1 SAMUEL 25 - Kemethajüh (N) (Re-editing) Bible (BSI)

Samuel Keshü

¹ Samuel na shü, nu Israel nyi tsüdila gho saghu nu ma ghena anongü. Tsaseng wi mathu na ma pi Ramah wi ma jjen wi vhüa. Haseng wi David na Paran ghansha wi wa.

David nu Abigail

^2-3 Ciwi Kaleb gei wi anyi kesü Maon nyuti wina kegho ma nyan Nabal ben, nu ma Karmel nyuti kete wi ayyi ben. Ma keban ntsa kesü, khaghaneni hazar kecheng nu anenithu hazar kesü tsüti ben. Ma wubvü Abigail na atsimehai nu metsa, isala Nabal na daggü nu kecügü nyi kesü. Nabal na Karmel wi ma khaghaneni ssen ceben,

⁴ nu David na aghansha wi ben nu tsü cüki zaya,

⁵ tsalina ma ahza pi kepvüza nyi meshu tagha cü nu kesun pi wa Karmel wi Nabal bha nu ma shalom pi ma cülo khi.

⁶ Ma mathu kecükegwe pi Nabal wi gho khi thsü, “Ipvüwa, David na shalom pi no cüben. Kecca ya no, ntheghi, nu no keben tsüdi miwi ben keyawa salo.

⁷ Ma no nkhaghaneni ssen cebenle kesa zaya, nu ma no ya chü thsü mvu kebenwa na n-nenikehiethu na ithu gweghe bengho nu ithu na mathu npatena. Mathu na Karmel wi keben chu mathu ji mangla nsa.

⁸ Mathu keü nanlo, mathu na no kiza ben na. Ikhang na akho tsathang wi ghoben, nu David na no kemehai sa ikhang ssiyalo khiben. Tsalina no mangwa ben khe pi nmaghathu nu npvüshangwa David cülo.”

⁹ David nyithu na David nyan wina ketsijüh hapi Nabal kiza. Tsaseng wi mathu na ciwi hieben,

¹⁰ nu Nabal na asakhen wi luneng, “David ne? Ma thowa nu? Hi khiela ma cüki npi zayale! Khijaghashene diyyiwa wi nssümagha bvü kesathu na pongdha.

¹¹ Hi amesa nu atssü, nu ikhaghaneni ssen kecethu ghena asahang pathi kethengthu tsüpi hi anyi khiewi na gho khe nkechüthu tsü cü nten!”

¹² David nyithu na ma wi kheneng wala Nabal na mangwale khi khe pi ma kiza.

¹³ David na ma nyithu wi khi, “Tsüdila njünnu pvüyalo.” Nu anyi tsüdila ma njünnu pvüya. David la ma njünnu pvüya nu ma nyithu meza keni teshi pi atsanqai hie thsü nu meza mejü ssinu wa.

¹⁴ Nabal maghathu jawi kesü na Nabal wubvü wi khi, “David na aghansha wina nyilothu pahan kesun chipi ishinyi pvüwa shalom sa thsü, isala ma mathu kimenni cükesa tsü no chüla nu?

¹⁵ Isala ikhang na alli wi mathu gweghe keben chu mathu na ikhang ghena mehai ntsawa sa, ikhang likesaghang mangla nmi, nu ikhang ji mangla nsale.

¹⁶ Ikhang na mathu gweghe keben chu matsü maben wi ghanan le ghaja lela mathu na ikhang khwe nu ikhang sahangthu noncca cü.

¹⁷ Tsalina ha meshenchi nu khati saten khe südhe yalo. Hana ikhang pvüwa nu ma theghithu tsüdila yasaya mehai. Ma cügü ntsawa nu tho jüh la kina nbenle!”

¹⁸ Abigail na wa kaghajila amesa abe meza keni, kisengtssü pi akhüti pongti kesa keni, khaghaneni manga pi keshvu, asu kennun kilogram tagha nu tagü, kemeshentsse bi keqen aten meza, nu khhaghabvü keqen pi amesa kegü meza keni tsüthu pi gada khhi saya.

¹⁹ Tsaseng wi ma amaghathu wi khi, “Nthu na atuwi walo, hi nthu nie ghaben na.” Isala ma mangla ma wuba nkiza.

²⁰ Ma gada miwi na yyishiphon ccü wi vügho nan ciwi David nu ma nyithu na gho ma metu.

²¹ Tsü tsüwi David na hati meshenben, “Mangkesa na hi aghansha wi anyi tsüwa tsanqai tsü noncca cü nu? Ma tsanqai kesüla nbhatagha, nu ma hatinu hi ma kiqa kecü kutimenwa tsü sa neng cübenle!

