1 SAMUEL 16 - Kemethajüh (N) (Re-editing) Bible (BSI)

Adeli pi David Nyen pi Kadimiwa kesa thsü

¹ Apvüwa na Samuel wi khi, “No Saul ghena matsü khathula nhathana benten nu? Hi ma pi Israel kadimiwa nsa thsü mvuladha. Isala khili oliv deli pahan khuya nu Bethlehem wi anyi kesü ma nyan Jesse wi tsü walo, kepaghenanye hi ma tsa kesü pi kadimiwa sa thsüle kessiyadha.”

² Samuel na keü, “Hi khatinu tsüti saya mehai nu? Keujüla Saul na ha cüki zaya lethu ma hi pathia keben na!” Apvüwa na luneng, “No amesü zza kesü khuya nu tsüpi ahhansha kesü sapi ciwi Apvüwa kinyile sabenle khilo.

³ Jesse cipi ahhansha kesa witsü chilo, nu hi no mangwa nsathu yishü khe pi no kiza na. Hi anyi kesü pi no kekizawa tsü no adeli pi ma nyen pi kadimiwa sa thsüben na.”

⁴ Samuel na Apvüwa na ma salo kesa ti sa nu Betlehem wi wa, ciwi anyunuti wi ccülikesathu na gho kedheggüla ma metu nu keü, “No kemehaiwa ghena hewi ghoben ma?”

⁵ Ma luneng, “Anle, hi ahhansha kesü sapi Apvüwa kinyile kesa ghena ghoben. Nthu ketanla nthu satemethaya nu hi gweghe ghalo.” Ma Jesse nu ma tsathu la mathu ketanla mathu satemetha yalo kiza nu ma mathu cipi ahhansha kesa witsü chi.

⁶ Khathansha wi mathu na gho cuya khe, Samuel na Jesse tsa Eliab mukeya wi ma ketanla ma wi khi, “Anyi hewi Apvüwa tuwi ngan kebenwa ha ma kessiya kesawa tsü sabenla metsidha.”

⁷ Isala Apvüwa na ma wi khi, “Ma khüton kemehai nu ma tsikemehai tsü n-ghang lalo. Hi ma meya mvuladha, kepaghenanye hi anyi na ghan nan keten ti ghan nan nten. Anyi na amei wi matsi ghangden, isala Apvüwa tsü aleben wi ghangden.”

⁸ Tsaseng wi Jesse na ma tsa Abinadab ciya nu ma ssinu Samuel wi gho. Isala Samuel na khi, “Nyele, Apvüwa na ma la kessi meyale.”

⁹ Jesse na kheneng Shamma ssigho. Samuel na khi, “Nye, Apvüwa na ma la kessi meya.”

¹⁰ Jesse na hatinu ma tsa tagü tsüdila ssinu Samuel wi gho. Nu Samuel na ma wi khi, “Nyele, Apvüwa na hathu kesüla kessi meya.”

¹¹ Tsaseng wi ma Jesse wi keü, “No ntsa hewi tsü benla nmidha nu?” Jesse na luneng, “Hela ghanyi ntsawa na benle, isala ma khaghaneni hie wadha.” Samuel na khi, “Ma la hewi gholo kizalo; ma npi kegho chu ikhang na ahhansha sapi kinyi nten.”

¹² Tsalina Jesse na nyu kesun pi ma ci wa thsü. Ma atsimehai, kepvüza, nu agwo mehai, nu ma nyon kekü na jiketsü. Apvüwa na Samuel wi khi, “Anyi hawa hale — shagha nu adeli pi ma nyen cülo.”

¹³ Samuel na oliv deli khuya nu ma cünyuthu tuwi na pi David nyen cüa. Tsümeyi Apvüwa ghamu na David miwi dugho nu tsü ghanan nten na ma ssiben wa. Tsaseng wi Samuel na Ramah wi wha neng.

David na Saul Jühkaghakhipen wi Keben

¹⁴ Apvüwa ghamu na Saul teshia, nu Apvüwa na kesun kechi nkemehai ghamu na ma metenmesha wa.

¹⁵ Ma maghathu na ma wi khi, “Anyiza na kesun kechi nkemehai ghamu kesü tsüna no metenmesha ben kesa ikhang na chüben.

¹⁶ Tsalina kediwa, ahza pi ikhang cü nu ikhang ya anyi thowa na harp khouya mehai khe bha wa thsülo. Isanu khathansha wi nkemehai ghamu tsüna nmiwi gho khe, anyi tsüwa na ma harp khouchi lethu no mehai nengya shaben.”

¹⁷ Saul na mathu wi khi, “Anyi kesü na mehaitsü harp khouya kemehai bhaya nu ma ssinu hi wi gholo.”

¹⁸ Ma ketsikinathu kesü na ma wi khi, “Betlehem nyuti wi Jesse tsa kesü na akhwi kesachü kemehai nyi ben. Ma kempvüza nyi nu kepvüza kesü, süpahi kemehai, nu ajühkekhi chü nyi kesü. Apvüwa na ma ssitenle.”

¹⁹ Tsalina Saul na nyilothu kesun pi Jesse wi chi nu khi, “Ntsa David khaghaneni hie ketenwa tsü kesun pi hi wi chilo.”

²⁰ Jesse na aneni zza kesü, amesa nu kisengtssü pi akhüti kesü pongti chi pi gada kesü khhi sapi David gweghe Saul wi kesun chia.

²¹ David na Saul wi gho nu ma kekuli sa wa. Saul na ma nen ntsawa sa nu ma kessi pi ma ghighe kepvüwa sa thsüa.

²² Tsaseng wi Saul na ketsijüh kesü kesun pi Jesse wi chi: “Hi David nen benle. Ma ya hewi ben nu hi kekuli sa thsülo.”

²³ Tsü nten na khathansha wi Anyiza na kesun kechi nkemehai ghamuwa tsüna Saul miwi gho khe, David na ma harp khuya nu tsü khouden. Isalethu, nkemehai ghamu na teshi bvüa, nu Saul na mehai pfüpfü wa mehai nengyaden.