1 SAMUEL 17 - Kemethajüh (N) (Re-editing) Bible (BSI)

Goliath na Israel nyithu Kenni

¹ Filistinthu na Judah wi anyuti kesü Soko wi aghisale saghuya; mathu na Soko nu Azekah manyi jüwi apen kesü Afe Dammim wi kemnanpen sa.

² Saul nu Israel nyithu na Filistinthu ssisale saghuya nu Ela Yyiketijü wi kemnanpen saben.

³ Yyiketijü kesü na mathu jüwi ben nu Filistinthu na yyishiphon kesü wi dan nu Israel nyithu na kepawa wi danben.

⁴ Gath nyunutiwa wina kegho anyi kesü ma nyan Goliath tsüna Filistinthu kemnanpen wina shhugho Israel nyithu nni. Ma kesie na meter kecheng cen,

⁵ nu ma lezza ghighe kekiyan kilogram deni nu tagü nu lezza liwen kesü pvüden.

⁶ Ma ccü keni la lezza pi qhan pvü, nu ma lezza khhapvü kesü khha pie den.

⁷ Ma pie bvükhhi na ada-kannen kesha ti nu ma yyitssü kekiyan na kilogram tagü. Süpahi kesü na ma tsonhi pvü nu ma tuwi den.

⁸ Goliath na shhugho ngan nu Israel nyithu wi jishala, “Mang kesa na nthu ciwi aghi ghena danla nganben nu? Hi Filistin nyi kesü, nthu na Saul nssümaghathu! Nthu jawi anyi kesü kessishi pi hi ssisa thsülo.

⁹ Keujüla ma hi pathi nu khangya lethu, ikhang na nthu nssümaghathu sa wa ben; isala keujüla hi ma pathi nu khangya lethu, nthu na ikhang nssümaghathu sa wa ben.

¹⁰ Hi khili hawi Israel nyi süpahi nniben. Nthu thowa na hi nmessi khe gho hi ssisalo!”

¹¹ Saul nu ma nyithu na ha zakeya wi mathu qhethiketen sa.

David na Saul Kemnanpen wi Keben

¹² David na Judah yyi Betlehem wina kegho Efrat nyiwa Jesse tsa kesü. Jesse na atsa tazen ben, nu Saul na kadimiwa kesa tsüwi ma qhai ntsa sadha.

¹³ Ma tsa keqhai ntsawa na Eliab, keniwa na Abinadab, kechengwa na Shamma.

¹⁴ David na atsa ghanyi ntsawa, nu ma bie keqhaiwa kecheng na Saul gweghe den.

¹⁵ David na matsütsü wi Betlehem wi wha neng nu ma ba khaghaneni nonccaden.

¹⁶ Goliath na ghanan jügha ghanen ghaja tsüdila Israel nyithu nni wa.

¹⁷ Ghanan kesü wi Jesse na David wi khi, “Anün süghe ketheng ha kilogram tagha nu amesa abe tagha khuya nu wan tsüthu sen wa kemnanpen wi nbiethu cülo,

¹⁸ nu tsenitssütsen tagha hathu la sen wa benchüwa cülo. Nbiethu na khati saben khe chüya, nu no mathu metuyathu mathu na kemehai sabenle kesa mathu wi pala pahan sengho hi ccücalo.

¹⁹ Kadimiwa Saul, nbiethu, nu Israel nyi kepathu na Ela Yyiketijü wi Filistinthu ssisaben.”

²⁰ David na dhitsüwa wi mitu na shagha anyi pahan pi khaghaneni hie thsüa, kedsakejjü khuya, nu Jesse na ma salo kekiza ti wa. Israel nyithu na aghi wale dan nu aghi jisha keben wi ma wala kemnanpen tsü cuya.

²¹ Filistin nu Israel süpahithu na kematangli nu aghisale apen kidenyadha.

²² David na kedsakejjü tsüpi atsse kenoncca kediwa kete wi teshi theng nu bvü wa ma biethu na aghisale dan keben wi mathu na khati saben khe keü.

