1 SAMUEL 18 - Kemethajüh (N) (Re-editing) Bible (BSI)

¹ Saul nu David manyi na keccünengli cenya. Tsaseng Saul tsa Jonathan na David nen ntsawa saya nu ma ketanla ma ketizen ti David tizen wa.

² Tsü ghanan nten na Saul na David pi ma gweghe ben thsüa nu ma ya ajjen wi nwha neng thsüla.

³ Jonathan na kahang chu David pvüshangwa sale kesa kishen kepaghenanye ma David tizen ntsa kesalina.

⁴ Ma pvüketen agwomejuwa kaghazu tsü khushi pi ma ghighe, njünnu, alamugho, nu ageshi keqhan saghu pi David cüa.

⁵ David na Saul ma kesun kechi kekuli tsüdi wi haicenya, tsalina Saul na David pi ma süpahizi wi kedi ntsa sa thsüa. Hati kesa ha Saul kekhu wi kedithu nu anyi tsüdila nen.

Saul na David Ghang pi Anyonsa shaghakea

⁶ David na Goliath pathi nu kheneng gho keten nu süpahithu na ajjen wi kheneng gho keten wi Israel nyuti tsüdi wi nzathu na shhugho Kadimiwa Saul metu. Mathu na anonkeghe khwisa, nashü, tamborin nu lairthu khou.

⁷ Nzathu na anonkeghe kesa wi akhwisa, “Saul na anyi hazar pathia, isala David na anyi hazar tagha pathia.”

⁸ Saul na ha n-nenla ma aghepvü ntsa sa wa. Ma khi, “Mathu na David ghena hazar tagha pi saki, isala ighena tsü hazar ketan. Mathu na ma pi kadimiwa sa thsüa tendha hana!”

⁹ Tsalina ma tsü ghanan nten na David nanmessi nu ma nyonsa wa.

¹⁰ Dhitsüwa wi Anyiza wina nkemehai ghamu kesü zuli Saul senya, nu ma jjen wi ma kedeja kesü ti magha shagha. David na ma keshüthangla sa keten ti harp khou ben, nu Saul na ma kwen wi apie kesü senben.

¹¹ Saul na ma ketanla ma wi, “Hi ma pi ajjen-keshon wi mejenten cüaden” isa khi nu apie pi keni tughu ma ghon; isala David na keni tughu qho tsü ghüya.

¹² Saul na David messi kepaghenanye Apvüwa na ma teshidha nu David ssiden.

¹³ Tsalina Saul na ma kesun pi bvü thsüa nu ma pi anyi hazar kesü miwi benchüwa sa thsüa. David na ma nyithu ssinu aghi wi wa,

¹⁴ nu ma kekuli tsüdi wi haicenya, kepaghenanye Apvüwa na ma ssiden.

¹⁵ Saul na David haicenkeya tsü muya theng nu ma messi kayi wa.

¹⁶ Isala Israel nu Judah wi anyi tsüdila David nen kepaghenanye ma haicencukeya ccülikesa kesü.

David na Saul Nga Yakeya

¹⁷ Tsaseng wi Saul na David wi khi, “Inga keqhai ntsawa Merab na hewi ben. No ighena kempvüza sala ajühkeya süpahi kesü, nu Apvüwa ghikesa ghena hi ma pi nwubvü saya thsüaden.” (Saul kemeshen na ma David npathila hati kesa wina Filistinthu ya David pathi thsüale sa.)

¹⁸ David na luneng, “Hi nu itheghi na thowale hi kadimiwa demmi saya nu?”

¹⁹ Isala Merab pi David cüle kesa matsü na kegho wi ma pi anyi Mehola wina keghowa ma nyan Adriel kesawa tsü cüa.

²⁰ Isala Saul ngawa Mikhal na David nenya, nu Saul na tsü zakeya seng wi ma nongheya.

²¹ Ma ketanla ma wi khi, “Hi Mikhal pi David cüaden; hi Mikhal pi ma die nu Filistinthu ya ma pathi thsüaden.” Tsalina Saul na keni tughuwa David wi khi, “No idemmiwa saden.”

²² Saul na ahza pi ma kekhu wi kedithu cü nu kuthila David ccüneng nu “Kadimiwa nu ma kekhu wi kedithu tsüdila no nenben; khili ha no ma nga yayale kesa matsü kemehai kesüle” tsüti ma kizalo sa.

²³ Tsalina mathu na khipi David kiza, nu ma luneng, “Kadimiwa demmi sa keya hana nyuwakekü keti kesü, hi ti kesa ketha-u nu ma men nkemiwa ghena di mtsüle!”

²⁴ David na mangwale khi khe kedithu na tsüpi Saul kiza,

²⁵ nu Saul na hati David kizalo ahza pi mathu cüa: “Kadimiwa na no wi shanyili men yamvu kebenwa na ma ghinyithu miwi ajukhikeya ghena Filistinthu hyu meza kesü yaden.” (Saul na hatinu Filistinthu ya David pathi thsüale sa.”)

²⁶ Saul kekhu wi kedithu na Saul mangwale khi khe pi David kiza, nu David na kadimiwa demmi sale kesa meshen pi ma nongheya. Keshanyi tsathang npi kessan wi

²⁷ David nu ma nyithu na wala Filistinthu meza keni pathia. Ma mathu hyu tsü sen wa kadimiwa cü nu tsüthu tsüdi sipi ma cüa, isanu ma kadimiwa demmi sayale kesalina. Tsalina Saul na ma nga Mikhal pi David wi n-nuwa thsüa.

²⁸ Apvüwa na David ssiten nu ma nga Mikhal la David nenben kesa Saul na methasi chüya.

²⁹ Tsalina ma David messi kayi nu ma kahang chu David ghinyi sa.

³⁰ Filistin süpahithu na gho ssikaghashen isala aghikesa tsüdi wi David na Saul kekhu kedi kepathu miwi haicenya. Tsü ghena David na anyi kemechan ntsa sa shagha.