1 KADIMITHU 22 - Kemethajüh (N) (Re-editing) Bible (BSI)

Atusenjüh-kechüwa Mikaiya na Ahab Kekitsan

¹ Amapi keni ciwi Israel nu Siriya manyi jüwi kecca na ben,

² isala kechengwa mapi wi Judah Kadimi Jehoshafat na Israel Kadimi Ahab ghang chile wa.

³ Ahab na ma kekhu wi kedithu wi keü, “Mangkesa na ithu na Siriya Kadimiwa wina Gilead yyiwi Ramoth tsü khuneng yale mangla nsala nu? Tsüna ithu jile!”

⁴ Nu Ahab na Jehoshafat wi keü, “No hi gweghe wala Ramoth ssisala nu?” Jehoshafat na luneng, “No khathansha wi wale khi khe hi kiden yaben, tsüti süpahithu nu goru süpahithu la kiden yaben.

⁵ Isala ithu atuwa sala Apvüwa keü nan na.”

⁶ Tsalina Ahab na atusenjüh- kechüthu meza mejü cichi nu mathu wi keü, “Hi wala Ramoth tsü ssisala nye nu?” Mathu na luneng, “Wala ssisalo, Apvüwa na khangkeya pi no cüaben.”

⁷ Isala Jehoshafat na keü, “Ciwi la ithu na atusenjüh-kechü kepa wina Apvüwa ccünengya kemehai nmi kwe?”

⁸ Ahab na luneng, “Ciwi la kesü Imla tsa Mikaiya benle. Isala hi ma nanmeghüden, kepaghenanye ma khiela ighena kemehai atusenjüh-khi nten; tsüna keshüthangla nkemehai ketan.” Jehoshafat na khineng, “No tsüti kekhiu nyele!”

⁹ Tsaseng wi Ahab na kedi kesü cichi nu ma wan wala Mikaiya ssigholo kiza.

¹⁰ Kadimi tsü keni na manyi kadithsümeni pvüya nu Samaria kaghapeng jenka na ameiwa aniegi wi manyi kadipen miwi donki nu atusenjüh-kechüthu tsüdila manyi tuwi atusenjüh- khipen.

¹¹ Mathu meshu kesü Khenaana tsa Zadekiya na amighe pi aghacüthu saya nu Ahab wi khi, “Apvüwa na hati khiben, ‘No hathu ha sen nu Siriya nyithu ssisaden, nu mathu yasatha salo.’”

¹² Atusenjüh-kechüthu kepa tsüdila tsü makesü khia. Mathu na khi, “Wala Ramoth ssikaghashenlo no khangya ben na. Apvüwa na khangkeya pi no cüaben.”

¹³ Tsü tsüwi kedi Mikaiya ssighole kewawa na ma wi khi, “Atusenjüh-kechü kepathu tsüdila kadimiwa ghena haicenkeya tusenjüh khidha, no la makesü khi kesawa mehaiben.”

¹⁴ Isala Mikaiya na luneng, “Hangkebenwa Apvüwa nyan wina ma mangwa khilo hi kiza khe hi tsü khiben kesa khishi benle!”

¹⁵ Ma Kadimi Ahab tuwi kegho wi kadimiwa na ma keü, “Mikaiya, Kadimi Jehoshafat ishinyi na wala Ramoth ssisala khati nu?” Mikaiya na luneng, “Wala ssisalo, no khang yaben. Apvüwa na khangkeya pi no cüaben.”

¹⁶ Isala Ahab na khineng, “No Apvüwa nyan wina hi wi kekhi wi atsentsawa khilo! Hi khaju tughu tsüti no kiza nu?”

¹⁷ Mikaiya na luneng, “Hi Israel süpahizi na yyishiphon thu miwi kaghaneni na mathu kehiewa nmila bvüzighe keben ti muben. Nu Apvüwa na khi, ‘Anyi hathu na mathu ccülikesawa nmi: mathu ya cca ajjen wi wha thsülo.’”

¹⁸ Ahab na Jehoshafat wi khi, “Hi no wi ma khiela ighena kemehai atusenjüh-khi ntenle nkiza kwe? Tsüna keshüthangla nkemehai ketanle!”

¹⁹ Mikaiya na khiwa: “Khili Apvüwa na mangwa khiben khe kinayalo. Hi Apvüwa na tangwi ma kadipen wi tangnyilothu tsüdila ma vüla donki keben mu.

²⁰ Nu Apvüwa na keü, ‘Thowa na Ahab mechu pi wa thsü nu ma ya Ramoth wi shü thsüa nu?’ Tangnyilothu pahan na kesü khi, nu kepathu na kepawa khi.

²¹ Tsaseng wi aghamu kesü na gho Apvüwa tuwi ngan nu khi, ‘Hi wa ma mechutenle.’

²² Apvüwa na keü, ‘No khati sa ben?’ Aghamu na khi, ‘Hi wala Ahab tusenjüh-kechüthu tsüdila milikemesa khi thsüben.’ Apvüwa na khi, ‘Wala ma mechulo. No haicenya ben na.’ ”

²³ Mikaiya na khi, “Hati sadha. Apvüwa na atusenjüh-kechüthu hathu ya no wi milimesa thsüa. Isala ma nghena tsü kedediwa tsü metubenle khidhidha le!”

²⁴ Tsaseng wi atusenjüh-kechüwa Zadekiya na Mikaiya wi shula ma mmi ceng cü nu keü, “Kusi Apvüwa ghamu na hi teshi nu no kiza nu?”

²⁵ Mikaiya na khineng, “No ajjen-keshondhi nonwa wi kuthi kedu ghanan witsü muya ben.”

