1 THESSALONIKANYI 1 - Kemethajüh (N) (Re-editing) Bible (BSI)

Ajühtuwa

¹ Paul, Sila, Timothi wina pi Thessalonika wi Abawa Anyiza nu Apvüwa Jisu Khrista kemehu nyithu kecü: Anyiza nanketizen nu kecca ya nthu ssiben keyawa salo.

Thessalonikanyi Kenondi nu Kahang

² Ikhang keshüthangla nthu tsüdi ghena keseng pi Anyiza cü nu nthu ghena kekhie sa benden.

³ Kepaghenanye ikhang na Abawa Anyiza tu wi nthu kenondi wi kekuli, nthu ketizen wi kekuli apiketsü, nu nthu Apvüwa Jisu Khrista kenondi wi zükeqhe keben cüki tsü meshen ben.

⁴ Icünyuthu, Anyiza na nthu tizen nu nthu kessi pi ma ji sayadha le kesa ikhang na chüben.

⁵ Kepaghenanye ikhang na Jühtheü Kemehaiwa sen nu nthu wi kegho tsüna ajüh ketan nye, isala kekhang nu Aghamu Kemethawa, nu atsentsawa keben chüti nu sengho. Ikhang na nthu gweghe keben wi khati hang khe nthu na chüben, tsüna nthu ghena kemehaiwa sa.

⁶ Nthu na ikhang nu Apvüwa ti sa yalo; kepaghenanye nthu na ketizen sa ntsa sa lela nthu na Kemetha Ghamu wina kegho ketsijüh nonkeghewa tsü muya.

⁷ Tsalina nthu na Macedonia nu Asia wi kenondithu tsüdi tsütsonca sayadha.

⁸ Kepaghenanye nthu wina Apvüwa jüh tsüna Macedonia nu Akhaya tsüdi wi wa kesa ketan nyela nthu Anyiza kenondi cüki tsü la ayyi tsüdi wi khi wadha. Tsalina ikhang nkhithu keyishü mangla nmidha.

⁹ Mathu tsüdila ikhang na nthu hhainan kegho wi nthu na khati ikhang ssiya nu nthu na khati atsikezhüthu wina khapeghe sen nu Anyiza wi gho nu atsentsa nu hangkeben Nyiza kekuli saben khe tsü cüki khiben,

¹⁰ nu ma Tsawa Jisu, ma keshü wi sa pi hangneng kecüwa nu Anyiza leben kekha gho keten wi ithu khushi kecüwa tsü tang wi na gho keten tsü hieben.