1 SAMUEL 19 - Kemethajüh (N) (Re-editing) Bible (BSI)

Saul na David Kemeten-kemesha

¹ Saul na ma David pathiale benle kesa pi ma tsa Jonathan nu ma kekhu wi kedithu tsüdila kiza. Isala Jonathan na David nen ntsa saden,

² tsalina ma David wi kiza, “Iba na no pathiale ” ben. Dhitsü ghanen wi kiden-kesha yalo; wala apen kesü wi kuthi nu ciwi ben walo.

³ No wala alli wi kuthi keben witsü hi iba kete wi whala ncüki khipi ma kizaden. Keujüla hi pala pahan chüya lethu hi pi no chü thsüaben na.”

⁴ Jonathan na David seng nu Saul wi khi, “Kediwa, nmaghawa David tuwi nsazzi lalo. Ma khiela ntuwi kesazzi nsa; tsüti kesawa nye, ma mangwa satheng khe tsüna no kekiqa keti sale.

⁵ Ma ma kahang khuchi nu Goliath pathia, nu Apvüwa na Israel ghena khangkeya keti muya. No tsü mukeya wi anonghe ntsa sa. Isalethu, no mangkesa na khili ma jjügi nkemi wi anyi kesami nkemiwa David pathi nu sazzi mvuben nu?”

⁶ Jonathan kekhi jüh tsü ghena Saul leya nu ma David npathidha le kesa Apvüwa nyan wina kekishen kesü sa.

⁷ Tsalina Jonathan na David cichi nu tsüdila khipi ma kiza. Tsaseng wi ma David ssinu Saul wi wa, nu David na ma kheni sa kegho ti kadimiwa kekuli sa wa.

⁸ Kheneng Filistinthu ssinu aghisa shhugho. David na mathu ssikaghashen nu mathu chaya, mathu na bvüzighe shan.

⁹ Ghanan kesü Apvüwa wina nkemehai ghamu na Saul senya. Ma ma kwen wi apie sen nu ma jjen wi donkiben, nu David na ciwi harp khou ben.

¹⁰ Saul na ma pie pi ajjen-keshon wi David mejenten cüle ghonchi, isala David na tsü ghüya, nu apie na ajjen-keshon wi ghonkia. David na kuthi bvüa.

¹¹ Tsü ghaja Saul na anyi pahan kesun pi wa David jjen hie nu ghanenwa wi ma pathi thsüale sa. David wubvü Mikhal na ma kitsanchi, “Keujüla no shita nbvü lethu ghanen wi no shüa tendha.”

¹² Nzawa na ma pi ajjenkubhi wina shu thsüa, nu ma kuthi bvüya.

¹³ Tsaseng wi nzawa na ajjen wi atsikezhü khupi awe miwi chi, nu aneni ssen pi amchen kesa pi ma li wi chi, nu athsü pi tsü shanbhon.

¹⁴ Saul nyithu na David ghanyale kegho wi Mikhal na ma agwo naa benle kesa mathu wi kiza.

¹⁵ Isala Saul na mathu kesun neng pi wala David ghang thsü. Ma mathu wi khi, “Ma we wi ma pie nu hewi gholo, hi ma pathia ten na.”

¹⁶ Mathu na ajjen non wi dunan ajjen wi atsikezhü pi awe miwi chi nu aneni ssen pi amchen kesa pi ma li wi chi ketheng muya.

¹⁷ Saul na Mikhal wi keü, “No mangkesa na hati hi mechu nu ighinyi yala bvü thsüdha nu?” Nzawa na luneng, “Ma, hi ma kiqa pi bvü thsü nsathu hi pathia tenle kizale.”

¹⁸ David na bvü wa Ramah wi Saul na ma miwi mangwa sa khe tsüdila khipi Samuel kiza. Tsaseng wi ma nu Samuel manyi na Naioth wi wa ciwi ben wa.

¹⁹ David na Ramah wi Naioth wi benle kesa nyu na Saul kiza,

²⁰ tsalina ma anyi pahan kesun pi ma ghan wa thsü. Mathu na wa Samuel na aliwa sala atusenjüh-kechüthu akhang kesü ssinu nashü nu atusenjüh-khi keben muya. Isanu Anyiza ghamu na Saul nyithu miwi la dugho nu mathu la nashü nu atusenjüh-khi shagha.

²¹ Khathansha wi Saul na ha cüki zaya khe ma nyilothu kepa wi kesun nengchi, nu mathu la nashü nu atusenjüh-khi shagha. Ma kecheng tughuwa la nyilothu kesun chi, nu mathu la tsü makesü sa wa.

²² Tsaseng wi ma ketanla Ramah wi wa. Ma wala Seku wi atssükhang keti kesü cukeya wi Samuel nu David manyi na khiewa ben nu kesa nyu keü nu manyi na Naioth wi benle kesa ma kiza.

²³ Ma ciwi wa keten wi Anyiza ghamu na ma miwi la dugho, nu ma Naioth wi wa keten chuli nashü nu atusenjüh-khi.

²⁴ Ma wa Samuel tuwi ma thsümeni khushi pi nu nashü nu atusenjüh-khi, nu tsü ghanan thangthang nu ghaja chuli kimissü ciwi ben. (Ha ghena hati khiwa, “Saul lela atusenjüh-kechü kesü sawadha kwe?”)