1 SAMUEL 10 - Kemethajüh (N) (Re-editing) Bible (BSI)

¹ Tsaseng wi Samuel na oliv deli hikhu kesü khuya nu tsüpi Saul li miwi zügü, ma kimang nu khi, “Apvüwa na no ma nyi Israel miwi kekhang kesenwa sa thsüle adeli pi no nyenben. No ma nyithu miwi kekhang sen nu mathu ghinyithu tsüdi tuwi mathu khweben. Apvüwa na no kessi pi ma nyithu miwi kekhang kesenwa sa thsüdha kesa hawa ha nghena azensu saben:

² No nansü hi teshi nu bvü lethu, Benjamin yyi wi Zelza wi Rachel shüjjen kete wi meshu keni metu yaben. Manyi na no gadathu bha ketenthu tsü muyadha le kesa no kizaben, tsalina nba na tsüthu ghena nyela nshinyi ghena leben güccü nu khiben, ‘Hi itsawa ghena khati sadha nu?’

³ No ciwi na wa nu Tabor wi achanton kemethawa wi ghoyaben; ciwi meshu kecheng na ahhansha sapi Anyiza cüle Bethel wi wa ketenlen wi no metu yaben. Mathu meshu kesü na aneni zza kecheng ssisen, kesü na amesa be kecheng pvüden, nu kepawa na akhüti kesü wi kisengtssü pi pong pvüden.

⁴ Mathu na gho no shalom sa nu amesa be keni pi no cüben, nu no tsü khuyaben.

⁵ Tsaseng wi no Anyiza yyishiphon Gibea wi Filistinthu kemnanpen kesü sa keben witsü waben. Anyunutiwa kedulen wi no atusenjüh-kechüthu akhang kesü na yyishiphon miwi kekinyipen wina harp, lalali, lair khou, nu apha kihhe sen nu dugho keten no metuben. Mathu na nashü nu atusenjüh-khi ben.

⁶ Apvüwa ghamu na zuli nmiwi gho nu no la mathu gweghe nashü nu atusenjüh-khi, nu anyi makepa kesa kesü saben.

⁷ Khathansha nmiwi hathu ha sa khe, Anyiza na no ssinu mangwa sale ben khe tsü salo.

⁸ No itu wina Gilgal wi waben, hi ciwi gho no metu nu mecang pi kekinyi nu kecca ghena kekinyi saben. Ciwi hi ghola no mangwa saten khe npi kekiza chu ghanan tagü hi hieben lalo.”

⁹ Saul na Samuel teshi nu bvüketen wi Anyiza na aleben ketheü pi Saul cü. Nu Samuel na ma kekiza tsüdila tsü ghanan sacen.

¹⁰ Saul nu ma maghawa manyi na wa Gibea cukeya wi atusenjüh-kechüthu akhang kesü na gho ma metu. Anyiza ghamu kekhang na zuli ma miwi gho nu ma mathu jawi nashü nu atusenjüh-khi.

¹¹ Anyi hatu wi ma chü kebenthu na ma hati sa keben kemu wi khokho wi khi, “Kish tsawa miwi ha mangwa sa bendha nu? Saul la atusenjüh-kechü kesü sadha kwe?”

¹² Anyi kesü ciwi hang ketenwa na keü, “Atusenjüh-kechü kepathu tsü khati nu — mathu bathu na thowa le meshen ben nu?” Hatinu khiketenwa ha shhugho, “Saul la atusenjüh-kechü kesü sadha kwe?”

¹³ Saul na atusenjüh kekhi tsü sacen theng nu yyishiphon wi kekinyipen wi wa.

¹⁴ Saul biza na ma nu ma maghawa manyi metuya nu manyi wi keü, “Nshinyi na khiewa wa nu?” Saul na khineng, “Gadathu bha wale, nu ishinyi na tsüthu mu meyala nu Samuel metu chile wale.”

¹⁵ Saul biza na keü, “Ma mangwale nshinyi kiza nu?”

¹⁶ Saul na luneng, “Ma asahangthu tsü muyadha le kesa ishinyi kiza.” Isala ma Samuel na ma kadimiwa sa keten cüki kekhi tsü mangla pi ma biza nkiza.

Saul Na Kadimiwa le Khishikechi

¹⁷ Samuel na anyithu cighu pi Mizpah wi Apvüwa tuwi chi,

¹⁸ nu ma mathu wi khi, “Apvüwa Israel Nyizawa na khiben, ‘Hi Ejipt nyithu nu anyi kepathu tsüdi na nthu metenmesha keben wi nthu kekashaya nu Ejipt wina nthu ssishhugho.

¹⁹ Hi nthu Nyiza, nthu gükeccü nu ketizenkesa tsüdi wi nthu kekasha kecüwa tsüle, isala nthu na hi meya mvula nu hi wi kadimiwa kesü pi nthu cülo khie. Tsüna mehaitha, isalethu nthu na amizza mizza nu agei gei sala Apvüwa tuwi saghu yalo.’ ”

²⁰ Tsaseng wi Samuel na amizza kesüsü ya atuwi shhugho thsü, nu Apvüwa na Benjamin mizza khuthiya.

²¹ Samuel na Benjamin mizza wi atheghithu ya atuwi shhugho thsü, nu Matri theghi tsü khuthiya. Tsaseng wi Matri theghi wi anyithu ya atuwi shhugho thsü, nu Kish tsawa Saul khuthiya. Mathu na ma bha lela ma mu meyala.

²² Tsalina mathu na Apvüwa wi keü, “Anyi tsüwa na hewi ghola nu?” Apvüwa na luneng, “Saul na ciwi atsanqaithu jawi kuthi benle.”

²³ Tsalina mathu bvü wa Saul ssinu anyithu jawi gho, nu mathu na ma adepfü nten na meiwa nyu miwi sieki kesa muya.

²⁴ Samuel na anyithu wi khi, “Apvüwa na kessiya kesawa anyi tsüna hale! Ithu jawi thola ma ti kesa nmi.” Anyi tsüdila jishala, “Kadimiwa kesie kahangwa salo! khi.”

²⁵ Tsaseng wi Samuel na kadimiwa kesau nu kekulithu khimetha pi anyithu kiza, nu tsüthu pi lesüshen wi zhü pi Apvüwa tuwi chia. Isanu ma anyi tsüdila kesun pi ajjen wi wha thsüa.

²⁶ Saul la ma jjen wi Gibea wi wha neng. Anyiza na mathu leben kidhen kechi anyi kekhang ntsathu pahan na ma gweghe wha.

²⁷ Isala anyi ma men nkemithu na khi, “Anyi hawa ha khatinu ithu ghena kemehai mangwa saya mehai nu?” Mathu na Saul nkhichi nu ajuthu mangla sengho ma ncü.