1 SAMUEL 1 - Kemethajüh (N) (Re-editing) Bible (BSI)

Shilo wi Elkana nu Ma Theghe

¹ Efraim mizza wi anyi kesü ma nyan Elkana na Efraim yyishiphon diyyiwa wi Ramah nyuti wi hang. Ma Zuf gei pahan wi Tohu theghi wi Elihu tsawa Jeroham tsa.

² Elkana na awubvü Hannah nu Peninna manyi ben. Peninna na atsanga ben, isala Hannah na atsa nmi.

³ Amapi kaghapengla Elkana na Ramah wina Shilo wi Eli tsa Hofni nu Fineha manyi na Apvüwa keqhaikedithu sa keben wi wala kinyi nu ahhanshathu sapi Apvüwa Kekhangkedi ntsawa cüden.

⁴ Elkana na ma hhansha kesa kaghapeng asa ashei kesü pi Peninna nu ashei kesü pi ma tsanga kesüsü cüden.

⁵ Elkana na Hannah nen ntsawa lela ashei kesütan pi ma cüden, kepaghenanye Apvüwa na ma ya atsanga nmu thsü.

⁶ Peninna, Hannah nankemeghüwa na ma nkhichi nu ma metsimeni sa, kepaghenanye Apvüwa na ma pi atsanga nmila thsüa.

⁷ Amapi kejon hati sa wa; khathansha wi mathu gweghe Apvüwa jjen wi wa khe Peninna na Hannah leben sameshü ntsa sacü nu ma qai nu mangla ndsa mvu laden.

⁸ Ma wuba Elkana na ma wi keü, “Hannah no mangkesa na qaiben nu? No mangkesa na ndsajjü mvu- laben nu? No mangkesa na keshüthangla ahathanathi benten nu? Ntuwi atsa tagha miwi hiwa ma men nbenki kwe?”

Hannah nu Eli

^9-10 Matsü kesü wi mathu na Shilo wi Apvüwa jjen wi dsajjü keya seng wi Hannah na shagha. Ma hathana ntsa sa nu Apvüwa wi kekhie kesa wi qai ntsa sa. Tsü tsüwi Eli keqhaikediwa na ma pen wi ajenka kete wi donkiben.

¹¹ Hannah na Apvüwa wi kekishen kesü sa nu khi: “Apvüwa Kekhangkedi ntsawa, hi nmaghale, hi ghangchilo! Igükeccü ha ghangchi nu hi meshen chilo! Hi nmali lalo! Keujüla no atsa kesü pi hi cü lethu, hi ma kahang chuli ghena satemetha pi no cü nu ma khiela ma lissen ca nben

¹² Hannah na matsü kesie Apvüwa wi kekhie sa, nu Eli na ma pang ghang ben.

¹³ Ma nkhishila kekhie saben; ma pang na kuliben isala ahhai nsashi. Tsalina Eli na ma adina pvü benle meshen,

¹⁴ nu ma nzawa wi khi, “No adikina kekuli tsü nsala yilo! Njjü layilo nu metsa shagha yilo!”

¹⁵ Nzawa na luneng, “Nyele, kediwa, hi adina nbenle. Hi azü jjü nghole! Hi ihathana ntsa nu igükeccü tsüdi khishü pi Apvüwa wi kekhie saben.

¹⁶ Hi pi nza ma men nkemi kesüle nmeshen lalo. Hi ketizensa ntsa kesalina hi hati kekhie saben tenle!”

¹⁷ Eli na khi, “Nlebencca whalo, nu Israel Nyizawa ya no kekhiewa tsü sapi no kecüwa salo.”

¹⁸ Nzawa na luneng, “No keshüthangla hi meshen keyawa salo.” Tsaseng wi ma wala kedsakejjü pahan dsaya, nu ma mmi mezashu khe ahathanathi nsala.

Samuel Pvüghaya nu Satemethachi

¹⁹ Ghanenwa Elkana nu ma theghi na mitu na shagha nu Apvüwa kekinyi seng wi mathu na Ramah wi mathu jjen wi whaneng. Elkana na ma wubvü Hannah gweghe, nu Apvüwa na ma kekhie sacü.

²⁰ Tsalina ma atsa-npvüya nu atsa kesü pvüghaya. Ma ma nyan pi Samuel ci, nu ma jjügi khi, “Hi Apvüwa wi ma khiekeya.”

²¹ Elkana nu ma theghi ghena amapi kaghapeng wa ahhansha sapi Apvüwa cü keten tsüwa na gho neng, nu ma ahhansha kemehai ntsa sale khishia.

²² Isala matsü hawa wi Hannah na nwa. Ma ma wuba wi kiza, “Atsawa ha mechan-metsa shaghaya meyi hi ma ssinu Apvüwa jjen wi waden, nu ma kahang chu ciwi ben waben.”

²³ Elkana luneng, “Anlo, no mangwa na mehai khe tsü saya; no ma noncca pi npi zügü keshagha chu ajjen wi benla. Nu Apvüwa na no khishikechi tsü sacen keccüwa salo.” Tsalina Hannah na ajjen wi ben nu ma tsa tsü noncca wa.

²⁴ Ma atsawa tsü noncca pi mechan-metsa keshagha seng wi ma ssisen, amesü süpon amapi kecheng ji kesü awheng kilogram tagha, nu kisengtssü pi akhüti kesü pongti chiya nu Shilo wi wa. Ma Samuel na ghanyi keben tsü ssinu Shilo wi Apvüwa jjen wi wa.

²⁵ Mathu na amesü süpon kepathi seng wi, mathu na atsawa tsü ssinu Eli wi wa.

²⁶ Hannah na ma wi khi, “Kediwa, hi kesami teshi cülo, no hi chüben ma? Hi hawi ngan nu Apvüwa wi khie keben no kemu nzawa tsüle.

²⁷ Hi ma wi atsa ha ghena khie, nu ma hi mangwa khie khe sapi hi cüdha le.

²⁸ Tsalina hi ma satemetha pi Apvüwa wi chiben. Ma hang keben chu ma Apvüwa ji saden.” Tsaseng wi mathu na ciwi Apvüwa kinyi.