1 SAMUEL 20 - Kemethajüh (N) (Re-editing) Bible (BSI)

Jonathan na David Kekiqa

¹ Tsaseng wi David na Ramah wi Naioth wina bvüsen Jonathan wi wa. Ma khi, “Hi kesazzi mangwa satheng nu? Hi nba tuwi mangwa satheng nu ma hi pathiale bhaten nu?”

² Jonathan na luneng, “Anyiza na no ya shü thsü nbenle! Iba na pala keti sale kizza sa lela tsüdi pi hi kiza nu saden, nu ma mangla hapi hi wi kuthi nben na. Mangla tsüti sa nbenle!”

³ Isala David na luneng, “No khatila hi nen khe nba na mehaitsü chüben, nu ma mangwa sale kiden pen khe no ya chü thsü ntenle kesa centheng, kepaghenanye tsüna no patena ntsa saben. Hi shükesa na acükha kesütan sadhale kesa hi hang kebenwa Apvüwa wina ntuwi kishenben!”

⁴ Jonathan na khi, “No mangwale khi khe hi nghena tsüdila saben.”

⁵ David na khineng, “Dhitsü wi Asha Ketheü Kho, nu hi wala kadimiwa gweghe kedsakejjü saden. Isala no kemeshen lethu, hi wa pitsü wi minulen kecu alli wi kuthi benla na.

⁶ Keujüla nba na hi ciwi nkemi chüya lethu, ha tsüwi itheghi maben ghena amapi kaghapeng ahhansha kesa tsü ghena hi no kiza nu kaghajila Betlehem wi ajjen wi wadhale ma kizalo.

⁷ Keujüla ma ‘Mehaiben’ khithu, tsüna hi apvü-nsa; isala keujüla ma aghepvüwa lethu, ma hi pathiale ben kesa no chüyaben.

⁸ Nchala hi kenenwa ha sa cülo, nu no hi wi khishikechi kemethawa tsü nielo. Isala keujüla hi sazzi lethu, no hi pathilo! Mangsale hi ssinu nba wi wa nu hi pathi thsüa nu?”

⁹ Jonathan na luneng, “Pala hati kesa nmeshen lalo! Keujüla iba na no pathiale kiden keben chütiya lethu, hi pi no nkizala kwe?”

¹⁰ Tsaseng wi David na keü, “Keujüla nba na ma ghepvü nu no luneng lethu, thowa na tsüpi hi chü thsü ben nu?”

¹¹ Jonathan na khineng, “Ghalo, ishinyi alli wi wa na.” Tsaseng wi manyi gweghe wa,

¹² nu Jonathan na David wi khi, “Apvüwa Israel Nyizawa ya ishinyi chüza kesawa salo! Dhitsü nu pitsü wi hathansha wi hi iba wi keü nanden. Keujüla ma ntuwi mehai lethu, hi ajüh kesun pi no wi chicüaben.

¹³ Keujüla ma no pathiale kiden ben nu hi tsüpi no chü thsü nu no ya mehaitsü bvü thsü nsa lethu, Apvüwa na hi pathi kesawa salo. Apvüwa na iba ssikegho ti no la ssi ketenwa salo!

¹⁴ Nu hi hangben lethu, hi wi no khishikechi kemethawa tsü jühkeya sabenlo; isala keujüla hi shü lethu,

¹⁵ anuphanla itheghi tuwi ccatssü nu jühkeya tsü makesü saben tenlo. Nu khathansha wi Apvüwa na nghinyithu tsüdi yasatha sa khe,

¹⁶ ciwi la ishinyi na khokho wi khishi kethengwa tsüna benden. Keujüla tsü pakhhi lethu, Apvüwa na kemeten pi no cüben.”

¹⁷ Jonathan na kheneng David sapi ma tizentenlo kesa kishen thsüa, kepaghenanye Jonathan na ma ketanla ma ketizen ti David tizen ketenlina.

¹⁸ Tsaseng wi Jonathan na ma wi khi, “Dhitsü wi Asha Ketheü Kho ghena no kedsakejjü pen wi ngho lethu, no ciwi nkemi chüyaben.

¹⁹ Pitsü wi no nkemi tsü mehaitsü chütha yaben; tsalina no hatu wi kekuthi pen witsü wa nu alon pi abhon sa ketheng seng wi tsü kuthi ben lalo.

²⁰ Hi tsüpi kemtsü kesü ti sa nu alakusü kecheng pi ciwi ga chiben.

