1 SAMUEL 8 - Kemethajüh (N) (Re-editing) Bible (BSI)

Anyithu Na Kadimiwa Kekhie

¹ Samuel na qhai kewa seng wi ma tsathu pi Israel pendhenyithu sa thsü.

² Ma tsa keqhaiwa nyan na Joel nu ghanyiwa na Abijah; manyi na Beersheba wi pendhenyi sa.

³ Isala manyi na manyi ba tsütsonca tsü n-nie; manyi na apisa len wi ketan kekiyi bha, tsalina manyi na nyu wi alaa khuya nu atsentsa wi ajüh südhe ncü.

⁴ Tsalina Israel ccülikesathu tsüdi kemetuli nu Ramah wi Samuel wi wa

⁵ nu ma wi khi, “Ghangchilo, no qhai wadha nu ntsathu na no tsütsonca tsü n-nie. Tsalina kadimi kesü kessi pi ithu miwi kekhang sen thsülo, isanu ithu la diyyi kepathu ti kadimi kesü benya thsüle kesalina.”

⁶ Samuel na mathu na kadimi kesü kekhie tsü n-nen, tsalina ma Apvüwa wi kekhie sa,

⁷ nu Apvüwa na khi, “Anyithu na no wi kekhie tsüdila kina cülo. Mathu na no meya mvula nsa, isala mathu na hi pi mathu kadimiwa nsa thsü mvuladha.

⁸ Hi Ejipt wina mathu ssi keshhugho nten na mathu na hi wi khapeghe wala acenpvü kepathu kinyi, nu mathu na keshüthangla ituwi mangwa sa khe khili ntuwi tsü makesü saben.

⁹ Tsalina mathu kekhie tsü kina cülo; isala mathu kitsan ntsa sachi, nu mathu kadimithu na mathu miwi khati saben khe mehaitsü khimetha pi mathu kizalo.”

¹⁰ Samuel na Apvüwa ma wi kekiza tsüti khipi anyi ma wi kadimi kesü khie kebenthu wi kiza.

¹¹ Ma tsü khimetha, “Nthu kadimiwa na nthu miwi hati saben: Ma nthu tsathu pi süpahithu sa thsü; pahan pi aghi wi ma gorugarithu ssi, pahan pi ma goru kessithu, nu pahan pi ma goru- garithu tuwi bvü thsü isaben.

¹² Ma mathu pahan pi anyi hazar miwi nu pahan pi deni miwi benchüthu sa thsüben. Nthu tsathu pahan na ma lli cah nu yangdsaketenthu wwi, nu pahan na ma ghighethu nu gorugari tsanqaithu cühben.

¹³ Nthu ngathu na ma ghena hankedemvu sa nu ma tssekesa nu amesa kegü kekuli saben.

¹⁴ Ma nthu lli, kemeshentsse lli, nu oliv sankuthu kemehai ntsa tsü khuya nu pi ma kekhu wi kedithu cüaben.

¹⁵ Ma ajüh kekaghatenpen wi kedithu nu kedithu kepa wi ghena nthu kemeshentsse bi nu asu gishü tagha wi kesü khuya ben.

¹⁶ Ma nthu maghathu, nthu mesüsi nu gadathu kemehai ntsa tsü khuya nu tsüthu pi ma ghena kekuli sa thsüaben.

¹⁷ Ma nthu sahangthu gishü tagha wi kesü khuya; nu nthu na ma nssümaghathu sa waben.

¹⁸ Khathansha wi tsüti kesa tsüna gho khe nthu na nthu ketanla kessikeya nthu kadimiwa ghena leben nkaghajüh khi ntsa saben, isala Apvüwa na nthu leben nkaghajüh kekhithu tsü kina cü nben.”

¹⁹ Anyithu na Samuel jüh kekhi tsü nkinala, isala khi, “Nyele! Ithu na kadimiwa kesü sen mvuben,

²⁰ isanu ithu la mizzatenti kepathu ti ithu kadimiwa yala ithu miwi kekhang sen, nu aghikesa wi ithu ssi wa kesali thsüle kesalina.”

²¹ Samuel na mathu kekhi tsüdi kinaya theng nu wala khipi Apvüwa kiza.

²² Apvüwa na luneng, “Mathu na yamvu keben ti kadimiwa kesü pi mathu cülo.” Tsaseng wi Samuel na Israel nyithu tsüdi kiza nu ajjen wi wha neng thsüa.