1 KHENICÜKI 4 - Kemethajüh (N) (Re-editing) Bible (BSI)

Judah Shicübvüghathu

¹ Hathu hana Judah shicübvüghathu pahan: Perez, Hezron, Karmi, Hur, nu Shobal.

² Shobal tsa Reaiya, ma tsa Jahath, ma tsa Ahumai nu Lahad, manyi na anyi Zorah wi kahangthu baqhai.

^3-4 Hur na ma ba Kaleb wubvü Efrath tsa tssütsewa, nu ma shicübvüghathu na Bethlehem nyunuti tsü sachi. Hur na atsa kecheng ben: Etam, Penuel, nu Ezer. Etam na atsa kecheng ben: Jezreel, Ishma, nu Idbash. nu anga kesü ma nyan Hezzelelponi. Penuel na Gedor nyunuti nu Ezer na Hushan nyunuti sachi.

⁵ Asshur, Tekoa nyuti sa kechiwa na awubvü keni, Hela nu Naarah ben.

⁶ Naarah manyi na atsa mejü ben: Ahuzzam, Hefer, Temeni, nu Haahashtari.

⁷ Asshur nu Hela manyi na atsa kecheng ben: Zereth, Izhar, nu Ethnan.

⁸ Koz na Anub nu Zobeba manyi ba, nu Harum tsa Aharhel shicübvügha geithu baqhaiwa.

⁹ Ciwi anyi nyan kesü Jabez, ma theghi jawi nyu ma nyuwakü ntsa kesa na ben. Ma jja na ma nyan pi Jabez ci, kepaghenanye agüccü ntsa nu ma pvüghaya kesalina.

¹⁰ Isala Jabez na Israel Nyiza wi hati kekhie sa, “Anyiza, sawegü pi hi cü nu ayyi kejon pi hi cülo. Hi ssiden nu nkemehai na hi sapi agüccü thsüa kesa tsüdi wi hi nonccayalo.” Nu Anyiza na ma mangwa ghena khie khe sapi ma cüa.

Atheghi Kepathu

¹¹ Kaleb cünyuwa Shuha na atsa kesü Mehir ben. Mehir na Eshton ba,

¹² ma atsa kecheng ben: Bethrafa, Paseya, nu Tehinna. Tehinna na Nahash nyunuti sa kechiwa. Anyi hathu shicübvüghathu na Reka wi hang.

¹³ Kenaz na atsa keni— Otnniel nu Serahiya ben. Otnniel la atsa keni Hathath nu Meonothai ben.

¹⁴ Meonothai na Ofra ba, Serahiya na Joab ba, ma Kepachünyi Yyiketijü wi anyi tsüdila sapichüthu kahang pen bha kechiwa tsü.

¹⁵ Jefunne tsawa Kaleb na atsa kecheng ben: Iru, Ela, nu Naam. Nu Ela na Kenaz ba.

¹⁶ Jehallel na atsa mejü ben: Zif, Zifa, Tiria, nu Asarel.

^17-18 Ezra na atsa mejü ben: Jether, Mered, Efer, nu Jalon. Mered na Ejipt kadimiwa nga Bithial yaya nu manyi na anga kesü Miriam, nu atsa keni— Shammai nu Ishba ben. Ishba na Eshtemoa nyuti tsü sachi. Mered la Judah mizza wi nza kesü yaya nu manyi na atsa kecheng ben: Jered, Gedor, nyuti sa kechiwa; Heber, Soko nyuti sa kechiwa; nu Jekuthiel, Zanoa nyuti sa kechiwa.

¹⁹ Hodia na Naham tssüggüwa yaya. Manyi shicübvüghathu na Keila nyuti wi kahang Garm gei tsü bhachi, nu Eshtemoa nyuti wi kahang Maakath gei tsü bhachi.

²⁰ Shimon na atsa mejü ben: Amnon, Rinna, Benhanan, nu Tilon. Ishi na atsa keni ben: Zoheth nu Benzoheth.

Shela Shicübvüghathu

²¹ Shela na Judah tsa kesü. Ma shicübvüghathu na Er, Leka nyuti sa kechiwa; Laada, Maresha nyuti sa kechiwa; Beth Ashbea nyuti wi hang keten linen de keten geithu;

²² Jokim nu Kozeba nyuti wi hang keten anyithu; nu Joahsh nu Saraf, Moab nyi nzathu yayanu Bethlehem wi hangwa. (Hathu kahangyen na ghawen ntsa sadha.)

²³ Mathu na Netaim nu Gedera nyutithu wi hang nu kadimiwa kekuli sala apfüthu zhüden.

Simeon Shicübvüghathu

²⁴ Simeon na atsa manga ben: Nemuel, Jamin, Jarid, Zera, nu Shaul.

²⁵ Shaul tsa na Shallum, ma tsa na Mibsam, ma tsa na Mishma.

²⁶ Tsaseng wi Mishma wina Hammuel, Zakkur, nu Shimei miwi ashicübvügha sagho.

²⁷ Shimei na atsa tagha nu tugho nu anga tugho ben, isala ma shilithu na atsangathu zeng, nu Simeon mizza na Judah mizza ti jikayi nsa.

²⁸ Simeon shicübvüghathu na wala Kadimi David tsü kecu anyuti hathu wi hang: Beersheba, Molada, Hazarshual,

²⁹ Bilha, Ezem, Tolad,

³⁰ Bethuel, Horma, Ziglak,

³¹ Beth Markaboth, Hazarsusim, Bethbiri, nu Shaaraim.

³² Mathu na apen kepa manga wila hang: Etam, Ain, Rimmon, Tokhen, nu Ashan,

³³ nu tsü kevü anyutithu wi wala acüla-niduwa Baalath nyuti kecu. Hathu hana mathu na mathu theghithu nu mathu kahang penthu zhüpi ketheng.

^34-38 Anyi hathu hana mathu gei wi accülikesathu: Meshoba, Jamlekh, Amaziya tsa, Joel, Jehu (Joshibia tsawa, Seriya tsawa, Asiel tsawa), Elioenai, Jaakoba, Jeshohaiya, Asaiya, Adiel, Jesimiel, Benaiya, Ziza (Shifi, tsawa, Allon tsawa, Jedaiya shicübvügha kesü, Shimri, nu Shemaiya). Mathu theghithu na jikayi kesalina

³⁹ mathu na bvüzighe sen wa niduwa Gerar kecu pong nu mathu khaghanenithu na wala nishuwa yyiketijü wi anyutiwa kecu witsü atsseya.

⁴⁰ Mathu na ciwi ayyikecca, amou kemehai, kemeza, nu ceen kesapen kejonla muya. Anyi kheni ciwi hang keghothu na Ham nyithu.

⁴¹ Judah Kadimi Hezekiya tsüwi anyi nyan zhü ketheng hathu na Gerar wi wa anyi ciwi hang kebenthu nithsüjjen nu ajjenthu tsü yasa pia. Mathu na anyithu tsü jügüshi nu ciwi hang wa, kepaghenanye ciwi mathu khaghanenithu ghena amou kejon ben.

⁴² Simeon mizza nyi meza manga na niduwa Edom wi wa. Ishi tsa hathu na mathu ssinu wa: Pelatiya, Neariya, Refaiya, nu Uzziel.

⁴³ Ciwi mathu na Amalek nyi hang kebenthu tsü pathia, nu mathu na tsü nten na ciwi hang wa.