1 KADIMITHU 8 - Kemethajüh (N) (Re-editing) Bible (BSI)

Cenkethenjüh Khitsonwa Sen nu Kekinyijjen wi kewa

¹ Tsaseng wi Kadimi Solomon na Israel mizzathu nu ageithu tsüdi wi accülikesathu na Jerusalem wi ma wi gho David Nyunutiwa, Zion wina Apvüwa Cenkethenjüh Khitson tsü pie nu Kekinyijjen wi wale kesa cichi.

² Mathu tsüdila gho asha tagüwa Ethanim sha wi Kelishu Kho tsüwi saghuya.

³ Khathansha wi accülikesathu tsüdi saghuya khe keqhaikedithu na Cenkethenjüh Khitsonwa tsü pieki,

⁴ nu pienu Kekinyijjen wi wa. Levi nyithu nu keqhaikedithu na Apvüwa ketenpen Nithsüjjen nu tsü tsanqaithu tsüdila sen nu Kekinyijjen wi wa.

⁵ Kadimi Solomon nu Israel nyithu tsüdila Cenkethenjüh Khitson tuwi saghu nu kaghaneni nu amesüsithu ji ntsa nu si nkeyakhi pi ahhansha sa.

⁶ Tsaseng wi keqhaikedithu na Cenkethenjüh Khitson tsü pie dula Kekinyijjen wi Kemetha ntsawa Pen wi cherubim cakhu witsü chia.

⁷ Mathu gisha zanshigü pi Akhitson nu ma kepiechan tsü whengbhonya.

⁸ Anyi kesü le kesü lela Kemetha ntsawa Pen tuwi tsü ketan ben nu kepiechan pangthu tsü muya mehai khe apen kepa wi nye. (Kepiechan tsüna nansü lela ciwi ben.)

⁹ Cenkethenjüh Khitson non witsü Israel nyithu na Ejipt wina shhugho keya wi Apvüwa na mathu ssinu Cenkethenjüh kesü kesa wi Mosa na Sinai Yikha wi pi kechi alonpha keni tsü ketan khe mangla nmi.

¹⁰ Keqhaikedithu na Kekinyijjen teshi keten wi akulukeshü na zuli dugho pongya,

¹¹ Apvüwa na keten kewegü na wegüthsü sa, nu mathu na khenengwa mathu kekuli sa meyala.

¹² Isanu Solomon na kekhie sa: “Apvüwa, no aghani pi atssan wi chi theng, isala no akulukeshü nu kejang wi hangle kessiyadha.

¹³ Hi khili nghena Kekinyijjen ajenkeben kesü sa theng, no anuphanla hangben thsüle kesalina apen kesü.”

Solomon na Anyithu wi Ajühkekhi

¹⁴ Anyithu na ciwi ngan keben wi Kadimi Solomon na mathu wiwa ghang nu Anyiza wi kesawegü khie pi mathu miwi chi.

¹⁵ Ma khi, “Apvüwa Israel Nyizawa seng! Ma iba David wi ma jüh hati khishikechi tsü sacendha.

¹⁶ ‘Hi Ejipt wina inyithu ssi keshhugho tsü wina hi kinyi thsüle kesalina hi Israel yyi tsüdi wi anyunuti khiewila kekinyijjen kesü sale kessi meya. Isala David, hi no kessi pi inyithu miwi kekhang sen thsüle.’ ”

¹⁷ Nu Solomon na khineng, “Iba David na Apvüwa Israel Nyizawa kinyile kesa ghena kekinyijjen kesü sale kiden,

¹⁸ isala Apvüwa na ma wi khi, ‘No ighena kekinyijjen kesü samvu keben tsüna meshon le,

¹⁹ isala no khiela tsü saya nben. Tsüna ntsawa, ntsa tonwa na ighena tsü saben.’

²⁰ “Apvüwa na khili ma jüh khishikechi tsü sacendha. Hi iba shiwa sa Israel Kadimiwa sayadha, nu hi Apvüwa Israel Nyizawa kekinyi ghena la Kekinyijjenwa tsü sayadha.

²¹ Hi Kekinyijjen wi Cenkethenjüh Khitsonwa kheni Apvüwa na Ejipt wina ithu bamyithu ssi shhugho keten wi mathu ssinu cenkethenjüh lonpha keni na kebenwa ghena la apen kesü sayadha le.”

Solomon na Kekhie

²² Tsaseng wi Solomon na anyithu tuwi na wa kekinyipenwa tuwi ngan nu ma kwen zanki

²³ nu kekhie sa, “Apvüwa Israel Nyizawa, ciwi atssan miwi nu ayyi cakhu wi lela acenpvü kesüla no ti kesa nmi le! N-nyithu na leben tsentsa wi njühya nu hang lethu, no n-nyithu ssinu cenkethenjüh tsü sa nu no kaghali pi mathu ccücaden.

²⁴ No iba David wi njüh khishi ketheng tsü nie; nu nansü ajüh tsüdila sacen cüdha.