²³ Ma wala mathu ccüneng keben wi Goliath na hatu wi sa keten ti shhughola Israel nyithu nni. Nu David na tsü zaya.

²⁴ Israel nyithu na Goliath mukeya wi messila bvüa.

²⁵ Mathu na khokho wi khi, “Ma ghangchilo! Ma nyu kenni hhai tsü kinachilo! Kadimiwa Saul na anyi thowa na Goliath pathiya khe akutimen keti kesü sapi cüaden; kadimiwa na ma nga la pi ma wubvü sa thsüaben nu ma ba theghi ya khajana mangla pi chi thsü nben” kesa khishichidha.

²⁶ David na anyi ma gweghe ketenthu wi keü, “Anyi kesü na Filistinwa ha pathi nu Israel kekimenni tsü senbvü cü lethu ma mangwa muyaben nu? Anyiza nkechünyi Filistin na hangkeben Nyizawa süpahizi nyankekinyen sa keben ha thowa nu?”

²⁷ Mathu na anyi Goliath kepathiwa tsü ghena mangwa sacü ben khe pi ma kiza.

²⁸ David bie keqhai ntsawa Eliab na David anyithu ccüneng keben tsü zaya. Ma David miwi aghepvü nu khi, “No hewi mangwa saben nu? Thowa na aghansha wi nji khaghanenithu tsü hieben nu? No kedithangla kesadha man! No nyu kesali tsü ghangle gho keben ha!”

²⁹ David na keüchi, “Hi khili mangwa satheng nu? Hi ajüh kesüla keüya nben kwe?

³⁰ Ma khapeghewa anyi kepa wi tsü makesü keü, nu ma kekeü kaghapengla anyithu wi tsü makesü keluneng muya.”

³¹ Anyi pahan na David na mangwale khi khe zaya nu pi Saul kiza, nu ma wa David ssinu gholo kesa nyu kesunchi.

³² David na Saul wi khi, “Njenkeben Kadimiwa, anyi thola Filistinwa ha nmessi lalo! Hi wala ma ssisaben.”

³³ Saul na luneng, “Nyele, no khatinu ma ssisaya mehai nu? No pvüzanyi kesü saben, nu ma kahang tsüdi wi süpahi kesü sa ghoben!”

³⁴ David na khi, “Njenkeben Kadimiwa, hi iba khaghaneni hieden. Khathansha wi ssensitemi nyelela aduweng kesü na gho khaghaneni zza kesü ghan ya khe,

³⁵ hi wa tsü ssikaghashen nu ma pang wina khaghaneni zza tsü kekasha yaden. Keujüla ssensitemi le aduweng lela hi kaghanineng shagha lethu, hi tsü ma kiyang tsüya nu pathiden.

³⁶ Hi ssensitemithu nu aduwengthu lela pathidhale, hi Anyiza nkechünyi Filistin na hangkebenwa Anyiza süpahizi nyankenyen kebenwa ha miwi tsü makesü sa cüden.

³⁷ Apvüwa na ssensitemi nu aduwengthu pang wi hi hangsha cü; ma Filistin hawa kwen wi la hi hangsha cüaben.” Saul na luneng, “Isalethu walo, Apvüwa ya no ssiketenwa salo.”

³⁸ Ma ma ghighe pi David ya pvülo khuchi: lezza liwen kesü, nu aghighe gwomejuwa la pi David pvü thsü.

³⁹ David na Saul njünnu pi aghighe miwi chi pvüya nu alentsen wa nan ma kuli meyala, kepaghenanye ma kutila tsüthu pvü nketen ghena. Ma Saul wi khi, “Hi hathu ha pvü nu nyu ssisaya nben, kepaghenanye hi kutila ha pvü ntenle.” Tsalina ma tsüthu tsüdila khusha.