²² Keujüla hi ghanenwa npi kegho tuwi ma nyithu npvüza kesüla nheila pathi nsalethu, Anyiza ya hi pathi kesawa salo.”

²³ Abigail na David muya meyi gada miwi na cadu David ccü wi ayyi wi nkhwendu,

²⁴ nu ma wi khi, “Kediwa, nchala ijüh kinachilo! Kesazzi tsüpi imiwi chilo.

²⁵ Tizenthu mangla nkenyewa Nabal jüh tsü nkina lalo; kepaghenanye ma nyan pi ci ketheng ti ma tsü makesü kejüphon kesü le! Kediwa, nmaghathu na kegho witsü hi ciwi nmile.

²⁶ Apvüwa na no yala nghinyithu miwi ajukhi yathsü nu pathiya thsü. Nu hi khili Apvüwa hang kebenwa nyan wina no wi kishenben, nghinyithu no patena mvu kebenthu tsüdila Nabal ti kemeten muyaben.

²⁷ Kediwa, no nchala hi aju sengho keben ha khuya nu pi n-nyithu cülo.

²⁸ Kediwa, hi kesami teshi cülo. Apvüwa na no nu nshicübvüghathu la sapi kadimiwa sa thsüaben, kepaghenanye no Apvüwa ghena aghisaben; nu no hang keben chu nkemehai mangla sa nben.

²⁹ Keujüla anyi pahan na no ssikaghashen nu no pathiale sa lethu, Apvüwa n-Nyiza na anyi kesü na ma tsanqai menkedhu hie keben ti no noncca yaben. Isala nghinyithu tsü anyi kesü na alon pi ali la wi ga kesa ti ma tsüthu pi khala ben.

³⁰ Khathansha wi Apvüwa na no wi pala kemehai khishi kethengthu tsüdi saya nu no pi Israel kadimiwa saya thsü khe,

³¹ tsaseng wi no asenmesheneng nyelela leben güccü nben, kediwa, kepaghenanye ajjügi nkemi wi nyu pathi nyelela no ketanla ajukhiya nkesalina. Kediwa, Apvüwa na sawegü pi no cü lethu, hi nmali lalo.”

³² David na ma wi khi, “Israel Nyizawa, nansü no kesun pi hi metu kethsüwa, Apvüwa seng!

³³ No kemeshen kemehai ghena nu nansü no hi yala ijukhiya nu nyu pathi nu kesami nsa thsüla kesa ghena Anyiza nkesengchale.

³⁴ Apvüwa na hi ya no npatena thsü mvu. Isala hi Israel Nyiza hang kebenwa wina kishenben, keujüla no kaghajila hi nmetu lethu, ghashenen Nabal nyi tsüdila shüa kesadhale!”

³⁵ Tsaseng wi David na nzawa na ma ghena sen kegho tsü khuya nu ma wi khi, “Lebencca njjen wi whalo. Hi no kekhi ti sacü ben na.”

³⁶ Abigail na ajjen wi Nabal na kadimi kemishu kesü ti sa keben wi tsü wa. Nabal na adina ntsa pvü nu ammiyeng ben, tsalina ma dhitsü ghanenwa npi kecu chu ma wi mangla nkhi.

³⁷ Nabal na metsakeya seng wi ma wubvü na tsüdi khipi ma kiza. Ma khulidu ketizensa ntsa nu cügüshütha sa.

³⁸ Ghanan tagha seng wi Apvüwa na Nabal kihhe cü nu ma shüa.

³⁹ David na Nabal shüdhale kesa zakeya seng wi ma khi, “Apvüwa sengle! Ma Nabal na hi kimenni kesalina ajukhiyadha nu hi ma maghawa yala nsazzi thsü ladha. Nabal na nkemehai ghena Apvüwa na kemeten pi ma cüdha.” Tsaseng wi David na Abigail yayale ajühpiwa thsüa.

⁴⁰ Ma maghathu na Karmel wi Abigail wi wa nu ma wi khi, “David na no ssigho ma wubvü sa thsülo ikhang kesun chitheng.”

⁴¹ Abigail na ayyi wi nkhwendu nu khi, “Hi ma maghale, hi ma maghathu ccü bhuya mehaile.”

⁴² Ma shagha kaghajila ma gada miwi kiya, ma maghalethu meshu manga ssiya nu David maghathu gweghe wala David wubvü sa wa.

⁴³ David na Jezreel wina keghowa Ahinoam yayadha, nu khili Abigail la ma wubvü sa wadha.

⁴⁴ Tsü tsüwi Saul na ma nga Mikhal, David wubvüwa tsüpi Gallim nyuti wina keghowa Laish tsa Palti cüdha.