1 SAMUEL 11 - Kemethajüh (N) (Re-editing) Bible (BSI)

Saul na Ammon nyithu Chayakea

¹ Asha kesü seng wi Ammon kadimiwa Nahash na ma süpahizi ssigho Gilead yyi wi Jabesh nyutiwa ssikaghashen nu tsü vüya. Jabesh nyithu na Nahash wi khi, “Ithu gweghe keponghu kesü salo, nu no pi ithu miwi kekhang kesenwa sa thsüa na.”

² Nahash na luneng, “Hi ajjügi kesü miwi na nthu ssinu keponghu saden; hi anyi tsüdi nyon ajewa khushi pi nu kejüghekeya sengho Israel miwi chiaden.”

³ Jebesh nyi ccülikesathu na khi, “Ithu na nyilothu kesun pi Israel yyi maben wi chiten na ghanan tagü pi ithu cülo. Keujüla anyi kesüla ithu kekashakeya nmila lethu, ithu na nkwen wi duaben.”

⁴ Nyilothu na gho Saul kahang pen wi Gibea cuya, nu mathu na jühtheü tsüpi khi kechi wi anyithu na ahathakina wi magha qai wa.

⁵ Saul na alli wina ma mesü süponthu ssinu ghoden, nu ma keü, “Mangwa sazzi theng nu? Mangkesa na anyi tsüdi qaiben nu?” Mathu na Jabesh wi nyilothu na mangwale khi khe pi ma kiza.

⁶ Saul na tsü zakeya wi Anyiza ghamu na ma miwi dugho nu ma lebentsu ntsa shagha.

⁷ Ma amesü süpon keni khuya nu tsü hazighe, nu nyilothu ya tsüthu pvü wa Israel yyi maben wi wa kekitsan ha sa: “Anyi thowa na aghi wi Saul nu Samuel manyi n-nie khe ma mesü süpon miwi hati saben!” Israel nyi tsüdila Apvüwa na sa keben tsü messi, nu mathu tsüdila, thola nteshila, shhughola saghuya.

⁸ Saul na mathu pi Bezek wi saghuya, ciwi Israel nyi 3,00,000, nu Judah nyi 30,000, na ben.

⁹ Mathu na Jabesh wi nyilothu kiza, “Nthu nyithu wi dhitsü ghanan lapvü npi kesa wi mathu kekashaya benle kizalo.” Jebesh wi anyithu na ketsijüh ha mukeya wi mathu nonghe ntsa saya,

¹⁰ nu Nahash wi khi, “Dhitsü wi ithu na nkwen wi duaden, nu no ithu miwi mangwa samvu khe saya mehaile!”

¹¹ Dhitsüwa wi Saul na mitu na ma nyithu gishü pi akhang kecheng saya, nu thangtheghi wi mathu na kejügüli sen aghinyithu kemnanpen wi wa Ammon nyithu ssikaghashen. Ghanan lapvü wi mathu na Ammon nyithu süthikhiya. Hang keyathu na kesüsü bvüzighe shan.

¹² Tsaseng wi Israel nyithu na Samuel wi khi, “Saul pi ithu kadimiwa sa thsü ntenle kekhi anyithu tsüna khiewa ben nu? Mathu pi ithu cülo ithu na mathu pathiaten le.”

¹³ Isala Saul na khi, “Nansü anyi thola pi shü thsü nben, kepaghenanye nansü hawa wi ha Apvüwa na Israel kekasha yadha.”

¹⁴ Nu Samuel na mathu wi khi, “Ithu tsüdi Gilgal wi wa nu kheneng Saul pi ithu kadimiwa le thangchi na.”

¹⁵ Tsalina mathu tsüdila Gilgal wi wa, nu ciwi kemetha pen wi mathu na Saul pi kadimiwa le thangchia. Mathu na Apvüwa tuwi kecca ghena kekinyi sachi, nu ciwi Saul nu Israel nyi tsüdila tsü ghena kemini sa.