1 KADIMITHU 6 - Kemethajüh (N) (Re-editing) Bible (BSI)

Solomon na Kekinyijjenwa Kesa

¹ Israel nyithu na Ejipt keteshi amapi meza mejü nu achentazen kesa seng wi Solomon na Israel miwi kadikesa amapi mejüwa asha keni, Ziv sha wi Solomon na Kekinyijjenwa tsü sa shhu.

² Ma non wi kesie na meter 27. kemeza na meter 9, kemisi na meter 13.5.

³ Kedulen keshondhi na ma kedhu meter 4.5 nu kemeza meter 9, tsüna ajjen kemeza tsü maben.

⁴ Kekinyijjenwa tsü keshon kebhithu na ameiwa maghan nu ndukuwa mezaqo.

⁵ Kekinyijjen na asengwa keshon na ameiwa tsü vüla ajjenshha kecheng ashha kesüsü kemisi na meter 2.2 saya.

⁶ Ajjenshha ssanwa ntsa wi keshondhi kesüsü na kemeza meter 2.2, anonwa wi kemeza na meter 2.7, nu meiwa ntsa wi kemeza na meter 3.1 saya. Ajjenshha kesüsü wi ma keshon na ssanwa miwi ghapaki sa nu keshondhi non wi ma kekhhathu pi nchila benya thsüle kesalina.

⁷ Alon pi Kekinyijjenwa tsü kesathu na kehapen wina kiden-keshaya, isanu Kekinyijjenwa sa keben witsü kejenji, nyelela ampvü, nyelela kecüh tsanqaithu pi ahhai nsa thsüle kesalina.

⁸ Ajjenshha ssanwa ntsa wi kedulen na Kekinyijjen na acülawa, ajjenshha keniwa nu kechengwa kedulen na acükhaku zhü senki ben.

⁹ Tsalina Kadimi Solomon na Kekinyijjenwa tsü sa cenya. Ma sedar chan pi aqae kekhha nu manon wi kechithu saya.

¹⁰ Kekinyijjen asengwa keshon na ameiwa tsü vüla ajjenshha kecheng ashha kesüsü kemisi na meter 2.2 sa, nu sedar chan pi kekhhathu sala tsüthu zanghutheng.

¹¹ Apvüwa na Solomon wi khi,

¹² “Keujüla no hi ayenkhukechithu nu iyenthu tsüdi nieya lethu, hi nba David wi mangwa khishitheng khe nmiwi sacen cüaben.

¹³ Hi no Kekinyijjen sa ketheng ha wina inyi Israel jawi hangben, nu hi khiela mathu teshia nben.”

¹⁴ Isanu Solomon na Kekinyijjenwa tsü sacenya.

Kekinyijjenwa Non wi Tsanbekeya

¹⁵ Ajjen-keshon nonwa tsü sedar chan pi tsisa pi aphacü na ki aqae kecu meju, aphacü tsü asahong chan pi dhatheng.

¹⁶ Kekinyijjen wi keshondhi ndukuwa sa ketheng tsüpi Kemetha ntsawa Pen le khiden. Tsüna ma kesie meter tugu nu sedar chan pi aphacü wina shondhi senki aqae cutheng.

¹⁷ Kemetha ntsawa Pen tuwi keshondhiwa tsü kesie na meter tagha nu tazen.

¹⁸ Sedar chanthu ho pi athighi sala kizanlili pi ma tsisa theng; ajjen-keshon lonthu tsü nmu thsüle kesalina ma non wi mabenla sedar chan pi mejutheng.

¹⁹ Kekinyijjen sengwa nduku wi keshondhi kesü satheng. Apvüwa Cenkethenjüh Khitson tsüpi ciwi chile kesalina.

²⁰ Keshondhi anonwa ha kesie na meter tugu, kemeza meter tugu, nu kemisi la meter tugu, tsüdila suna kemetha pi meju theng. Kekinyipenwa na sedar chan ssen pi meju theng

²¹ Kekinyijjen non tsüdila suna pi meju, nu suna tsanzülithu pi keshondhi ndukuwa suna pi meju ketheng tsü kedulen witsü ghabhon theng.

²² Kekinyijjenwa tsü non maben, nu Kemetha ntsawa Pen wi kekinyipen la suna pi nyen theng.

²³ Oliv chan pi cherubim keni saya, kesüsü kesie na meter 4.4, nu pi Kemetha ntsawa Pen wi chi.

^24-26 Keni qho matsi nu ketikesie makesü. Keni qho agisha kenini ben, nu agisha kesüsü kesie na meter 2.2, isanu agisha kesü pang na wala kepawa manyi jüwi meter 4.4 na ben.

²⁷ Tsü keni pi Kemetha ntsawa Pen wi tan thsü, nu manyi gisha zanshigü pi ajjen-keshondhiwa non wi khokho kekidhenli, nu agisha pahanwa keni na ajjen-keshonthu kidhenben.

²⁸ Cherubim keni qho suna pi nyen theng.

²⁹ Ajjen-keshondhi ketiwa nu anonwa keshonthu tsüdila ho pi cherubim, palm tonthu, nu athighithu tsisa theng.

³⁰ Aphacü lela suna pi nyen theng.

³¹ Oliv chan pi ajenka ashha keni sapi Kemetha ntsawa Pen kedulen sa; ajjenkhen shoni na tsumezi sa.

³² Ajjenkhenthu tsü ho pi cherubim, palm tonthu, nu athighi tsisa theng. Ajjenkhen, cherubim, nu palm tonthu na suna pi nyen.

³³ Ajjen-keshondhi ketiwa wi kedulen jjenkhen na oliv chan pi jenkayen ccügwen mejü chan-gü sa theng.

³⁴ Ciwi asahong chan pi ajjenkhen keshanli kesa keni sa,

³⁵ nu ho pi cherubim, palm tonthu, nu athighithu tsisa, nu suna pi nyen shan theng.

³⁶ Accühha ndukuwa kesü tsüna Kekinyijjen tuuwa sa, tsü keshonthu na alon ashha kecheng qho wi sedar chan kekhha ashha kesüsü na ben.

³⁷ Solomon na kadikesa amapi mejüwa asha keni, Ziv sha wi Kekinyijjenwa tsü sa shhu.

³⁸ Solomon na kadikesa amapi taghakhenwa asha tazen, Bul sha wi sacenyale kekiden ti Kekinyijjenwa tsü sacentha saya. Solomon na amapi tagü tsü sa.