1 SAMUEL 24 - Kemethajüh (N) (Re-editing) Bible (BSI)

David na Saul Npathilakesa

¹ Saul na Filistinthu ssisa nu kheneng kegho wi nyu na ma wi David na Engedi ghansha wi benle ma kiza.

² Saul na Israel süpahithu kemehai ntsa hazar kecheng ssiya nu Amejü Lonshi na nishuwa wi tsü David nu ma nyithu bha wa.

³ Ma alen kete wi khaghanenithu kejenpen alonshiku kesü wi ghoya nu ma ciwi wa mnanben. Alonshiku tsüna kheni David nu ma nyithu na maku non ntsa wi kekuthi ben sabenla.

⁴ Ciwi David nyithu na ma wi khi, “Khili ha nghena matsü kemehaidha! Apvüwa na nghinyi pi nkwen wi chicüaben nu no ma miwi mangwa samvu khe sayaben kesa no kizatheng.” David na ghapvü shu Saul nchü thsüla ma gwomejuwa handhiya.

⁵ Isala David na ma leben nccala,

⁶ nu ma ma nyithu wi khi, “Apvüwa na hi ya ipvüwa, Apvüwa na kessi pi kadimiwa kesa thsüwa tsü patena nkesa thsüwa salo! Hi ma patena yishü khangle, kepaghenanye ma Apvüwa na kessikeya kadimiwa tsüle!”

⁷ Tsalina David na ma nyithu leya nu mathu na Saul nssisa thsüla. Saul na shagha alonshiku tsü teshi nu bvüa.

⁸ David na ma seng wi wa nu ma cichi, “Ipvüwa Kadimiwa!” Saul na khapeghe wa ghangchi nan, David na ayyi wi kukedu ma kinyi

⁹ nu khi, “No mangkesa na anyithu na hi no patenale benle kekhi jüh tsü kinaten nu?

¹⁰ Khili no ketanla alonshiku witsü Apvüwa na no pi ikwen wi chicüle kesa muya mehaidha. Inyithu pahan na hi no pathilo khi, isala hi no ghena leben güccü nu hi khiela no patena nben, kepaghenanye no Apvüwa na kessikeya kadimiwa tsüle khi.

¹¹ Iba, ghangchilo; ngwomejuwa kehandhi na ikwen wi benle! Hi no pathia kesale, isala hi ngwomejuwa ketan handhi yale! Ha wina hi no matang shun nben nyelela no patena cüle sa nbenle kesa chüyalo. Hi ntuwi mangla sazzi ntheng lela no hi pathiale jügüden.

¹² Ishinyi thowa na sazziben khe Apvüwa na ghan kinanwa salo! No hi keshun kekuli ghena Apvüwa na kemeten pi no kecüwa salo, kepaghenanye hi khiewi la no patena nben.

¹³ No hati khi ketheng tsü chüben, ‘Nkemehai nyi na nkemehai ketan saden’. Tsalina hi no patena nben.

¹⁴ Ghangchilo, Israel kadimiwa na thowa pathile ben nu? Ma mangwa jügüten khe ghangchilo! Affü keshü nu ayie kesü la!

¹⁵ Apvüwa na ishinyi thowa na sazziben khe ghan nan nu südhe cüaben. Ma ajjügi ha ghangchi nu isheipiya nu nkwen wina hi hangsha kecüwa salo.”

¹⁶ David na ajüh kekhi cen seng wi Saul na khi, “Itsawa David, tsüna ntsakhiwa no kwe?” Isanu ma qai wa.

¹⁷ Tsaseng wi ma David wi khi, “No meshon le nu hi sazzi benle! No ituwi mehai ntsa sa lela hi ntuwi sazzidha!

¹⁸ No ituwi khatila mehai khe no nansü pi hi ccücadha, kepaghenanye Apvüwa na hi pi nkwen wi chicü lela no hi npathi ladha.

¹⁹ Anyi kesü na khaju tughu ma ghinyi ghanya nu ma npatenala bvü thsüten nu? No nansü imiwi mangwa sachi khe tsü ghena Apvüwa na sawegü pi no kecüwa salo!

²⁰ No Israel kadimiwa saben nu no kekhang kesen kekhu wi kadiyyi sayaben kesa hi khili chütiyadha.

²¹ Isala inyan nu itheghi nyan tsü malitha nsa thsüle kesalina no ishicübvüghathu tsü hei cübenle kesa Apvüwa nyan wina hi wi kishenlo.”

²² David na tsüti sabenle kesa kishen. Tsaseng wi Saul na ajjen wi wha neng, nu David nu ma nyithu na mathu kekuthi pen wi wa neng.