna Adam nye, isala tsüna Eve nu ma Anyiza yenwa tsü pakhhia.

¹⁵ Isala keujüla nza kesü na ma kenondi wi ketizen nu kemetha, nu ayencüki mehai noncca sen ten lethu atsanga kepvügha wina hangshakeya muyaben.