1 SAMUEL 23 - Kemethajüh (N) (Re-editing) Bible (BSI)

David na Keila Nyutiwa Hangshakeya

¹ David na Filistinthu na gho Keila nyutiwa ssikaghashen nu asu wwi pvügho ketheng tsü ghanfü benle kesa zaya.

² Tsalina ma Apvüwa wi keü, “Hi wala Filistinthu ssikaghashenla khati nu?” Apvüwa na luneng, “Wa mathu ssikaghashen nu Keila hangsha yalo.”

³ Isala David nyithu na ma wi khi, “Ithu na hewi Judah wi ben nu messiben; isala ithu na wa Keila wi Filistin süpahizi ssikaghashen lethu tsümiwi nmehaikila ben!”

⁴ Tsalina David na kheneng Apvüwa ccüneng, nu Apvüwa na ma wi khi, “Keila wi wa nu ssikaghashenlo, kepaghenanye hi Filistinthu miwi khangkeya pi nthu cüaden.”

⁵ Tsalina David nu ma nyithu na Keila wi wa Filistinthu ssikaghashen; mathu na anyi kejon pathia nu mathu sahangthu khuya. Tsütinu David na Keila nyutiwa hangshaya.

⁶ Ahimelek tsawa Abiathar na bvü wa Keila wi David gweghe keya wi ma adepfü kewhengthsüwa tsü khuya.

⁷ Nyu na Saul wi David na Keila wi wadhale kiza, nu ma khi, “Anyiza na ma pi hi kekhang kekhu wi chidha; kepaghenanye David na ma ketanla anyuti khwetivüketheng kaghapeng jenka non wi du nu ma tieyadha.”

⁸ Tsalina Saul na ma nyithu wi aghi ghena cichi nu wa Keila wi David nu ma nyithu ssikaghashenle vüya.

⁹ Khathansha wi Saul na gho ma ssikaghashenle kiden benle kesa David na zaya khe, ma keqhaikediwa Abiathar wi khi, “Adepfü kewhengthsü tsü sen nu gholo.”

¹⁰ Tsaseng wi David na khi, “Apvüwa Israel Nyizawa, hi Saul na nmaghawa, ighena gho Keila yasale kiden benle kesa zayaben.

¹¹ Keila wi kahangthu na hi ghan pi Saul kwen wi chiaten kwe? Hi zakeya ti ntsakhiwa Saul na ghoben kwe? Apvüwa, Israel Nyiza, hi kekhie luneng cülo!” Apvüwa na lunengchi, “Saul na ghobenle.”

¹² David na kheneng keü, “Nu Keila wi kahangthu na hi nu inyithu ghan pi Saul kwen wi chiaten kwe?” Apvüwa na luneng, “Mathu na tsüti saben.”

¹³ Tsalina David nu ma nyithu meza tugho tsüdila wan Keila teshi nu alentsen wa. David na Keila teshi nu bvüdhale kesa Saul na zakeya wi ma kiden kebenwa tsü teshia.

David Na Yyishiphon Diyyiwa wi Keben

¹⁴ David na ma kekuthi pen yyishiphon diyyiwa wi Zif ghansha kete witsü ben wa. Nu Saul na keshüthangla ma bha lela Anyiza na David pi ma kwen wi chi ncü.

¹⁵ David na Saul ma pathiale bha keten tsü muya. David na Zif ghansha kete Horesh witsü ben.

¹⁶ Jonathan na ma wi wa nu Anyiza na ma khweya metsile kesa khipi ma satenong chicü,

¹⁷ nu ma wi khi, “Nmessi lalo. Iba Saul na mangla no patenaya nben. No Israel kadimiwa saten nu hi nshiwa sa keten tsü ma mehaitsü chüben.”

¹⁸ Manyi na khokho tuwi apvüshang kemehai saden khishikechi kemetha kesü sa. David na Horesh wi ben wa, nu Jonathan na ajjen wi wha.

¹⁹ Zif wi anyi pahan na Gibea wi Saul wi wa nu khi, “David na ikhang yyi Horesh wi Hakhila Yikha miwi Judah ghansha na acülawa wi benle.

²⁰ Kadimiwa, ikhang na no ma ghanya mvuthi sa keben tsü chüben; tsalina ikhang yyi wi dugholo, nu ikhang na no ma ghan yathsü metsi ben na.”

²¹ Saul na luneng, “Nthu na ituwi mehai kesalina Apvüwa na sawegü pi nthu kecüwa salo!

²² Kheneng wa kuti ma khiewa ben khe chütiya nu thowa na ciwi ma muya khe mehaitsü chüyalo. Hi ma achopvü ntsawale kesa zaben.

²³ Ma apen khiewi kuthiben khe chüya nu ajüh sengho hi kiza neng metsilo. Tsaseng wi hi nthu gweghe wa nu ma khilila ayegu ciwi ben lethu hi Judah yyi maben wi lela ma jügüwa nu bhaben.”

²⁴ Tsalina mathu na tsü teshi nu Saul tuwi na Zif wi kheneng ghoa. David nu ma nyithu na Judah ghansha na acülawa Maon ghansha wi ayyikeshü keyisha kesü wi ben.

²⁵ Saul nu ma nyithu na David bha wa, isala David na tsü zaya nu wa Maon ghansha wi yyishiphon lonshi witsü ben wa. Khathansha wi Saul na ha zaya khe ma David jügü wa.

²⁶ Saul nu ma nyithu na yyishiphon pahanwa, nu David nu ma nyithu na kepawa isa ben. Mathu na kaghaji nu Saul nu ma nyithu na mathu tetsaki nu ghanyale jügü keten tsü tubvü den.

²⁷ Tsü tsüwi nyilo kesü na gho nu Saul wi khi, “Wan kheneng gholo! Filistinthu na diyyiwa nka bendha le!”

²⁸ Tsalina Saul na David jügü nwala nu Filistinthu ssisa wa. Tsalina apen tsü nyan pi Shukeya Lonshiwa tsüti cia.

²⁹ David na ciwi na bvü wa Engedi yegu wi kuthi wa.