1 SAMUEL 29 - Kemethajüh (N) (Re-editing) Bible (BSI)

Filistinthu na David Meya mvulakea

¹ Filistinthu na mathu süpahi tsüdi saghu sen nu Afek wi gho, tsü tsüwi Israel nyithu na Jezreel Yyiketijü wi atssükebvüpen wi kemnanpen saben.

² Filistin kadimithu manga na mathu süpahithu meza khang nu hazar khang ssinu lentsen shhugho; David nu ma nyithu na Kadimiwa Akhish ssinu aseng wi lentsen shu.

³ Filistin benchüthu na mathu muya nu keü, “Ibri nyithu ha hewi mangwa saben nu?” Akhish na luneng, “Hawa ha David, Israel kadimiwa Saul nyi kedi kesüle. Ma hewi matsü pahan hi gweghe ben wadha. Ma hi wi kegho tsathang na gho nansü kecu kesazzi mangla mu meyale.”

⁴ Isala Filistin benchüthu na Akhish miwi aghepvü nu ma wi khi, “Anyi katsüwa kesun pi no anyuti pi ma kecü wi wa neng thsülo. Ma ya ithu gweghe aghi wi nwa thsü lalo; kesali keben wi ma kheneng ithu shun shaghaben. Ma ithu pathi nu ma pvüwa kenenwa sa nengyale kesa alen tsü miwi kemehaiki mangwa ben nu?

⁵ Hawa ha David, nzathu na ma cüki khila nashü nu ma saki, ‘Saul na anyi hazar pathia, isala David na hazar tagha pathia’ le kesawa tsü.”

⁶ Akhish na David cichi nu ma wi khi, “Hi hang kebenwa Israel Nyiza nyan wina kishenben, no ijühkeya wi bengho; nu hi no ya hi gweghe wa aghisa thsü mvuben. No hi wi kegho tsathang na gho nansü kecu hi no kesazzi mangla mu meya. Isala kadimi kepathu na no meya qole sadha.

⁷ Tsalina mathu nkenen mangla nsala nu nlebencca ajjen wi wha nenglo.”

⁸ David na luneng, “Kediwa, hi mangwa sazzitheng nu? Keujüla no kekhi ti hi no kekuli sa keshhugho tsathang na gho nansü kecu no hi kesazzi mangla mu meya lethu, mangkesa na hi no ipvüwa nu kadimiwa gweghe wa nu nghinyithu nssisa thsü mvu ben nu?”

⁹ Akhish na khineng, “Anle, hi no pi ituwi Anyiza nyilo kesü jühkeya ti saden. Isala kadimi kepathu na no ithu gweghe aghi wi waya nbenle khidha.

¹⁰ Tsalina David, dhitsü wi nthu Saul teshi nu hi wi gho kesathu tsüdila mitu na shagha nu atsan na thang shagha meyi bvülo.”

¹¹ Tsalina David nu ma nyithu na pitsüwa ghanen wi mitu na Filistia wi wa neng, nu Filistinthu na Jezreel wi wa.