²¹ Tsaseng wi hi imaghawa na wala tsüthu bhayalo kiza ben na. Keujüla hi ma kizala, ‘Ghangchilo, alakusüthu na nkete wi ben; tsüthu khuyalo,’ isalethu tsüna no apvü-nsala shhughola mehai. No ghena kemessi mangla nmi kesa hi hang kebenwa Apvüwa nyan wina kishenben.

²² Isala keujüla hi ma kizala, ‘Alakusüthu na no na kawa benle,’ isalethu bvülo, kepaghenanye Apvüwa na no kesun pi bvü thsüben.

²³ Ishinyi na khokho wi kishen ketheng tsü Apvüwa na tsü sapi ishinyi ya anuphanla nieya thsüben.”

²⁴ Tsalina David na wala alli wi kuthi wa. Asha Ketheü Kho wi kadimiwa Saul na dsajjüle gho,

²⁵ nu ma khenighanie ti gho ajjen-keshon kete wi donkiya. Abner na ma shiwa donki nu Jonathan na ma kejentan miz na kawa donkiben. David pen tsüna ghacang ben,

²⁶ isala tsü ghanan Saul na mangla nkhi, kepaghenanye ma “David miwi pala pahan kuli nu ma keccüna wi nmethala benla metsile” meshen.

²⁷ Asha Ketheü Kho sa nu dhitsüwa wi lela David pen na ghacang ben, nu Saul na Jonathan wi keü, “Mangkesa na David na ghanie la nu nansü lela kedsakejjü pen wi ngho nu?”

²⁸ Jonathan na luneng, “Ma hi wi ma ya Betlehem wi wa thsülo khiele.

²⁹ Ma hi wi, ‘Hi ya wa thsülo, itheghi na anyuti wi ahhansha kesa khowa tsü kemini saben, nu icünyuwa na hi ciwi gholo kizale. Tsalina no ipvüshangwa lethu, hi ya wala itheghithu ccünengya thsülo,’ khi. Tsalina ma nmiz kete ma pen witsü nmile.”

³⁰ Saul na Jonathan miwi ma lebentsu nu ma wi khi, “No njja na nyu matang nu khapeghekhaja ketenwa tsale! No David nen nu no ketanla kejüghekeya sengho njja nshinyi miwi chi keben tsü hi chüben!

³¹ David na hang keben chu no khiela diyyiwa ha miwi kadimiwa saya nben kesa tsü no nchü kwe? Khili wa ma ssinu hewi gholo — ma pi shü thsü nsathu yishü!”

³² Jonathan na khineng, “Mangkesa na ma pi nshü thsüthu yishü nu? Ma mangwa sazzi theng nu?”

³³ Tsü tsüwi Saul na Jonathan pathiale ma pie pi ma wi ghonchi, nu Jonathan na ma ba ntsakhiwa David pathiale keben chüya.

³⁴ Jonathan na ma lebentsu nu miz wina shagha tsü ghanan mangla ndsala — Asha Ketheü Kho atsathang keniwa. Ma David ghena ahathana ntsa sa, kepaghenanye Saul na ma kimenni cütheng.

³⁵ Dhitsü ghanenwa wi Jonathan na David manyi cenketheng ti alli wi ma metule wa. Ma pvüzanyi kesü ssinu ma gweghe wa.

³⁶ nu ma khi, “Bvü wa nu hi alakusüthu pi gachi keten tsü bha sengholo.” Pvüzanyiwa tsüna bvü wa nu Jonathan na alakusü kesü pi ma tuwi gachi.

³⁷ Khathansha wi pvüzanyiwa na wa alakusü na keqancadu ben tsü cuya khe Jonathan na ma wi jisha nu khi, “Alakusü na tsüna kawa benle!

³⁸ Ciwi ngan nben lalo! Wan walo!” Pvüzanyiwa na alakusü tsü khuya nu ma pvüwa wi kheneng gho;

³⁹ Jonathan nu David manyi ketan khe pvüzanyiwa na tsü jjügi mangla nchü.

⁴⁰ Jonathan na ma ghighethu pi pvüzanyiwa cü nu tsüthu sen nu anyuti wi wha nenglo kiza.

⁴¹ Pvüzanyiwa na kebvü seng wi David na alon pi abhon sa ketheng seng wina shhugho nu ma khutsüdu kecheng tughu ayyi wi nkhwendu. Ma nu Jonathan manyi qho qai nu kekimangli; David hathakina na Jonathan miwi tiki sa.

⁴² Tsaseng wi Jonathan na David wi khi, “Anyiza ya no ssisen tenlo. Apvüwa na ishinyi nu ishinyi shicübvüghathu sapi anuphanla ishinyi na khokho wi khishi ketheng kemethawa tsü nie thsü metsiben.” Tsaseng wi David na bvüa, nu Jonathan na anyuti wi wha neng.