1 SAMUEL 2 - Kemethajüh (N) (Re-editing) Bible (BSI)

Hannah Kekhie

¹ Hannah na khie: “Apvüwa na anonkeghe pi hi pong cüdha; ma sachi kecü ghena hi khatila inonghedha nu! Hi ighinyithu nankeqhe; Anyiza hi kiqa kecü ghena hi inonghe ntsa saben!

² Anyi thola Apvüwa ti nmetha; ciwi ma ti kesa kesüla nmi, ithu Nyiza ti kekhwewa nmi.

³ Nthu nkapvüla yilo; nthu kekapvü jüh nkhi layi. Kepaghenanye Apvüwa tsüna Anyiza, ma pala tsüdi chüben, nu ma anyi tsüdi kekuli ghan nanden.

⁴ Süpahi kezüthu lamugho na pashüdha, isala nkezüthu na khang pfü shagha.

⁵ Anyi kutijü wi mathu nonkwen ketenthu na khilitsü mathu ketanla kedsakejjü milli wadha, isala ghama ketenthu na nghama nengdha. Awubvü atsanga nkemiwa na tagü pvügha yadha, isala atsanga kejon jja na kesüla nmiladha.

⁶ Apvüwa na pathi nu sapi hang thsüden; ma anyi kesun pi keshü yyiwi wa thsü, nu mathu ssi neng ghoden.

⁷ Ma anyi pahan pi ketha-u nu pahan pi wi keban sa; ma pahan satemeni nu pahan pi kedi sa.

⁸ Ma ayyi wina ketha-uwa zanki nu ketizenkesa wina kahhatuwa pieki cü. Ma mathu pi kaditsathu pvüshangthu sa, nu mathu pi kenyuwakü pen wi chi cü. Ayyi giketegüthu tsüna Apvüwa ji; ma tsüthu miwi ayyi sachi.

⁹ ‘Ma ma nyi tsentsathu kahang khweden, isala gheshighenawa tsü kejang wina nmiladen; anyi kesüla ma ketanla ma kekhang ghena khangya nten.

¹⁰ Apvüwa ghinyithu tsü yasa piaben; ma tangwi na ghamo pi tsüthu shunden. Apvüwa na ayyi maben jühkaghakhiben; ma kekhang pi ma kadimiwa cüden, ma kessiya kesawa kadimiwa tsü sapi khangya thsüben.’

¹¹ Tsaseng wi Elkana na Ramah wi ma jjen wi whaneng, isala pvüzanyiwa Samuel na Shilo wi ben nu keqhaikediwa Eli kekhu wi Apvüwa kekuli sa wa.

Eli Tsathu

¹² Eli tsathu na anyi tesütehuthu. Mathu na Apvüwa khichi nten,

¹³ nyelela keqhaikedithu na anyithu wi pala kekhie yenthu tsü lela nkhichi. Khathansha wi anyi kesü na ma ahhansha sale gho khe, keqhaikediwa maghawa na akhakhwe ketsuhwa sen gho nu asa shvu tu keben witsü,

¹⁴ ma akhakhwe ketsuhwa tsüpi awwenpfü non wi shunchi, nu khweshi keyathu tsüna keqhaikediwa jile sayaden. Israel nyi na Shilo wi ahhansha sa keghothu tsüdi tuwi hati sa.

¹⁵ Tsü miwila ma kethu khushi pi npi kemecang wina keqhaikediwa maghawa na gho anyi ahhansha sa kebenwa wi khiden, “Keqhaikediwa ghena pi güyale kesa asa pahan pi hi cülo; ma no wi asa kemeji ketan khe keshvu tsü ya nben.”

¹⁶ Keujüla anyiwa na luneng, “Ikhang mangwa kesau khe sa nu atuwa sa ma kethu pi mecang na; tsaseng wina no mangwa yamvu ben khe khuyalo.” Keqhaikedi maghawa na khiden, “Nyele, khili pi hi cülo! Keujüla nthu na pi hi ncü lethu hi ketanla khuyaden!”

¹⁷ Eli tsathu kesami hawa ha Apvüwa tuwi kedhu ntsa sa, kepaghenanye mathu na Apvüwa wi kekinyi kesa tsü nkütha sa.

Samuel na Shilo wi Keben

¹⁸ Tsü tsüwi pvüzanyiwa Samuel na linen depfü kewhengthsü kemetha kesü mphi nu Apvüwa kekuli saden.

¹⁹ Amapi kaghapengla ma jja na ma ghena agwomejuwa kaghazu kizzakeu saya nu ma wubanyi gweghe amapi kaghapeng ahhansha sa kewa wi sen wa Samuel cüden.

