1 SAMUEL 31 - Kemethajüh (N) (Re-editing) Bible (BSI)

Saul nu Ma Tsathu na keshü

¹ Filistinthu na Gilboa Yikha miwi Israel nyithu ssinu aghisa. Ciwi Israel nyi kejon pathia, nu mathu kepa na Kadimiwa Saul nu ma tsathu gweghe nyu tu bvüa.

² Isala Filistinthu na mathu ghanya nu Saul tsa kecheng Jonathan, Abinadab, nu Malkhishua pathia.

³ Saul kevü wi aghi na sah ntsa sa, nu aghinyithu lakusüthu na ma mesa-mena ntsa sa.

⁴ Ma pvüzawa ma ghighe pvü ketenwa wi khi, “Filistin Anyiza nkechüthu ya leben ghashu hi npathi thsüle kesalina no njünnu hanshi pi hi süthilo.” Isala pvüzawa na tsüti sale kesa ma qhethiketen sa. Tsalina Saul na ma ketanla ma njünnu hanshi pi ma süthia.

⁵ Pvüzawa na Saul shü kesa mukeya wi ma la ma njünnu hanshi pi ma ketanla ma süthi nu Saul gweghe shüa.

⁶ Tsütinu Saul, ma tsa kecheng, nu pvüzawa la shüa; Saul nyi tsüdila tsü ghanan shüa.

⁷ Khathansha wi Jezreel Yyiketijü na khhakawa nu Jordan Ghaku na nishuwa keben Israel nyithu na Israel nyi süpahizi na nyu tu bvüa nu Saul nu ma tsathu pathidhale kesa zaya khe mathu na mathu nyutithu teshi nu bvüa. Tsaseng wi Filistinthu na gho anyutithu tsü nkaya.

⁸ Aghisa nu dhitsüwa wi Filistinthu na anyi keshüthu tsanqai shuyale wa nan mathu na Saul nu ma tsa kecheng kamangthu na Gilboa Yikha miwi keben muya.

⁹ Mathu na Saul li dhiya, ma ghighe khuya, nu nyilothu kesun pi Filistia maben wi wa ajüh kemehai pi mathu tsikezhüthu nu anyithu kiza thsü.

¹⁰ Tsaseng wi mathu na ma ghighethu pi acenpvü nzawa Astart kekinyijjen wi chi, nu ma kamang pi Beth Shan nyunutiwa keshong wi dügüa.

¹¹ Khathansha wi Gilead wi Jabesh nyithu na Filistinthu na Saul miwi mangwa sachi khe zakeya wi

¹² anyi aghikekhang ntsathu na ghaja thangthang lentsen sen nu Beth Shan wi wa. Mathu na Beth Shan nyunutiwa keshong wi Saul nu ma tsathu kamangthu tsü khushaya, nu tsüthu sengho Jabesh wi mecang.

¹³ Mathu na agüthu tsü khuya nu sen wa anyuti wi tamarisk chanton cakhu wi vhüa, nu mathu na ghanan tagü kezi sa.