1 KADIMITHU 21 - Kemethajüh (N) (Re-editing) Bible (BSI)

Naboth Ji Kemeshentsse Lli

¹ Jezreel wi Kadimi Ahab kadijjen kete wi kemeshentsse lli kesü na ben, nu tsüna anyi kesü ma nyan Naboth tsü ji.

² Ghanan kesü Ahab na Naboth wi khi, “Hi ya no kemeshentsse lli tsü yaya thsülo; tsüna hi kadijjen kete ghena hi ayyi tsüpi awwenja sanku kesü saya mvu benle. Hi tsü mithon wi kemeshentsse lli kemehaiki kesü pi no cüaben, nyelela no nen lethu, hi ma men kemehai sapi no cüaben na.”

³ Naboth na khineng, “Hi ha ibamyithu wina ghongkeya. Hi no ya ha yathsüle kesa Apvüwa na khenben le.”

⁴ Ahab na Naboth mangwale ma kiza khe tsü ghena ma hathana nu aghepvüla ajjen wi wha. Ma mangla ndsala ma we wi jen nu ajjen-keshon wiwa peghewa.

⁵ Ma wubvü Jezebel na ma wi wha nu keü, “Mangkesa na nhathana ben nu? Mangkesa na mangla ndsala ben nu?”

⁶ Ma luneng, “Hi Naboth wi hi ya ma kemeshentsse lli tsü shüya thsüa nyelela ma nen lethu, tsü ghena kepa wi kesü pi ma cüa le khi, isala ma hi tsü yaya nbenle hi kekiza ghena le!”

⁷ Jezebel na khineng, “No kadimiwa nye kwe? Shagha n-nonghethi nu dsajjü yalo. Hi Naboth ji kemeshentsse lliwa tsü yapi no cüaben le!”

⁸ Ma Ahab nyan wina lesü zhüya nu ma kemechanji pi tsüthu jenya, nu tsüthu kesun pi Jezreel wi kahang kedithu nu ccülikesathu cüa.

⁹ Lesükezhü tsü kekhi na: “Kezi tsathang kesü pi thangchi, anyithu cighu chi nu kinyikü penwa tsüpi Naboth cülo.

¹⁰ Ketesü nyi meshu keni pi ma tuwi ma Anyiza nu Kadimiwa kekishencü ghena ma kimenni thsülo. Tsaseng wi ssi shula anyunuti na ameiwa alon pi ma kecenthi thsülo.”

¹¹ Jezreel wi kahang kedithu nu ccülikesathu na Jezebel na kekhi ti sa.

¹² Mathu na kezi tsathang kesü pi thangchia, anyithu cighu chi nu kinyikü penwa tsüpi Naboth cüa.

¹³ Ketesü nyi meshu keni na anyithu tuwi na ma Anyiza nu Kadimiwa kekishencü ghena ma kimenni, tsalina ma ssishula anyunuti na ameiwa alon pi ma kecenthia.

¹⁴ “Naboth pi shü thsüdha le,” kesa ketsijüh kesun pi Jezebel wi chicüa.

¹⁵ Jezebel na ketsijüh tsü muya meyi ma Ahab wi khi, “Naboth na shüdha. Khili wala ma kemeshentsse lli pi no wi njeü mvula kesawa tsü khupi nji sayalo.”

¹⁶ Ahab na kaghaji wa kemeshentsse lliwa tsüpi ma ji saya.

¹⁷ Tsaseng wi Apvüwa na atusenjüh-kechü Tishbe wina keghowa Elijah wi khi,

¹⁸ “Samaria Kadimi Ahab wi walo. No ma Naboth ji kemeshentsse lli tsü yayale ciwi keben muyaben.

¹⁹ Hi Apvüwa na ma kiza benle kiza lo, ‘Anyiwa tsü kepathi seng wi no ma keben la khuyale ben kwe?’ Hi hati khibenle ma kiza lo, ‘Affüthu na Naboth jjü kemenne pen witsü mathu na njjü la menne ben!’ ”

²⁰ Khathansha wi Ahab na Elijah muya khe ma khi, “Ighinyiwa, no hi muyadhala?” Elijah na luneng, “Anle, hi no muyadha. No ketanla no pi Apvüwa tuwi kesazziwa tsü satha wadha.

²¹ Tsalina Apvüwa na no wi khiben, ‘Hi kededi sengho nmiwi chiden. Hi nshi denthi nu ntheghi wi npvüza ghanyi le keqhai lela tsüdi yasa cüden.

²² Ntheghi na Nebat tsa Kadimi Jeroboam theghi ti nu Ahijah tsa Kadimi Baasha theghi ti sa ben, kepaghenanye no Israel ssi wa kesami wi chi nu ilebenketsu cüssidha.’

²³ Nu Jezebel ghena, Apvüwa na Jezreel nyunutiwa witsü affüthu na ma kamang dsabenle khiben.

²⁴ Nshili kesü le kesü lela anyunuti wi keshüwa kamang tsü affüthu na dsa ben, nu alli wi keshüwa kamang tsü kamang kemcüwathu na mcüaben.”

²⁵ (Ciwi anyi kesüla Ahab ti ma wubvü Jezebel na ma kesun pi ma ketanla ma pi Apvüwa tuwi kesazziwa tsü satha wakesa nmi.

²⁶ Ma kesami nkemejüghe ntsawa kesa na kheni Israel nyithu na atujügükewa wi Apvüwa na ayyi ciwi jügüshikesa Amor nyithu na kesa ti atsikezhüthu tsü kekinyi.)

²⁷ Elijah na ajüh kekhi cen seng wi Ahab na ma thsümeni mezüqhe, tsüthu khushia, nu aleshithsü pvüya. Ma kedsakejjü nsen mvula aleshithsü mphi nu jen, nu ammijangthi nu ahathanathi la kegoe.

²⁸ Apvüwa na atusenjüh- kechüwa Elijah wi khi,

²⁹ “No Ahab na khatila ituwi ma ketanla ma satemeni khe muyadha ma? Ma hati kesa ghena ma kahang tsüwi hi kededi sengho ma miwi chi nben, tsüna ma tsawa kahang tsüwi hi kededi sengho Ahab theghi miwi chiben.”