1 PITOR 1 - Kemethajüh (N) (Re-editing) Bible (BSI)

¹ Jisu Khrista apostel Pitor na pila Anyiza na kessikeya nyithu na bvüzighe sen nu Ponta, Galatia, Kappadosia, Asia, nu Bithunia yyi wi kebenthu kecü.

² Jisu Khrista jühkina nu ma jjü pi satemethaya thsüle kesalina Anyiza Abawa kemeshen wina nthu kessiya nu ma Ghamu na nthu sa pi kemetha nyi saya thsüdha. Nanketizen nu kecca ya nthu ji sa ntsa sa keyawa salo.

Kahang Kaghang kesü

³ Ithu nkesengcha sa pi Anyiza nu ithu Pvüwa Jisu Khrista Bawa cü nalo! Ma nanketizen kedi ntsa ghena keshü wina Jisu Khrista sa pi hangneng cü nu kahang ketheü pi ithu cüdha. Hana kahang kaghang kesü pi ithu pong cü,

⁴ tsalina ithu na Anyiza na kesawegüthu pi ma nyithu ghena theng kethengthu tsü yaya thsüle ghang benden. Ma tsüthu pi bighe, yasa, nyelela jüwa nkeya pen tang wi nthu ghena theng.

⁵ Tsüthu tsü nthu ghena, kenondi wina Anyiza kekhang ghena hangshakeya tsü pi matsü sakhen wi pi ccücale kiden yadha.

⁶ He wi matsü keujü ha agükeccü kejon ghena khili nthu ketizen sa lela nthu anonghe ntsa sa benlo.

⁷ Tsüna nthu kenondi tsü atsentsawa chüyale kesalina anni pi mecang lela mehai pfüpfü sa ketenwa suna miwi ma men benki kesa nthu kenondiwa tsü ya benya thsüle kesalina ghan-nan ben. Isanu Jisu Khrista pi ccücakechi tsathang wi nthu na keseng, anyankethang, nu kinyikü tsü muyaben.

⁸ Nthu na ma npi mu lela ma tizenden, nu nthu na khili ma nmu lela ma nondi keben ghena nthu nonkeghe na khi mekeyakhi sa benden,

⁹ kepaghenanye nthu na ma kenondi ghena nthu ghamu hangshakeya muya ben.

¹⁰ Hangshakeya ha ghena atusenjüh-kechüthu na kiden-keshala tsü bhashiya le sa, nu mathu na Anyiza na pi nthu cü keten nanketizenwa cüki ha khi.

¹¹ Mathu na matsü khati kesa wi nu khati sa ghoben khe tsü chüya le bha. Hawa ha Khrista Ghamu na mathu miwi ben nu npi wina Khrista ketizen kesa nu anyankethang muya keten cüki tsü khi.

¹² Atusenjüh-kechüthu kekuli tsüna mathu ghena kekiyi nyela nthu ghena le kesa Anyiza na pi mathu ccüca, mathu na tsüthu cüki kekhi ti nthu na khili nyilothu na tang wi kesun kechi Kemetha Ghamu kekhang wina Jühtheü Kemehaiwa kekhi wi zayadha. Tangnyilothu lela pala hathu ha chüshiya mvuthi saden.

Kemetha wi Hanglo Keci

¹³ Tsalina nthu leben wi kulile kesa ghena kidenyalo. Meghe-metsa nu nthu kaghang tsüdi pi Jisu Khrista pi ccüca kechi wi kemihhi pi nthu cü ketenthu tsü miwi chiyalo.

¹⁴ Anyiza jühkina, nu kheni kuti tsü wi nthu nkechü ghena kesa mvu sa keghothu tsü ya nthu kahang meyasa thsüla.

¹⁵ Tsüti kesawa nye, nthu ci keyawa Anyiza na metha kesa tsüti nthu kekuli tsüdi wi metha yalo.

¹⁶ Ntsawajüh na khiben, “Hi metha kesa ghena nthu la metha benlo.”

¹⁷ Anyi nankepapa nsala tsüdi kekuli qei wina ghan-nan ketenwa Anyiza wi kekhie wi nthu na ma pi Aba ciden; tsalina nthu ayyi he wi keben chu ma kinyikü nu hanglo.

¹⁸ Kepaghenanye nthu bamyithu kahang yen ma men nkemi wi tsüna mang pi nthu hangshaya khe nthu na chüben. Tsüna pala yasa ya kemehai ji rükatssü nyelela suna nye;

¹⁹ isala tsüna khaghanenizza kinaqhe nyelela nyu ghojünkeya mangla nkemi ti kesa Khrista pi ahhansha kesa jjü men kedhuwa tsü.

²⁰ Ayyi npi sahangkechi wina Anyiza na ma kessiyadha nu nthu ghena asakhen tsathang wi ma sa pi nyu ccücachi.

²¹ Ma wina nthu na Anyiza keshü wina ma sa pi hang cü nu anyankethang pi ma kecüwa tsü nondiben; tsalina nthu kenondi nu kaghang tsüdi Anyiza miwi ben.

²² Nthu na khili atsentsawa tsü kenie ghena nthu ketanla nthu satemethadha nu leben tsentsa sa nthu pvüshang kenondithu tizenden, nthu leben tsüdi sen nu khokho ketizenli tsentsa sa tenlo.

²³ Kepaghenanye nthu na dediya kemehai wi nyela dediya nkeben Anyiza jüh hang keben nu anuphan ben keten tsü wina pvügha ketheü sayadha.

²⁴ Ntsawajüh na khiben, “Anyi kahang tsüdila aghangwa ti kesa, nu mathu nyankethang tsüna athighithu ti kesa. aghangwa na jüwa, nu athighithu na qancaden,

²⁵ isala Apvüwa jüh tsü anuphanla benden.” Ajüh pi nthu wi kekiza tsüna Jühtheü Kemehaiwa.