1 SAMUEL 4 - Kemethajüh (N) (Re-editing) Bible (BSI)

Cenkethenjüh Khitsonwa tsü Pegheya kesa

¹ Tsü tsüwi Filistinthu na Israel ssinu aghisale saghuya, tsalina Israel nyithu na shula mathu ssisa. Israel nyithu na Ebenezer wi nu Filistinthu na Afek wi mathu kemnanpen sa.

² Filistinthu na gho ssisa nu aghisa ntsa kesa seng wi mathu na Israel nyithu chaya nu aghi wi anyi hazar mejüu pathia.

³ Hang keyathu na kemnanpen wi kegho neng wi Israel ccülikesathu na khi, “Mangkesa na Apvüwa na Filistinthu ya nansü ithu chaya thsü nu? Ithu wala Shilo wi Apvüwa Cenkethenjüh Khitsonwa tsü pie ghoa na, isanu ma ithu gweghe wala aghinyithu kwen wina ithu hangshaya thsüle kesalina.”

⁴ Tsalina mathu na nyilothu kesun pi Shilo wi wa Cherubim miwi keben Kekhang ntsawa Apvüwa Cenkethenjühwa tsü piegho. Nu Eli tsa Hofni nu Fineha manyi la Cenkethenjühwa tsü gweghe gho.

⁵ Khathansha wi Cenkethenjüh Khitson tsüna gho cuya khe Israel nyithu na anonkeghe wina misikhhali ntsa jisha nu ayyi ccünkhala kuli.

⁶ Filistinthu na kemagha hhai tsü zaya nu khi, “Ibrithu kemnanpen wi kemagha hhai tsü kina chilo! Tsüna ma jjügi mangwa nu?” Khathansha wi mathu na Apvüwa Cenkethenjüh Khitsonwa tsüna gho Ibrithu kemnanpen cuyadha le chüya khe,

⁷ mathu na messi nu khi, “Acenpvü kesü na mathu kemnanpen wi ghodha! Ithu na dedi tendha! Hatu wi ithu miwi hati mangla npi sale!

⁸ Thowa na acenpvü hathu kekhang wina ithu hangshaya mehai nu? Acenpvü tsüthu tsüna ayyikeshü wi Ejipt nyithu pathile!

⁹ Lebenzüya, Filistinthu! Npvüza ti aghisalo, nyelethu Ibri nyithu na ithu nssümagha kesa ti ithu na mathu nssümagha sa wa tendha. Tsalina npvüza ti aghisalo!”

¹⁰ Filistinthu na kesali ntsa sa nu Israel nyithu chaya, Israel nyithu na bvü sen nu mathu jjen wi wha. Ciwi anyi kepathili ntsa sa; Israel nyi süpahithu hazar changha pathia.

¹¹ Anyiza Cenkethenjüh Khitson tsüna nyu na pegheya, nu Eli tsa Hofni nu Fineha manyi qho pathia.

Eli Keshü

¹² Benjamin mizza wi anyi kesü na tsü ghanan aghikesa pen wina bvü sengho Shilo cuya. Ma hathakina pi ccücale kesalina ma thsümeni mezüqhe pi nu ayyi pi ma li miwi chiya.

¹³ Eli na alen kete wi ma pen wi donki nu Cenkethenjüh Khitson ghena ma leben güccü nu ghangben. Anyi tsüwa na jühtheü tsüpi anyuti maben wila kiza chia nu anyi tsüdila kemessi wina magha.

¹⁴ Eli na kemagha hhai tsü zaya nu keü, “Kemagha hhai ha mangwa jjügi nu?” Anyiwa na kaghajila Eli wi wa jühtheü tsüpi ma kiza.

¹⁵ (Eli na ma kahang amapi achentugu nu tazen sadha, nu ma nyon na pala mutha nsala wadha.)

¹⁶ Anyiwa na khi, “Hi nansü aghi wina bvüya nu ciwi na bvüsen hewi ghoben.” Eli na keü, “Itsa, khati sadha nu?”

¹⁷ Nyilowa na luneng, “Israel na Filistinthu tubvüdha; tsüna ithu na nyu nkecha qhethiketen kesü sadha le! Tsümiwi ntsa keni Hofni nu Fineha manyi qho pathidha, nu Anyiza Cenkethenjüh Khitsonwa la nyu na pegheyadha le!”

¹⁸ Anyiwa na Cenkethenjüh Khitson tsü khichi meyi Eli na kaghapeng jenka kete wi ma pen wina asengwa khulidua. Ma qhai nu kunon kesa ghena khulidu ma sun kecenshü nu shüa. Ma amapi jügha Israel ccüli sa.

Fineha Wubvü Keshü

¹⁹ Tsü tsüwi Eli cünyiewa Fineha wubvü na atsa-npvüden, nu ma kepvügha pang sa wadha. Ma khathansha wi Anyiza Cenkethenjüh Khitsonwa tsü nyu na pegheyadha nu ma myiewa nu ma wuba manyi qho shüdha le kesa zaya khe, ma zuli kepvügha naa shhugho kesalina wala pvüghaya.

²⁰ Ma shü wa keten wi nza ma kiqa kebenwa na ma wi khi, “Lebenzü yalo; no atsa kesü pvüghayadha!” Isala ma tsü nkina nu mangla nluneng la.

²¹ Ma atsawa nyan pi Ikhabod ci nu khi, “Anyiza nyankethangwa tsüna Israel teshidha!” — tsüna nyu na Cenkethenjüh Khitsonwa tsü pegheya nu ma myiewa nu ma wuba na shü kesa ghena.

²² Ma khi, “Anyiza nyankethangwa tsüna Israel teshidha, kepaghenanye nyu na Anyiza Cenkethenjüh Khitsonwa tsü pegheyadha.”