²⁰ Isathu Eli na sawegü pi Elkana nu ma wubvü manyi cü, nu Elkana wi khi, “Apvüwa na nza hawa ha wina no satemetha pi Apvüwa cü kesawa mithon wi atsanga kepa wi la pi no kecüwa salo.”

²¹ Apvüwa na sawegü pi Hannah cü, nu ma atsa kecheng nu anga keni muya. Pvüzanyiwa Samuel na Apvüwa kekuli kesa wi zügü shagha.

Eli nu Ma Tsathu

²² Eli na khilitsü sashü qhai wadha. Ma ma tsa keni na Israel nyithu miwi kuli kechi tsüdi nu Apvüwa ketenpen Nithsüjjen wi kedulen wi kekuli nzathu gweghe kejen cüki lela zayaden.

²³ Tsalina ma manyi wi khi, “Nshinyi mangkesa na hathu hati saden nu? Anyi tsüdila nshinyi nkemehai kekuli cüki pi hi kiza benle.

²⁴ Itsa keni, tsüti nsala yilo! Apvüwa nyithu ya hawa ha kekhi thsü ayen nmile!

²⁵ Keujüla anyi kesü na kepawa tuwi sami lethu, Anyiza na ma sheipiya mehai; isala anyi kesü na Apvüwa tuwi sami lethu, thowa na ma sheipiya mehai nu?” Isala manyi na manyi ba jüh tsü nkina, kepaghenanye Apvüwa na manyi pathiale südheyadha.

²⁶ Pvüzanyiwa Samuel na Apvüwa nu anyi la kenen pvü nu qhai pfüpfü shagha.

Eli Theghi Keshun Atusenjüh-kekhi

²⁷ Atusenjüh-kechü kesü na Apvüwa wi ketsijüh ha sen nu Eli wi gho: “Nbaqhaiwa Aaron nu ma theghi na Ejipt kadimiwa nssümaghathu sa keben wi hi ketanla hi pi Aaron ccüca.

²⁸ Hi Israel mizza tsüdi jawi na ma theghi kessi pi ighena keqhaikedithu sa nu kekinyipen wi hi kekuli sa, hankedemvu pi mecang, nu adepfü kewhengthsü pvü nu hi ccüneng thsüle kesalina. Nu kekinyipen miwi ahhansha sapi kemecang wi tsü mathu shei pi thengya kemehai hi pi mathu cü.

²⁹ Isalethu, mangkesa na hi inyithu wi keyau ahhansha sapi kekinyi wi tsü ghang pi anyonsa benten nu? Eli, no mangkesa na imiwi ntsathu nyuwakü nu mathu ya inyithu na ahhansha sapi hi kecü wi tsü kemehai ntsathu tsüdi khupi mathu ketanla mathu ghanja ben thsü ten nu?

³⁰ Hi, Apvüwa Israel Nyizawa na kheni ntheghi nu ngei yala anuphanla keqhaikedithu sa thsü tenle khishidha. Isala hi khili tsüti tsü nsadha le khiben! Tsü mithon wi, ‘Hi hi kinyikü ketenthu tsü nyuwakü den, nu hi nkhichila sa ketenthu tsüpi ma men nkemi saden.’

³¹ Kinalo, hi ntheghi nu n-gei wi anyi pvünyi tsüdila pathia keten matsü na gho tendha, isanu ntheghi wi anyi kesüla hang wala keqhai ncu thsüdha.

³² Hi sawegü pi Israel nyi kepathu kecü tsüdila no tsü ghang pi ahathana nu anyonghopvü ben, isala ntheghi wi anyi kesüla hangwa keqhai cuya nben.

³³ Isani hi nshicübvügha kesü ya hangya thsü nu ma pi hi keqhaikediwa saden. Isala ma anyon nmula nu ma kaghang tsüdila bhatagha, nu nshicübvügha tsüdila yasayala wina shüshan shaben.

³⁴ Kusi ntsa Hofni nu Fineha manyi gweghe ghanan kesü shü khe hi kekhi ha ntsakhiwa tsüdila sacen tenle kesa pi no ccücaben.

³⁵ Hi keqhaikedi kesü hi wi jühtsentsa sa kebenwa kessiyaten nu hi ma ya sa thsü mvu keben tsüdila saben. Hi ashicübvüghathu pi ma cü nu mathu na keshüthangla hi kessikeya kadimiwa tuwi kekuli saden.

³⁶ Nshicübvüghathu jawi hang keyawa na keqhaikedi tsüwa wi wa nu ma wi apisa nu kedsakejjü khieben, nu ma pala pahan dsayale kesalina ma pi keqhaikedithu kekiqawa sa thsülo kesa keshükene ben.”