1 SAMUEL 7 - Kemethajüh (N) (Re-editing) Bible (BSI)

¹ Tsalina Kiriath Jearim nyithu na Apvüwa Cenkethenjüh Khitson tsü khuya nu sen wa anyi kesü yyishiphon wi hang keten ma nyan Abinadab tsü jjen wi chia. Mathu na ma tsawa Eleazar satemetha pi tsü kenonccawa sa thsüa.

Samuel na Israel miwi Kekhang sen

² Apvüwa Cenkethenjüh Khitson na matsü kesie, amapi ngwe-u Kiriath Jearim wi ben wa. Tsü tsüwi Israel nyi tsüdila Apvüwa wi maghala kekiqa khie.

³ Samuel na Israel nyithu wi khi, “Keujüla nthu na nthu leben tsüdi sen nu Apvüwa wi kheneng gho lethu, nthu na asang cenpvüthu nu Astart cenpvü nzawa tsiketonthu tsüdila teshi nsathu yishü. Nthu satemethatha pi Apvüwa wi chi nu ma ketan kinyi lethu ma Filistinthu kwen wina nthu kekasha cüaben.”

⁴ Tsalina Israel nyithu na Baal nu Astart tsikezhüthu tsü teshia, nu Apvüwa ketan kinyi wa.

⁵ Tsaseng wi Samuel na Israel nyithu tsüdi cipi Mizpah wi kemetuli le hati khipi kesunchi, “Hi ciwi nthu ghena Apvüwa wi kekhie saden.”

⁶ Tsalina mathu tsüdila gho Mizpah wi saghuya. Mathu na atssü pahan ssuya nu pi Apvüwa wi kekinyi sala zügüshachi nu tsü ghanan thangthang kezi sa. Mathu khi, “Ithu na Apvüwa tuwi samidha.” (Samuel na cü Mizpah wi Israel nyithu jawi kicennalithu südhe cü.)

⁷ Israel nyithu na Mizpah wi saghuben le kesa Filistinthu na zakeya wi Filistin kadimithu manga na mathu nyithu ssinu Israel nyithu ssikaghashen shhu. Israel nyithu na tsü cüki zaya nu mathu messiya,

⁸ nu Samuel wi khi, “Filistinthu kwen wina ithu hangshaya thsüle kesalina Apvüwa ithu Nyiza wi kekhie saki benlo.”

⁹ Samuel na khaghaneni zza kaghani kesü pathi nu maben mecang pi Apvüwa wi kekinyi kesü sa. Tsaseng wi ma Israel ghena Apvüwa wi kekiqa khie, nu Apvüwa na ma kekhie luneng cü.

¹⁰ Samuel na ahhansha satu keben wi Filistinthu na mathu ssikaghashen le shhugho; isala Apvüwa na tang wina atssan shigü pi mathu shun. Mathu na chükivvü ntsa sa nu messila bvüzighea.

¹¹ Israel nyithu na Mizpah wina Filistinthu jügü sen Bethkar kecu wi wa nu alenca wi mathu pathi.

¹² Tsaseng wi Samuel na alon kesü khuya nu tsüpi Mizpah nu Shen manyi jüwi shengya nu khi, “Apvüwa na tsüdi wila ithu kiqa cü ghole,” — nu ma tsü nyan pi “Kekiqa Lon” isa ci.

¹³ Tsalina Filistinthu na nyu nchala, nu Samuel hang keben chu Apvüwa na mathu ya Israel yyi kenka tsü khen.

¹⁴ Ekron nu Gath manyi jüwi Filistinthu na nkaya kesa nyunutithu tsüdi pi Israel cü neng, tsalina Israel na ma yyi tsüdi mu nengya. Israel nu Kanaan nyithu jüwi la kecca na ben wa.

¹⁵ Samuel na ma hang keben chu Israel wi kekhang sen.

¹⁶ Ma amapi kaghapengla Bethel, Gilgal, nu Mizpah wi wa nu apen hathu wi kicennalijüh tsü südhe.

¹⁷ Isanu tsaseng wi ma jjen Ramah wi wha neng, nu ciwi la ma pendhenyi sa. Ma Ramah wi kekinyipen kesü sapi Apvüwa wi chi.