²⁵ Apvüwa, Israel Nyizawa, khili no iba wi ajüh khishi ketheng kepawa, ma shicübvüghathu na ma ti ntuwi kiden-kesha nu njühya lethu, keshüthangla mathu jawi anyi kesü na Israel kadimiwa sa nu kekhang senben kesa ma kekiza tsü la sacen cülo kesa hi khieben.

²⁶ Tsalina, O Israel Nyizawa, khili no nmaghawa iba David wi khishi ketheng tsüdila ya sacen yathsülo.

²⁷ “Isala, O Anyiza, no ntsakhiwa ayyiwi hangya mehai kwe? Tangwi maben lela nghena zza mtsü, isalethu, khatinu hi nghena sa ketheng Kekinyijjen ha no pen qoya mehai nu?

²⁸ Apvüwa iNyiza, hi nmaghawale. Hi kekhie kina cülo, nu nansü hi kekhiewa ha sa cülo.

²⁹ No kinyi thsüle kessiya kesa ben Kekinyijjen hawi ha ghaja ghanan hieyalo. Hi Kekinyijjen ha wiwa peghenu kekhie sa lethu kina chicülo.

³⁰ Hi nu inyithu na apen ha wiwa peghe nu kekhie sa lethu kina chicülo. Tangwi njjen wi ben nu ithu kekhie kina nu ithu kesami teshi cülo.

³¹ “Khathansha wi anyi kesü na kepawa tuwi sazzile khi nu ssisen Kekinyijjen hawi kekinyipen wi ma nsazzile kesa ntuwi kishenle gho khe,

³² O Apvüwa, no tangwi pen nu nmaghathu jühkaghaten cülo. Kesazziwa tsü kemu-u wina meten cü, nu kesazzi nkemiwa tsü teshi cülo.

³³ “Khathansha wi n-nyithu Israel na sami pi no shun kesa ghena mathu ghinyithu na mathu chaya, nu mathu na no wi kheneng gho Kekinyijjen hawi kesami teshikecü khie khe,

³⁴ tangwi pen nu mathu kekhie kina cülo. N-nyithu kesami teshi cü, nu mathu ssineng gho no ayyi pi mathu bamyithu cü ketheng witsü chicülo.

³⁵ “Khathansha wi n-nyithu na sami pi no shun kesa ghena no atsan ya ngho thsüla, isanu mathu na leben khapegheya nu Kekinyijjen ha wiwa peghe nu no wi kekhie sa khe,

³⁶ tangwi ben nu mathu kekhie kina cülo. Kadimiwa nu Israel nyithu kesami teshi cü, nu mathu sansi pi kemeshonwa tsü sa thsülo. Isalethu, O Apvüwa, no atsankegho kesun pi no anuphanla pi n-nyithu ji saya thsü kesawa n-yyi hawi chicülo.

³⁷ “Khathansha wi ayyi ciwi azeng nyelela adhagha sa, ameghü nkemehai nyelela ashiqathu na alli yasa, n-nyi ghinyithu na mathu ssikaghashen, khumakhujü nyelela kesakinaa na mathu jawi pen khe,

³⁸ mathu kekhie hhai kina cülo. Keujüla n-nyi Israel kesü le kesü lela ahathakina wina Kekinyijjen ha wiwa peghe nu mathu kwen zankila kekhie sa lethu,

³⁹ mathu kekhie kina cülo. Tangwi njjen wi pen nu mathu kekhie kina cü, mathu kesami teshi cü, nu mathu kiqa cülo. No ketan anyi leben kemeshen kechüwa. Anyi kesüsü kemu-u wi pi cü,

⁴⁰ isanu n-nyithu na no ayyi pi ithu bamyithu kecü witsü hang keben chu matsü tsüdi wi njühya thsüle kesalina.

^41-42 “Khathansha wi alen kesie wi kahang asang kesü na n-nyankemechan nu no n-nyithu ghena pala keti kuli kechithu tsü zaya nu Kekinyijjen hawi no kinyi nu kekhie sale gho khe,

⁴³ ma kekhie kina cülo. Tangwi no kahang pen wi ben nu ma jühkina chi nu ma kekhie sa cülo, isanu n-nyi Israel ti ayyi wi anyi tsüdila no chü nu njühyaya thsüle kesalina. Isalethu mathu na hi Kekinyijjen sa ketheng wi ha no kekinyi benle kesa chüyaben.

⁴⁴ “No khathansha wi ahza pi n-nyithu cü nu mathu na wa aghi wi mathu ghinyithu ssikaghashen thsü nu mathu na kahe wi tenlela no kessiya kesa nyunutiwa ha nu hi nghena sa ketheng Kekinyijjen ha wiwa peghe nu kekhie sa khe,

⁴⁵ mathu kekhie kina cülo. No tangwi na mathu kekhi kina chi nu khangkeya pi mathu cülo.

