1 KADIMITHU 4 - Kemethajüh (N) (Re-editing) Bible (BSI)

Solomon Kekhu wi Kedithu

¹ Solomon na Israel tsüdi miwi kadimi sa,

² nu hathu hana ma kekhu wi kedi kemisi ntsathu: Keqhaikediwa: Azariya tsa Zadok

³ Ajühkekaghatenpen wi kezhüwa: Shisha tsa keni, Elihoref nu Ahijah Zhükethengthu kenonccawa: Ahilud tsa Jehoshafat

⁴ Süpahizi benchüwa: Jehoiada tsa Benaiya Keqhaikedithu: Zadok nu Abiathar

⁵ Elakha ahngthu miwi kedi ntsawa: Nathan tsa Azariya Kadimi sansichüwa: Nathan tsa keqhaiwa Zabud

⁶ Kadijjen wi amaghathu kenonccawa: Ahisha Kekulithu kenonccawa: Abda tsa Adoniram

⁷ Solomon na Israel jawi anyi taghakeni pi elakha ahngthu sa thsü. Mathu kesüsü wi amapi kesü wi asha kesü ghena mathu elakha wi kedsakejjü pi kadimiwa nu ma jjen wi kebenthu tsüdi cü thsü.

⁸ Hathu hana kedithu taghakeni nyan nu mathu na elakha tsü miwi kenonccathu: Benhur: Efraim yyishiphon diyyiwa

⁹ Bendeker: Makaz, Shaalbim, Beth Shemesh, Elon, nu Beth Hana nyunutithu

¹⁰ Benhesed: Arubboth, Soko, nu Hefer yyi tsüdi wi

¹¹ Benabinadab, Solomon nga Tafath keyawa: Dor yegu mabenla

¹² Ahilud tsa Baana: Taanak, Megiddo nyunutithu, nu Beth Shen kete wi ayegu tsüdi, Zarethan kete wi anyutiwa, Jezreel nyuti acülawa, wala Abel Mehola nyunuti nu Jokmean nyunuti kecu

¹³ Bengeber: Gilead yyiwi Ramoth nyunutiwa, nu Gilead wi Manasseh shicübvügha kesü Jair gei ji anyuthu, nu Bashan yyiwi Argob yegu, tsüdi saghu anyuti achentugho, akhweti sapi vü nu lezza pi kaghapeng jenkathu sa kethengthu

¹⁴ Iddo tsa Ahinadab: Mahanaim yyi

¹⁵ Ahimaaz, Solomon nga kepawa Basemath keyawa: Naftali yyi

¹⁶ Hushai tsa Baana: Asher yegu nu Bealoth nyutiwa

¹⁷ Parua tsa Jehoshafat: Issakhar yyi

¹⁸ Ela tsa Shimei: Benjamin yyi

¹⁹ Uri tsa Geber: Gilead yeguwa kheni Amor nyi Kadimi Sihon nu Bashan wi Kadimi Og na kekhangsen kegho tsü Taghakeni hathu miwi anyi maben ghena ahng kesü na ben.

Solomon na Mehai kayila Kadikesa

²⁰ Judah nu Israel nyithu na atssükedone ghüsa wi ahachan ti shaben; mathu na dsa nu jjü, nu anongheben.

²¹ Solomon kadiyyi na Eufrat Ghaku na wala Filistia nu Ejipt ggü kecu wi mizzatenti tsüdi saghuben. Mathu na khajana pi ma cü, nu ma kahang chu ma kekhu wi ben.

²² Ghanan kesü wi Solomon na kedsakejjü nsenthu keyishü na awheng kemehai liter hazar manga nu anün liter hazar tagha;

²³ amesü süpon kekunon tagha, amou wi kekicen amesüsi ngwe, nu kaghaneni meza kesü, tsü miwi ameshü, amejü ti kesa, ameshü ti kesa, nu awegüthu.

²⁴ Solomon na ayyi Eufrat Ghaku niduwa, tsüdi miwi kekhangsen, tsüna Eufrat miwi Tifsa na wala Gaza nyunutiwa niduwa kecu. Eufrat na niduwa kadimithu tsüdila ma kekhu wi ben, nu ma diyyi jujü tsüdila ssinu kecca wi ben.

²⁵ Ma hangkeben chu Judah nu Israel yyi maben wi anyithu na yazishu, atheghi kesüsü ma kemeshentsseli nu khhaghabvü tonthu ben.

²⁶ Solomon na ma gorugari ghena goru süpon hazar jügha nu goru kessithu hazar taghakeni na ben.

²⁷ Ma ahngthu taghakeni mathu kesüsü wi asha kesüsü ghena kedsakejjü pi kadimi Solomon nu kadijjen wi dsajjü kebenthu tsüdi ghena khuchi: mathu na keshüthangla nsenthu keyishü tsüdi pi cü thsü.

²⁸ Ahng kesüsü na mathu shei gorugari goruthu nu ssinu kekuli sa keten sahangthu ghena achentha nu amatsithu nsenthu keyishü la khuchi.

²⁹ Anyiza na nyu miwi gilli kemetsa, chüshikeya, nu palakechü ketegü nkeyacha pi Solomon cü.

³⁰ Solomon na niduwa nyelela Ejipt wi kemetsa nyithu miwi metsaki.

³¹ Ma anyi tsüdi miwi kemetsa ntsawa: Ezra nyiwa Ethan, nu Mahal tsathu Heman, Kalkol, nu Darda miwi metsaki, nu ma nyankemechan na diyyithu jujü tsüdi wila khi wa.

³² Ma ajühbvüthu hazar kecheng nu akhwithu hazar kesü miwi sachi.

³³ Ma achan nu aghangthu, Lebanon wi Sedar chanthu na wala ajjen keshon wi shigü keshhugho shonpheghe cüki kecu khi: ma aghangsa, awa, amaghang, nu angathu cüki la khi.

³⁴ Ayyi wi kadimi tsüdila ma kemetsa cüki zaya nu anyithu kesun pi ma jüh kina thsü.