1 SAMUEL 6 - Kemethajüh (N) (Re-editing) Bible (BSI)

Cenkethenjüh Khitson tsü Khunengkea

¹ Apvüwa Cenkethenjüh Khitson tsüna asha tagü Filistin wi keben seng wi

² anyithu na keqhaikedithu nu chuchüthu cighu chi nu keü, “Ithu na Apvüwa Cenkethenjüh Khitson hapi khati sa nu? Keujüla ithu na hapi ma pen wi kesun neng chi lethu, ithu na mangwa pi tsü gweghe kesunchi nu?”

³ Mathu luneng, “Keujüla nthu na Israel Nyizawa Cenkethenjüh Khitsonwa tsü khuneng lethu, nthu na nthu kesami ghena aju kesü pi ma kecü tsüpi tsü gweghe nkesun chithu yishü. Cenkethenjüh Khitsonwa tsü ya aju nsenla nwha thsüla. Hatinu nthu sapi mehai yaden, nu nthu na ma mangkesa na kemeten pi nthu cü gho khe chüya mehai.”

⁴ Anyithu na keü, “Ithu na aju mangwa pi ma wi kesunchi nu?” Mathu luneng, “Suna pi avünen ti kesa manga nu centapvü ti kesa manga pi Filistin kadimithu kesüsü ghena zhüya. Tsü dhagha makesü kesa kesun pi nthu nu kadimi manga tsüdi miwi chi cüle.

⁵ Nthu na nthu diyyiwa yasa kesathu avünen nu centapvü tsiton meyathu yishü, nu nthu na kekinyikü pi Israel Nyizawa tsü cüben. Isalethu ma kemeten pi nthu, nthu cenpvüthu, nu nthu yyiwa tsü ncüla nashe.

⁶ Mangsale nthu na Ejipt kadimiwa nu Ejipt nyithu ti leben-dhu ben nu? Mathu na Israel nyithu ya Ejipt npi keteshi chu Anyiza na khati mathu sapi jüphon thsü khe tsü meshen yalo.

⁷ Tsalina amesü gari ketheü kesü saya nu amesü asunkeqhan npi kepvü keni ssigho gari wi hugiya nu ma zzathu kupi ajjen wi wha thsülo.

⁸ Apvüwa Cenkethenjüh Khitson tsü sen wa gari wi nthu kesami ghena aju kesü pi ma wi kesunchi keben suna tsiketon khitson kete witsü chiya. Amesü gari tsü yala wa thsü nu ma ketanla ma len wi wa thsülo.

⁹ Isanu tsü kewa ghanglo; keujüla tsüna Beth Shemesh nyuti kepeghewa wa lethu, tsüna ma jjügi Israel nyi cenpvüwa na ketizenkesa qhethiketen ha kesun pi ithu miwi chile. Isala keujüla tsüti nsa lethu, ma adhaghawa tsü kesun nchile kesa ithu na chüyaben; tsüna matsü wina gho ithu cukeya le.”

¹⁰ Mathu salo kekiza ti mathu na tsü sa; mathu na amesü keni ssi wa amesü gari wi hugiya, nu ma zzathu pi ajjen non wi khenten.

¹¹ Mathu na Cenkethenjüh Khitsonwa tsüpi avünen nu centapvü tsiketonthu pi chi ketheng khitson tsü gweghe pi amesü gari wi chiya.

¹² Amesü keni tsüna Beth Shemesh len wi lentsenchi nu lenkhulenshü wi nwala meshonqhe khou sen nu ciwi wa. Filistin kadimithu manga na tsüthu nie wa Beth Shemesh ggü kecu wi chia.

¹³ Tsü tsüwi Beth Shemesh nyithu na yyiketijü wi awhengsu lli wwiben, mathu na yaki shagha ghangchi nan Cenkethenjüh Khitson tsü muya nu mathu nonghe ntsa sa.

¹⁴ Amesü gariwa tsüna gho Beth Shemesh wi hang keten anyi kesü ma nyan Joshua tsü lli wi alon keti kete wi ngan wa. Anyithu na wala amesü gari tsü denthiya nu amesü keni tsü pathi pi mecang pi Apvüwa kekinyi kesü sa.

¹⁵ Levi nyithu na Apvüwa Cenkethenjüh Khitsonwa tsü pieshaya nu suna pi tsiketon na keben khitsonwa tsüpi alon keti miwi chia. Tsaseng wi Beth Shemesh nyithu na mecang pi kekinyi nu ahhansha kepathu sapi Apvüwa cü.

¹⁶ Filistin kadimithu manga na mathu hati kesa ha ghang nu tsü ghanan Ekron wi wha neng 1

¹⁷ Filistinthu na suna pi avünen ti kezhü manga pi mathu kesami ghena aju sapi Apvüwa wi kesun kechi tsüna anyunuti Ashdod, Gaza, Ashkelon, Gath, nu Ekron hathu kesüsü ghena.

¹⁸ Mathu na suna pi centapvü ti kezhü la pi Filistin nyunutithu khwetivü ketheng nyutithu nu khwetivü nketheng nyuthu wila kekhang sen keben kadimi manga ghena kesunchi. Mathu na Apvüwa Cenkethenjüh Khitson pi Beth Shemesh wi kahangwa Joshua lli wi keben alon keti miwi kechi lonwa tsüna chüza sala khilila ciwi ben.

¹⁹ Apvüwa na Beth Shemesh wi anyi achentagü pathia, kepaghenanye mathu na Cenkethenjüh Khitson non witsü ghangchi kesalina. Nu anyithu na anongü, kepaghenanye Apvüwa na mathu jawi anyi kejon pathia.

Cenkethenjüh Khitsonwa na Kiriath Jearim wi keben

²⁰ Tsalina Beth Shemesh nyithu na khi, “Thowa na Apvüwa, Anyiza kemethawa ha tuwi nganya mehai nu? Ma ya ithu tuwi na bvü thsüale kesalina ithu ma kesun pi khiewa chiya mehai nu?”

²¹ Mathu na nyilothu kesun pi Kiriath Jearim nyithu wi chi nu khi thsü, “Filistinthu na Apvüwa Cenkethenjüh Khitsonwa tsü khuneng chidha. Dughola tsü khuyalo.”