⁴⁶ “Khathansha wi n-nyithu na sami pi no shun — nu ciwi kesami nkemi kesüla nmi — nu no nlebenketsu wina mathu ghinyithu ya mathu chaya thsüa nu mathu ghan pi atssüzüthu sala ssinu ayyi kepa wi alen kesie wi wa lela,

⁴⁷ n-nyithu kekhie kina chicülo. Keujüla mathu na ayyi ciwi mathu leben khapegheya nu no wi khie, mathu kesami nu gheshighena kekuli khishi lethu, O Apvüwa, mathu kekhie kina cülo.

⁴⁸ Keujüla mathu na ayyi ciwi ntsakhiwa nu atsentsa sala leben khapegheya nu mathu na no ayyi pi ithu bamyithu kecü ha, no kessiya kesa nyunutiwa ha, nu hi nghena sa ketheng Kekinyijjen ha wiwa peghe nu no wi kekhie sa lethu,

⁴⁹ mathu kekhie kina chi cülo. Tangwi njjen wi ben nu mathu kekhie kina cü nu mathu nantizen chi cülo.

⁵⁰ Mathu kesami nu mathu na no keshun kekuli tsüdila teshi cü, nu mathu ghinyithu sapi mathu tuwi ccatssü yathsülo.

⁵¹ Mathu na n-nyithu, no Ejipt wi annikeqhe wina mathu khushi sen shhugho le.

⁵² “Kekhang ntsawa Apvüwa, no keshüthangla no nenthi sala n-nyi Israel nu mathu kadimiwa ghang ketenwa salo, nu mathu na kusi no wi kekiqa khie khe mathu kekhie kina cülo.

⁵³ No Ejipt wina ithu bamyithu ssi shhugho keten wi nmaghawa Mosa wina mathu kekiza ti no anyi tsüdi jawi na mathu kessi pi n-nyithu sayadha le.”

Kekhie Sakhenwa

⁵⁴ Solomon na Apvüwa wi kekhie kesacen seng wi kekinyipen tuwi ma khutsü nu ma kwen zanki keben witsü na shagha.

⁵⁵ Ma hhai misikhhali nu Anyiza wi kesawegü khie pi anyi ciwi kebenthu tsüdi miwi chi. Ma khi,

⁵⁶ “Apvüwa senglo, ma sale khishi ketheng ti kecca pi ma nyithu cüdha. Ma ma maghawa Mosa wina khishi ketheng kemehai tsüdila sacendha.

⁵⁷ Apvüwa ithu Nyiza na ithu bamyithu ssikegho ti ithu ssiketenwa sa; ma khiela ithu teshi nyelela yisha nkesawa sa;

⁵⁸ ma ithu sapi ma jühya thsü, isanu ithu na keshüthangla ma ithu ya hang thsü mvu kepen wi hang, ma pi ithu bamyithu kecü ayenthu nu ayenkhukechithu tsüdi nieya thsüle kesalina.

⁵⁹ Apvüwa ithu Nyiza na matsü tsüdi wila hi ma wi kekhie hathu ha meshenki ketenwa salo. Ma keshüthangla Israel nyithu nu mathu kadimiwa na atsathangla nsenthu keyishü wi mathu nantizen chi kecüwa salo.

⁶⁰ Isanu ayyi wi mizzatenti tsüdila Apvüwa tsü ketan Anyiza khe kepa wi khiela nmile kesa chüya thsüle kesalina.

⁶¹ Nthu, ma nyithu na keshüthangla Apvüwa ithu Nyiza wi jühtsentsa sa nu nthu na nansü sa keben hati ma yenthu nu ma yenkhukechithu tsüdila yaketenwa salo.”

Kekinyijjenwa Tsü Satekemetha

⁶² Tsaseng wi Kadimi Solomon nu anyi ciwi kepenthu tsüdila ahhansha sapi Apvüwa cü.

⁶³ Ma amesüsi 22,000, nu kaghaneni 120,000, pi kecca ghena kekinyi hhansha sa. Isanu Kadimiwa nu anyi tsüdila Kekinyijjenwa tsü satemetha.

⁶⁴ Ma tsü ghanan accühha nonwa, nu Kekinyijjen tuuwa apen tsü la satemetha; tsaseng wi ma ciwi mecang pi kekinyi, asu pi kekinyi, nu asa kethu pi kecca ghena kekinyi sachi. Ma ha sachi, kepaghenanye lezza pi kesa kekinyipenwa tsüna kekinyi hathu tsüdi kesa ghena apen zza mtsüa.

⁶⁵ Ciwi Kekinyijjen wi Solomon nu Israel nyithu tsüdila Kelishu Kho tsü ghanan tagü kemini sa. Ciwi anyithu na aghawa Hamath Pass nu acülawa Ejipt nyi ggü kecu wina gho nu anyitenti keti ntsa kesü sa.

⁶⁶ Tazen ghanan wi Solomon na anyithu kesun pi ajjen wi wha thsüa. Mathu tsüdila ma seng nu anonkeghe sala ajjen wi wha, Apvüwa na sawegü pi ma maghawa David nu ma nyithu Israel kecü tsüdi ghena.