²⁶ Tsaseng wi Kadimi Ahab na ma kekhu wi kedithu kesü wi khi, “Mikaiya ghanya nu ma ssi wa Amon nyunutiwa wi ahng nu kaditsa Joash manyi cülo.

²⁷ Manyi wi ma pi atssüzüjjen wi chi nu hi kemehai sala npi kegho neng chu amesa nu atssü kivü ketan pi ma cülo kiza lo.”

²⁸ Mikaiya na khi, “Keujüla no kemehai sala gho neng lethu, Apvüwa na hi wina tsü nkhile!” Nu ma khineng, “Anyi tsüdila hi kekhi jüh ha kinayalo!”

Ahab Keshü

²⁹ Israel Kadimi Ahab nu Judah Kadimi Jehoshafat manyi na Gilead yyiwi Ramoth nyunutiwa tsü ssisa wa.

³⁰ Ahab na Jehoshafat wi khi, “Ishinyi aghi wi wa lethu, hi itsi sa kemili pvüya na no kadithsümeni pvülo.” Tsalina Israel Kadimiwa na ma tsi sa kemili pvü nu aghi wi wa.

³¹ Siriya Kadimiwa na Israel Kadimiwa ketan khe kepa wi nssikaghashen lalo kesa ahza pi ma gorugari changha nu keni benchüthu cü theng.

³² Tsalina mathu na Kadimi Jehoshafat mukeya wi mathu tsüdi kemeshen na ma Israel Kadimiwa le nu mathu na ma ssikaghashen wa. Isala magha kechi wi

³³ mathu na ma Israel Kadimiwa nye le kesa chüya nu mathu na ma nssikaghashenla.

³⁴ Isala Siriya nyi süpahi kesü na alakusü pi gachi nu tsüna Kadimi Ahab ghighe jüwi na du ma ghonya. Ma ma gorugari keculawa wi magha nu khi, “Hi mesa-mena yadhale! Khapegheya nu aghi wina hi zanshi yalo!”

³⁵ Ghanan thangthang aghi sa ntsawa sa nu Kadimi Ahab na Siriya nyithu wiwa ghangla ma gorugari miwi maghaki wa. Ma yisü wi ajjü na lle cüla gorugari ccü pong, nu minulen wi shüa.

³⁶ Aghani na du keten pang wi ahza pi Israel süpahizi jawi khichia: “Anyi tsüdila papa diyyiwa nu anyunuti wi wha nenglo.”

³⁷ Tsalina Kadimi Ahab na shü nu ma kamang pvü wa Samaria wi vhüa.

³⁸ Apvüwa na tsüti sa benle khi ketheng ti, mathu na ma gorugari sen wa Samaria cüceng wi keqheza menkedsathu na atssükizü keten pen witsü bhu nu ciwi affüthu na ma jjü menne.

³⁹ Kadimi Ahab kekuli, ma asayha pi ma kadijjen tsikesa nu anyunutithu kesa cükithu tsüdila Israel kadimithu cükikezhü wi zhü theng.

⁴⁰ Ma keshü wi ma tsa Ahaziya na ma shiwa sa kadimi saya.

Judah Kadimi Jehoshafat

⁴¹ Israel Kadimi Ahab na kadikesa mapi mejüwa wi Asa tsa Jehoshafat na Judah wi Kadimi saya,

⁴² ma kahang mapi changha nu manga wi ma kadimi sa nu Jerusalem wi amapi ngwe nu manga kekhang sen. Ma jja na Shilhi nga Azuba.

⁴³ Ma ba Asa ti ma la Apvüwa tuwi kemeshonwa tsü sa. Isala Anyiza nkechüthu kekinyipenthu tsü meyasa, nu anyithu na ciwi ahhansha sa nu hankedemvu mecang pi kinyi.

⁴⁴ Jehoshafat na Israel Kadimiwa ssinu keccawa sa.

⁴⁵ Jehoshafat kekuli, ma kempvüza sa nu ma aghikesa cükithu tsüdila Judah kadimithu cükikezhü wi zhü theng.

⁴⁶ Ma ba Asa tsüwi na gho nansü kecu keben Anyiza nkechü kekinyipenthu wi keqheza menkedsa nza nu npvüzathu tsüdila pa pi nmi thsüla.

⁴⁷ Edom yyiwi kadimi na nmi; Judah Kadimiwa na ma kekhu wi kedi pi ciwi kekhang sen thsüden.

⁴⁸ Kadimi Jehoshafat na ahunjjenthu sa nu wa Ofir yyiwi suna pvüden; isala tsüthu na Eziongeber wi yasa nu nwala.

⁴⁹ Israel Kadimi Ahaziya na ma nyithu pi Jehoshafat nyithu gweghe wa thsü, isala Jehoshafat na tsüti nsa mvu.

⁵⁰ Jehoshafat na shü nu pi David Nyunutiwa wi kadishüjjenthu wi vhüa, nu ma tsa Jehoram na ma shiwa sa kadimi saya.

Israel Kadimi Ahaziya

⁵¹ Judah Kadimi Jehoshafat na kadikesa mapi tagha nu tagü wi Ahab tsa Ahaziya na Israel Kadimi saya, nu ma Samaria wi amapi keni kekhang sen.

⁵² Ma ba Ahab, ma jja Jezebel, nu Kadimi Jeroboam tsüthu na Israel ssi wa kesami wi chikesa gheshighena tsütsonca tsü nie nu sami pi Apvüwa shun.

⁵³ Ma ma ba ti Baal kinyi nu tsü kekuli sa nu Apvüwa Israel Nyizawa lebenketsu cüssia.