1 SAMUEL 5 - Kemethajüh (N) (Re-editing) Bible (BSI)

Cenkethenjüh Khitsonwa na Filistinthu jawi Keben

¹ Filistinthu na Cenkethenjüh Khitson tsü pegheya nu mathu Ebenezer wina tsü pvü nu mathu nyunuti Ashdod wi wa,

² tsü sen wa mathu cenpvü Dagon kekinyijjen wi ma tsiton ketheng kete wi chia.

³ Ghanenwa wi mitu na Ashdod nyithu na Dagon tsiketon tsüna Apvüwa Cenkethenjüh Khitson tuwi ma mmi zan ncüggü nu ayyi wi khuli keben muya. Tsalina mathu na tsü pieki pi ma pen wi chi neng.

⁴ Tsü ghanenwa wi la mathu na tsiketonwa tsüna kheneng Cenkethenjüh Khitson tuwi khuli keben muya. Khilitsü Dagon tsiketon tsü ma li nu ma kwen keni dezighe pi ajenka kete wi cüchi; nu ma pvüwa ketan ciwi benla.

⁵ (Tsalina nansü kecu Ashdod wi Dagon keqhaikedithu nu tsü kekinyithu tsüdila apen tsüwa tsü nkukeghe keten khe tsü miwi nne nten.)

⁶ Apvüwa na kemeten pi Ashdod nyithu cü nu mathu metenmesha ntsa sa. Ma kemeten pi mathu nu ayyi tsü kevü wi anyithu cü nu mathu ya avünen pvü thsü.

⁷ Mathu na mangkhati sadha khe mukeya wi mathu na khi, “Israel Nyizawa na kemeten pi ithu nu ithu cenpvü Dagon cüben. Ithu na Cenkethenjüh Khitsonwa hapi hewi nben neng thsüdha.”

⁸ Tsalina mathu na nyilothu kesun pi Filistin kadimithu manga cighu chi nu mathu wi keü, “Ithu na Israel Nyizawa Cenkethenjüh Khitsonwa hapi khati sa nu?” Mathu na luneng, “Tsü sen wa Gath wi chilo.” Tsalina mathu na tsü sen wa Filistin nyunuti kepawa Gath wi chia.

⁹ Isala tsü pie nu ciwi kegho wi Apvüwa na kemeten pi anyunuti tsüwa la cü nu ketizensa ntsa sa thsü. Ma avünen pi mathu metenmesha nu tsüna anyunuti tsüwa wi anyi ghanyi keqhai tsüdi gwo wi shhughoa.

¹⁰ Tsalina mathu na Cenkethenjüh Khitsonwa tsü kesun pi Filistin nyunuti kepawa Ekron wi chia. Isala tsü pie nu ciwi kegho wi anyithu na magha, “Ithu tsüdi pathi thsüale kesalina mathu na Israel Nyizawa Cenkethenjüh Khitsonwa tsü sen nu hewi ghodha le!”

¹¹ Tsalina mathu kheneng Filistin kadimithu tsüdi cichi nu khi, “Israel ji Cenkethenjüh Khitsonwa tsüna ithu nu ithu theghithu npathi thsüle kesalina tsü kesun pi ma pen wi chi nenglo.” Anyunutiwa maben wi messi wa, kepaghenanye Anyiza na mathu metenmesha ntsa sa.

¹² Anyi nshüla kesathu lela mathu gwo wi avünenthu shhugho nu mathu na maghala mathu cenpvüthu wi kekiqa khie.