1 KADIMITHU 7 - Kemethajüh (N) (Re-editing) Bible (BSI)

Solomon Kadijjen

¹ Solomon na ma ketanla ma ghena la kadijjen kesü sa, nu amapi taghakecheng tsü sa.

^2-3 Kadijjen wi Lebanon Yinong keshondhiwa tsüna kesie meter 44, kemeza meter 22, nu kemisi meter 13.5. Tsüna sedar chan pi kesa adonbvü kecheng ben, adonbvü kesü miwi sedar chan pi kesa akekhhathu pi alen taghamanga zanghu theng. Sedar chan pi aqae sa wa keben ketheng-jjen cu, nu adonbvüthu pi tsü tsüki theng.

⁴ Ajjen-keshon ghapeli qho kesüsü wi jjenkubhithu alen kecheng na ben.

⁵ Ajjenkhen nu ajjenkubhithu na jenkayen ccügwen mejü chan-gü sa, ajjen-keshon kesü miwi ajjenkubhithu alen kecheng sapi kejentanli theng.

⁶ Keshondhi tsüwa makedon kesie na meter 22, nu kemeza meter 13.5, tsü tuuwa makedon pi tsüki nu accühha kesü kesa na ben.

⁷ Kadipen keshondhiwa tsüpi Ajühkekaghatenpen lela khiden, tsüna sedar chan ssen pi aphacü wina ki aqae miwi shon theng, nu Solomon na ciwi ben nu ajühkaghakhi den.

⁸ Solomon na Ajühkaghatenpen tsü seng wi ajjen tsüti kesa kepa wi la ma kebenpen kesü na ben. Ma ma wubvü Ejipt Kadimiwa nga ghena la ajjen tsüti kesa kesü sa.

⁹ Ajjen hathu nu ajjen-keshondhi ketiwa tsüdila alon kemehai pi magizhü senki makekhha cu theng. Alonthu tsü kehapen wina kiden-kesha nu ketegü pi ha, nu kehaji pi ghapeli qho ma tsisa theng.

¹⁰ Alon ketiti pahan kesie na meter kecheng nu gishü pahan nu kepathu kesie na meter mejü tsüti kehapen wina kiden-kesha sengho ma gizhü theng.

¹¹ Tsüthu miwi alon kepathu ketegü nu hah ketheng, nu sedar chan kekhhathu pi chi theng.

¹² Kadijjen keshondhiwa, Kekinyijjen keshondhi ndukuwa, nu Kekinyijjen keshondhiwa wi kedulen keshonthu na alon kaha kecheng miwi sedar chan kekhha kesüsü sala pi shon theng.

Huram Kekuli

¹³ Kadimi Solomon na nyu kesun pi anyi kesü ma nyan Huram, kepachünyi kesü Tur nyunutiwa wi hang keten lezza kekuli wi sapichüwa tsü cichi.

¹⁴ Ma ba na shüdha, ma ba la Tur wina kegho lezza kekuli wi sapichünyi kesü; ma jja na Naftali mizza nyi kesü. Huram na metsa-mena nu kepachünyi kaghawen kesü. Ma Kadimi Solomon na ma ci kechi tsü yaya nu gho lezza kekuli tsüdi miwi keghangwa sa.

Lezza Pi Makedon Keni

¹⁵ Huram na lezza pi makedon keni kesie na meter 8, nu ma wikevü na meter 5.3 cühya nu tsü keni pi Kekinyijjen kedulen wi chi.

¹⁶ Ma lezza pi makedon keni shoni wi kedonji keni kesie na meter 2.2 la saya.

¹⁷ Makedon kesüsü shoni wi amighe ssüle tsisa pi kemisükili

¹⁸ nu lezza pi ahhibvüthu zhüla alen keni sa ma tsisa theng.

¹⁹ Makedon shoni wi kedonjithu tsüna sapi ashagha tsi ti kesie na meter 1.8 sa

²⁰ nu tsüthu pi amighe ssüle zankevüli ketheng miwi chitheng. Ciwi ahhibvü meza keni na shoni wi kedonji kesüsü miwi alen keni saben.

²¹ Huram na lezza makedon keni hapi Kekinyijjenwa kedulen wi chi; kesü pi acülawa chi nu tsü nyan pi Jakhin ci, nu kepawa pi aghawa chi nu tsü nyan pi Boaz tsüti cia.

²² Lezza pi ashagha tsi ti shoni wi kechijithu na makedonthu miwi ben. Tsütinu lezza ghena kekuliwa tsü sacenya.

Lezza Taghaguwa

²³ Huram na taghagu kesü makedhu na meter 2.2, manon wi kemeza na meter 4.4, nu mawekevü na meter 13.2 saya.

²⁴ Taghagu sun ameiwa kevü tsüdila lezza kizanlili pi alen keni vüya, nu tsüthu pi taghagu gwo wi zhüghu pi kesütan sa.

²⁵ Taghaguwa tsüna lezza pi kesa mesü süpon taghakeni na ameiwa ghangla kecheng cheng na acüla, agha, nidu, nu nishu wi peghe kebenthu miwi tsü don theng.