⁴⁰ Tsaseng wi ma khaghaneni kehie khhatssü khuya nu aghaku wi alon chengcheng kesa manga kessi pi ma jula wi chiya. Ma ala kidenya nu Goliath metule wa.

David na Goliath Chayakea

⁴¹ Filistinwa nu ma ghighe kepvüwa na ma tuwi alentsen sen manyi gweghe David kepeghe wiwa ghoden. Ma tetsaki pfüpfü gho,

⁴² nu ma gho mehaitsü David mukeya wi ma nankeqhe, kepaghenanye ma atsimehaitsü nu kepvüza nyi kesü.

⁴³ Ma David wi khi, “Akhhatssü tsüna mangwa ghena senten nu? No kemeshen hi affü kesü le ben kwe?” Isanu ma ma cenpvü wina kishen-keshi khie pi David miwi chi.

⁴⁴ Ma David wi khi, “Hewi gholo, hi nkamang pi awa nu aghangsathu dsa thsüaden.”

⁴⁵ David na luneng, “No njünnu, apie, nu akhhapvü sen nu hi ssikaghashen ghoden, isala hi no ma nyankenyen ketenwa Israel nyi süpahizithu Nyizawa, Apvüwa Kekhang ntsawa nyan wina no ssisale ghoben.

⁴⁶ Nansü hawi Apvüwa na no pi ikwen wi chicüaben; hi no chaya nu nli wiya cüden. Nu hi Filistin süpahithu kamang pi awa nu aghangsathu dsa thsüaden. Isalethu, ayyi maben wila Israel na Anyiza kesü benle kesa chüyaben,

⁴⁷ nu anyithu tsüdila Apvüwa na ma nyithu hangshayale kesa ghena njünnu nu apiethu nsenla mehaile kesa muyaben. Ma aghi wi khangkeyawa, nu ma nthu tsüdi pi ikhang kekhang kekhu wi chi cüaden.”

⁴⁸ Goliath na kheneng alentsen sen David kepeghe wiwa gho, nu David na wan bvü sen nu aghikesa pen wi Filistinwa ssisale wa.

⁴⁹ Ma kwen pi ajula wi alon kesü khushiya, nu ma ala tsü zankevüli pi Goliath kicen. Tsüna ma tie gü kicenkhhi pia, nu Goliath na ayyi wi nkhwendu khuliwa.

⁵⁰ Tsalina David na njünnu nsenla ala nu alon kesü sen nu Goliath chaya nu ma pathia!

⁵¹ Ma bvü wa Goliath miwi nganya nu Goliath licen wi njünnu khushi pi ma pathi nu ma li wiya. Filistinthu na mathu ghikekhangwa na shü kesa mukeya wi mathu na bvüzighe.

⁵² Israel nu Judah nyithu na maghala mathu jügü sen wa Gath nu Ekron kaghapeng jenkathu kecu wi chia. Filistinthu na mesa-mena pi Shaaraim na wala Gath nu Ekron kecu alenca chuli khulia.

⁵³ Israel nyithu na Filistinthu jügü wa nu kheneng gho mathu kemnanpen tsü shuya.

⁵⁴ David na Goliath li tsü khusen Jerusalem wi wa, isala Goliath ghighethu tsüpi ma nithsüjjen wi theng.

David na Saul tuwi kewa

⁵⁵ David na Goliath ssisale wa keten kemu wi Saul na ma süpahi benchüwa Abner wi keü, “Abner, ma thowa tsa nu?” Abner na luneng, “Njenkeben Kadimiwa, hi nchüle!”

⁵⁶ Saul na khi, “Isathu, wala ma thowa tsa khe chüyalo.”

⁵⁷ Tsalina David na Goliath pathi nu kemnanpen wi kegho neng wi Abner na ma ssinu Saul wi wa. David na khilila Goliath li tsü pvüden.

⁵⁸ Saul na ma wi keü, “Pvüzawa, no thowa tsa nu?” David na luneng, “Hi Betlehem wina keghowa nmaghawa Jesse tsa le!”