1 SAMUEL 15 - Kemethajüh (N) (Re-editing) Bible (BSI)

Amalek nyithu Ssinu Aghikesa

¹ Samuel na Saul wi khi, “Apvüwa na kesun chi nu adeli pi no nyen pi ma nyi Israel kadimiwa kesa thsüwa tsüna hi le. Khili Apvüwa Kekhang ntsawa na mangwale khiben khe kina chilo.

² Ma kemeten pi Amalek nyithu cüden, kepaghenanye mathu bamyithu na Israel nyithu na Ejipt wina shhugho keten wi mathu matang.

³ Wala Amalek nyithu ssisa nu mathu keben tsüdila yasa pi cülo. Mangla nheila; anyi npvüza, nza, ghanyi nu memethu tsüdila, amesüsi, khaghaneni, sunsiesa, nu gadathu mabenla pathilo.”

⁴ Saul na ma nyithu cighu pi Telem wi chi nu mathu si nan wa süpahithu 200,000 na Israel wina nu 10,000 na Judah wina shhugho.

⁵ Tsaseng wi Saul nu ma nyithu na Amalek nyunutiwa wi wa nu aghaku ghüsa keqha wi aghiceng nu hieben.

⁶ Ma kekitsan kesü kesun pi Ken nyi kheni mathu bamyithu na Israel nyithu na Ejipt wina shhugho keten tizenchi kecüthu wi chi, “Amalek nyithu tsü teshi nu bvülo, nthu na mathu gweghe nshüle kesalina.” Tsalina Ken nyithu na bvüa.

⁷ Saul na Havila wina wala Ejipt na nishuwa Shur kecu Amalek nyithu ssisa nu mathu chaya.

⁸ Ma Amalek kadimiwa Agag ma kahang ghanya nu anyi kepa wi tsüdi pathia.

⁹ Isala Saul nu ma nyithu na Agag npathi nu khaghaneni, amesüsi, amesü zza nu khaghaneni zza kemehai ntsathu nyelela atsanqaithu heiya; mathu na nsenla kemehai nu ma men nkemithu tsüdila yasa.

Saul pi Kadimiwa nsa thsü mvulakea

¹⁰ Apvüwa na Samuel wi khi,

¹¹ “Hi Saul pi kadimiwa sa thsü kesalina aleben naa ben; ma hi wina bvü nu iyenkhukechiwa tsü n-nieladha.” Samuel na ma ghepvü, nu ma aghaja thangthang Apvüwa wi khie.

¹² Tsü dhitsüwa wi ma ghanen mitu na shagha nu Saul bha wa. Saul na Karmel nyuti wi wa ma ghena apenkezhü kesü saya theng nu Gilgal wi wadhale kesa ma zaya.

¹³ Samuel na Saul wi wa, nu Saul na ma wi khi, “Samuel, Apvüwa na sawegü pi no kecüwa salo! Hi Apvüwa jühkhukechi tsü sadhale.”

¹⁴ Samuel na keü, “Isalethu, khati kesa na hi amesüsi nu khaghaneni kekhou hhai zayaben nu?”

¹⁵ Saul na luneng, “Inyithu na Amalek nyithu wi tsüthu sengho le. Mathu na tsüthu pi ahhansha sapi Apvüwa n-Nyiza cüle kesalina amesüsi nu khaghaneni kemehai ntsathu khuya nu kepa wi tsü yasatha sadha le.”

¹⁶ Samuel na khi, “Ceen benlo; khija Apvüwa na mangwale hi kiza khe pi no kizaden.” Saul na khi, “Pi hi kizalo.”

¹⁷ Samuel na luneng, “No ketanla no pi ma men nkemi sa lela, no Israel mizzathu ccülikesawa. Apvüwa na adeli pi no nyen pi Israel kadimiwa sa thsü theng;

¹⁸ nu ma ahza pi no cü nu wala Amalek nyi gheshighenathu tsü yasalo kesunchi. No mathu tsüdi npi pathikhikeya chu mathu ssisalo kesa ma no kizadha.

¹⁹ Isalethu, no mangkesa na ma jüh nkinala nu? No mangkesa na kaghajila nyu ji shukeya tsü khuya, nu Apvüwa nkenen tsü saten nu?”

²⁰ Saul na khineng, “Hi Apvüwa jüh kinadha le. Hi kadimiwa Agag ssinu gho, nu Amalek nyithu tsüdila pathia.

²¹ Isala inyithu na mathu ghankeya amesüsi nu khaghaneni kemehai ntsathu tsü npathila; mathu na tsüthu pi ahhansha sapi Apvüwa n-Nyiza cüle kesalina sen nu hewi Gilgal wi gho le.”

²² Samuel na khi, “Mecang pi kinyi nu ahhansha kesawa la ajühkeyawa Apvüwa na manyi khawa nen nu? Khaghaneni kemehai ntsathu pi ma wi ahhansha sa kechi miwi ma jühkeyawa mehai le.

²³ Ma kematang kekuli tsüna kedema ti nmehai nu kinankeli tsüna atsikezhü kekinyi kesami tile. No Apvüwa jühkhukechi tsü meya mvula kesalina ma la no pi kadimiwa kesa tsü meya mvuladha.”

²⁴ Saul na khineng, “Anle, hi samidha le. Hi Apvüwa yenkhukechi nu no kecükegwethu tsü nkinaladha. Hi inyithu messi kesalina mathu jüh kinale.

²⁵ Isala hi khili no wi khieben, hi kesami teshi cü nu hi gweghe Gilgal wi wa nenglo, isanu hi ya Apvüwa kinyiya thsülo.”

²⁶ Samuel na luneng, “Hi no gweghe wa neng ntendha. Kepaghenanye no Apvüwa jühkhukechi tsü meya mvula, nu ma la no Israel kadimiwa kesa tsü meya mvuladha.”

²⁷ Isanu Samuel na khapeghe sen nu bvüden, isala Saul na gho ma gwomejuwa zanya nu tsü zanqhea.

²⁸ Samuel na ma wi khi, “Apvüwa na nansü no wina Israel kadiyyiwa tsü pakhhi senbvü nu tsüpi anyi kesü nmiwi kemehaikiwa tsü cüdha.

²⁹ Israel Nyiza ajenkebenwa na milimesa nyelela ma kemeshen kemili nten. Ma anyi kesü ti nye — ma kemeshen kemili nten.”

³⁰ Saul na khineng, “Hi samidha le. Isala khili ccülikesathu nu Israel nyithu tuwi hi nyuwakü nu hi gweghe walo, isanu hi ya Apvüwa n-Nyiza kinyiya thsülo.”

³¹ Tsalina Samuel na ma gweghe Gilgal wi wa, nu Saul na Apvüwa kinyi.

³² Tsaseng wi Samuel na khi, “Kadimiwa Agag ssinu he hi wi gholo.” Agag na messi pi kedheggüla ma wi gho nu ma ketanla hati meshen, “Ighena keshü ha khatila nmehaidhanu!”

³³ Samuel na khi, “No njünnu pi ajja kejon sapi atsanga nmi thsüla kesa ti njja la khili atsanga nmila thsüa tendha.” Isanu ma Gilgal wi kekinyipen tuwi na Agag süthisüghe.

³⁴ Tsaseng wi Samuel na Ramah wi wa, nu kadimiwa Saul na Gibea wi ma jjen wi wha.

³⁵ Samuel na ma hangkeben chu kadimiwa nmetula; isala ma ghena leben güccü. Apvüwa na ma Saul pi Israel kadimiwa kesa thsü ghena ma leben naa wa.