1 SAMUEL 22 - Kemethajüh (N) (Re-editing) Bible (BSI)

Keqhaikedithu Kepathi

¹ David na Gath nyunutiwa wina bvü sen Adullam nyuti kete alonshiku kesü wi wa. Ma cünyuthu nu ma theghi kepathu na tsü za keya wi mathu na ciwi wala ma gwegheya.

² Anyi ketizensa, nyu menpvü, nu anon-nkwenla kebenthu tsüdi saghuya nu ma wi wa, anyithu saghu meza mejüu sa nu ma mathu ccüliwa saya.

³ David na ciwi na Moab yyi Mizpah wi wa nu Moab kadimiwa wi khi, “Hi Anyiza na ighena mangwa saten khe npi chükeya chu no nchala iba nu ijja ya ghola nthu gweghe benla thsülo.”

⁴ Tsalina David na ma bajja teshi pi Moab kadimiwa gweghe ben thsüa, nu David na alonshiku wi kuthi keben chu mathu na ciwi ben.

⁵ Tsaseng wi atusenjüh-kechüwa Gad na David wi gho nu khi, “No hewi nben lalo; wan Judah yyi wi walo.” Tsalina David na apen tsü teshi nu Hereth yinong wi wa.

⁶ Ghanan kesü wi Saul na Gibea yyi wi yyishiphon kesü wi ma kedithu na ngan nu ma vü nu ma kwen wi ma pie khusen tamarisk ton cakhu kesü wi donkiben. Nyu na David nu ma nyithu keben pen muyadhale kesa ma kiza,

⁷ nu ma ma kekhu wi kedithu wi khi, “Benjamin nyithu, kinachilo! Nthu tsü David na alli nu kemeshentsse llithu pi nthu tsüdi cü, nu nthu pi ma süpahizi wi kedithu sa thsü benle meshen ben kwe?

⁸ Tsü ghena nthu na hi papiale ben kwe? Nthu na thola itsawa na David ssinu apfüwa sayadha le hi nkiza. Nthu na thola icüki nmeshen nyelela David, inyi meshu kesü tsüna khili hi pathiale ghangben, nu itsawa na ma satenong chile kesa hi nkizale!”

⁹ Doeg na ciwi Saul kekhu wi kedithu gweghe nganben, nu ma khi, “Hi David na Nob wi Ahitub tsawa Ahimelek wi wa keten mule.

¹⁰ Ahimelek na Apvüwa wi David na mangwa saten nu keü, nu ma tsaseng wi kedsakejjü pahan nu Filistin nyiwa Goliath njünnu tsüpi ma cüle.”

¹¹ Tsalina Kadimiwa Saul na keqhaikediwa Ahimelek nu ma shilithu Nob wi keqhaikedithu tsüdila cichi nu mathu na ma wi gho.

¹² Saul na Ahimelek wi khi, “Ahimelek kinachilo!” Ma luneng, “Kediwa hi hewi benle!”

¹³ Saul na ma wi keü, “Mangkesa na no nu David nshinyi na hi papiale saben nu? No mangkesa na ma ghena Anyiza ccüneng, nu kedsakejjü pahan nu njünnu kesü pi ma cü nu? Ma khili hi shun nu hi pathiale hiebendha!”

¹⁴ Ahimelek na luneng, “David na nkekhu wi kedi jühtsentsa kesen ntsawale! Ma ndemmiwa, nghikehiethu meza miwi kediwa, nu kadipen wi anyi tsüdila ma nyuwakü ntsa saden.

¹⁵ Anle, hi ma ghena Anyiza ccünengle, nu tsüna atuwa nye. No papiale benle kesa tsü ghena tsü, Kadimiwa na hi nyelela itheghi kesüla metsi-meni kesau nyele. Hi ha jjügi ghena mangla nchüle!”

¹⁶ Kadimiwa na khi, “Ahimelek, no nu nshilithu tsüdi pi shü thsüaden.”

¹⁷ Tsaseng wi ma aghikehiethu ma kete wi ngan kebenthu wi khi, “Apvüwa keqhaikedithu tsü pathilo! Mathu na David ssinu acho sa, nu ma bvükesa tsü mathu na chüben lela mathu na hi nkizale.” Isala aghikehiethu na mathu kwen chan pi Apvüwa keqhaikedithu tsü npathi mvula sa.

¹⁸ Tsalina Saul na Doeg wi khi, “No mathu pathilo — nu Doeg na mathu tsüdi pathia. Tsü ghanan ma keqhaikedithu achentazen nu manga adepfü kewhengthsü kepvü qo nyi tsü pathia.

¹⁹ Saul na keqhaikedithu nyunutiwa Nob wi kahang kepathu tsüdila pi shü thsüa; npvüza nu nzathu, ghanyi nu memethu, amesüsi, gadathu, nu khaghanenithu — mathu tsüdi pathia.”

²⁰ Isala Ahimelek tsa kesü Abiathar na bvüya nu wala David gwegheya.

²¹ Saul na khatinu Apvüwa keqhaikedithu pathi khe ma tsü khipi David kiza.

²² David na ma wi khi, “Hi tsü ghanan khathansha wi Doeg na ciwi keben muya khe, ma tsüpi Saul kiza metsiben kesa hi chüben. Tsalina nshilithu tsüdi shü kesa tsüna ighenale.

²³ Nmessila nu hi gweghe benlo. Saul na ishinyi qho pathi mvuben, isala no hi gweghe apvü-nsala benyaben.”