²⁶ Taghagu tsü kisha na milimeter 75; ma sun na ahyi kesü sun ti sapi ashagha kepvü ti ameiwa llazighe ben. Taghagu ha liter hazar jügha-u chiyaben.

Lezza Mesügarithu

²⁷ Huram na amesügari tagha la saya; kesüsü kesie na meter 1.8, kemeza na meter 1.8, nu kemisi na meter 1.3.

²⁸ Tsüthu tsüna achan meceqe ssen pi ma chan-güthu sa theng.

²⁹ Ssen pi ssensitemi, amesü süpon, nu cherubim tsisa; ma chan-güthu miwi tsü ssensitemi nu amesü süponthu cakhu nu miwi la alen tizüphi khuki theng.

³⁰ Amesügari kesüsü tsüdila lezza pi ma ccü mejü nu ma ccü kevülipenthu sa. Accügwen mejü wi lezza pi atssükhu tsüki ketheng tsü miwi alen tizüphi khuki pi ma tsisa theng.

³¹ Ciwi atssükhu kedonpen allahu kesü ben. Tsüna amesügari shoni tsü miwi sentimeter 45 shu nu tsü non wi sentimeter 18 duben. Tsüna ho kevüli theng.

³² Ma ccüthu kemisi na sentimeter 66; tsüthu na ssen pi chi ketheng cakhu wi, nu ma ccüthu kevülipen tsüpi amesü gari gwo wi zhükighu theng.

³³ Ma ccüthu na gorugarithu ccü ti kesa; tsüthu ccü kevülipen, ma ccü ku, ma ketsü, nu füghancü kesathu mabenla lezza pi sa theng.

³⁴ Amesügari kesü wi ma cakhu wi ketsüthu mejü na ma ccügwen wi ben, tsüthu pi ma gwo wi zhükighu theng.

³⁵ Amesügari kesüsü shoni wi sentimeter 22 pi zankevüli; ma ketsüthu nu ssen pi kethengthu na pi ma gwo wi zhükighu theng.

³⁶ Ketsüthu nu ssen pi kethengthu miwi ssensitemi, cherubim, nu palm tonthu tsisa, nu majü kaghacang keben witsü alen tizüphi khuki pi maben wi ma tsisa vü theng.

³⁷ Hatinu amesügari tsüdila saya; tsüthu tsüdila ketikesie nu matsi makesütan.

³⁸ Huram na amesügari kesüsü ghena atssükhu tagha la saya. Atssükhu kesüsü na liter 800 chiya kemehai manon keti na meter 1.8 sa.

³⁹ Ma amesügari manga pi Kekinyijjen na acülawa, nu kepa wi manga pi aghawa chi; ma taghaguwa tsüpi acüla-nishuwa ccügwen wi chia.

Kekinyijjen wi Keben Tsanqaithu Nyan

^40-45 Huram na apfü, kekhweji, akhuzzathu la saya. Ma Kadimi Solomon ghena Apvüwa Kekinyijjen wi kekuli tsüdila sacen. Ma hathu ha sa: Makedon keni Makedon keni shoni wi kechiji akhuzza keni Kechiji kesüsü miwi amighe ssüle tsisa pi kemisükili Lezza pi kesa ahhibvü meza mejü sa nu pi tsisa ketheng Shoni wi kedonji kesüsü miwi ahhibvü meza pi alen kesüsü sala alen keni kevüli theng Amesügari tagha Atssükhu tagha Taghagu na mathu miwi keben amesü süpon taghakeni Apfü, kekhweji, nu akhuzzathu Huram na Kadimi Solomon ghena Kekinyijjen wi atsanqai hathu ha tsüdila lezza pi chenchen nyen theng.

⁴⁶ Kadimi na Jordan Yyiketijü wi Sukkoth nu Zarethan manyi jüwi amighe kecühpen wi hathu ha tsüdila saya.

⁴⁷ Solomon na lezza hathu pi nwhu nan, kepaghenanye tsüthu tsüna ji mtsü kesalina ma khiela tsüthu pi whu nanle nsala.

⁴⁸ Solomon na Kekinyijjen ghena suna pi kesa tsanqaithu la ben; kekinyipen, amesa pi Anyiza kecüpen ghena miz,

⁴⁹ Kemetha ntsawa Pen tuwi keben suna pi kesa ahula kedonpenthu tagha, manga pi acülawa nu manga pi aghawa chi; athighithu, ahulathu, nu kedonbvüthu;

⁵⁰ ahyithu, ahula kecankijithu, atssükhuthu, hankedemvu ghena akhuthu, nu akhu magi keben amihi kepijithu; nu Kekinyijjen nu Kemetha ntsawa Pen jenkathu wi zantenjithu. Atsanqai hathu ha tsüdila suna pi saya.

⁵¹ Kadimi Solomon na Kekinyijjen wi kekuli tsüdila sa cenkeya wi ma ma ba David na sametha pi Apvüwa wi chikesathu rükatssü, suna, nu atsanqai kepathu tsüdila pi Kekinyijjen keben ketheng-jjen wi chia.