1 KADIMITHU 20 - Kemethajüh (N) (Re-editing) Bible (BSI)

Siriya Ssinu Aghikesa

¹ Siriya Kadimi Benhadad na ma süpahithu tsüdi saghuya, nu kepa wi kekhang kesenthu changha nu keni na mathu goru nu gorugarithu pi ma kiqa, ma wala Samaria vüya nu tsü ssikaghashen.

² Ma nyilothu kesun pi anyunutiwa wi Israel Kadimi Ahab wi khi thsü, “Kadimi Benhadad na

³ no nji rükatssü, suna, nzathu nu ghanyi kezü ntsathu pi ma kwendu thsülo khie ben.”

⁴ Ahab na luneng, “Kadimi Benhadad ipvüwa wi ma hi nu hi keben tsüdila yaya mehaile kiza lo.”

⁵ Tsaseng wi nyilothu na kheneng Benhadad wina kekhie kepa wila khusen Ahab wi gho: “No rükatssü, suna, nzathu nu ghanyithu pi ikwen wi chilo kesa ajüh pi no wi kesunchi.

⁶ Isala khili hi ikekhu wi kedithu kesun pi no kadijjen nu nkekhu wi kedithu jjen wi chi nu mathu na atsanqai ma men kebenthu tsüdi khuya thsüaden. Mathu na dhitsü wi hathansha ciwi ghoaben.”

⁷ Kadimi Ahab na diyyiwa wi ccülikesathu tsüdi cichi nu khi, “Ghangchilo, anyi hawa ha ithu yasa mvu benle. Ma nyilo kesü kesun pi hi wi iwubvü nu ghanyithu, rükatssü nu suna khie thsü, nu hi anlo kizadha.”

⁸ Ccülikesathu nu anyithu na luneng, “Ma jühkekhi tsü mangla nkinala; mangla pi ma ncü lalo.”

⁹ Tsalina Ahab na Benhadad nyilothu wi khineng, “Kadimi Benhadad ipvüwa wi ma hi wi kekhie atuwa tsü saya mehai, isala keniwa tsü hi saya nbenle kiza lo.” Nyilothu na teshi nu bvüa nu kheneng

¹⁰ Benhadad wina ajüh kepa wi sen nu gho neng: “Hi n-nyunuti tsü keyasa qo anyithu ssinu ghoden, nu mathu kwen wi alonketizü lela pvü bvüaben. Keujüla hi tsüti nsala lethu, acenpvüthu na hi pathi kesawa salo.”

¹¹ Kadimi Ahab na luneng, “Kadimi Benhadad kiza lo, atsentsa süpahi kesü na aghi npi kewa wi nyela aghikesa seng wi ccüna kapvü tenle.”

¹² Benhadad nu ma pfüwa kepa wi kekhang kesenthu na mathu nithsüjjen wi jjükeben wi Ahab na keluneng tsü muya. Ma ma nyithu na wa anyunutiwa tsü ssisale kidenyalo ahza khuchia. Tsalina mathu wala anyunutiwa tsü ssisale kidenya.

¹³ Tsü tsüwi atusenjüh-kechü kesü na Kadimi Ahab wi wa nu khi, “Apvüwa na khiben, ‘Süpahizi tenti keti tsü nmessila! Hi nansü no tsü miwi khangkeya pi no cüaden, nu no hi Apvüwa le kesa chüyaben.’ ”

¹⁴ Ahab na keü, “Thowa na aghi ssi waten nu?” Atusenjüh-kechüwa na lunneng, “Apvüwa na khiben, süpahi pvünyithu na elakha ahngthu jühkina nu tsü sa ben.” Kadimiwa na keü, “Thowa na aghi sa ssi chiben nu?” Atusenjüh-kechüwa na luneng, “No sa benle.”

¹⁵ Tsalina kadimiwa na elakha benchüthu kekhu wi keben süpahi pvünyithu 232 cishiya. Tsaseng wi ma Israel nyi süpahizi kesaghu hazar tagü cishiya.

¹⁶ Ghanan lapvü wi Benhadad nu ma pfüwathu changha nu keni na mathu nithsüjjen wi jjüpi adina keben wi ssikesali shhu.

¹⁷ Süpahi pvünyithu na atuwa sa atujügü shhu. Benhadad na wahhaithu kesun pi shhu thsü, nu mathu na ma wi süpahithu akhang kesü na Samaria wina shhugho tenle khi.

¹⁸ Ma ahza khuchia, “Mathu na aghi sale ghole, nyelela keccawa sale kesalina ghotenle khi lela mathu kahang ghan yalo.”

¹⁹ Süpahi pvünyithu na atuwa sa, nu Israel nyi süpahizi na tsü shiwa sala ssikesali shhu,

²⁰ nu meshu kesüsü ma ssisa kebenwa pathia. Israel nyithu na Siriya nyithu jügü zighe nu mathu na bvüshan, isala Benhadad na goru kessithu pahan gweghe goru miwi na bvüya.

²¹ Kadimi Ahab na wala goruthu nu gorugarithu ghanya, nu Siriya nyithu chaya.

²² Tsaseng wi atusenjüh-kechüwa na wa Kadimi Ahab wi khi, “Kheneng wala nsüpahithu satezü nu mehaitsü kidenyalo, kepaghenanye Siriya kadimiwa na vvüthi wi leghe tsüwi gho no ssisa neng ben.”

Siriya Nyithu Ssikesali Keniwa

²³ Kadimi Benhadad kekhu wi kedithu na ma wi khi, “Israel cenpvüthu tsüna ayikha cenpvüthu le, tsalina Israel nyithu na ithu chaya le. Isala ithu na deshentijüthu wi mathu ssisa lethu, ithu na mathu chaya metsi benle.

²⁴ Khili kekhang kesenthu changha nu keni tsü mathu pen wina khupi nu benchüthu pi mathu mithon salo.

²⁵ Tsaseng wi no süpahizi no dedikesa tsüju, goru nu gorugarithu tsü meceqe saghuya. Isathu ithu na wala deshentijü wi Israel nyithu ssisa, nu nansü tsü ithu na mathu chaya ben.” Kadimi Benhadad na anlo khi nu mathu na kekhi tsü nie.

²⁶ Tsü shiwa leghe tsüwi ma nyithu ciya nu Aphek nyunutiwa wi Israel nyithu ssisale mathu na lentsen wa.

²⁷ Israel nyithu la cighu chi nu kidenya; mathu na wa akhang keni sala kemnanpen sapi Siriya nyithu wiwa pegheya. Siriya nyithu na diyyiwa pong kebenthu tuwi Israel nyithu na anenithu akhang kizzakeu keni ti sa.

²⁸ Atusenjüh-kechü kesü na Kadimi Ahab wi wa nu khi, “Hawa ha Apvüwa na khiben; ‘Siriya nyithu na hi deshentijüthu nyela yyishiphon thu cenpvü kesüle kekhi ghena hi mathu süpahizi tenti miwi khangkeya pi no cüaden, nu no nu n-nyithu na hi Apvüwa le kesa chüya ben.’ ”

²⁹ Siriya nyithu nu Israel nyithu na ghanan tagü mathu kemnanpen wi benla khokho keghangli. Tagü ghanan wi mathu kesali shhu, nu Israel nyithu na Siriya nyithu hazar meza kesü pathia.

³⁰ Hang keyathu na bvü sen nu Aphek nyunutiwa wi dua, nu ciwi anyunutiwa khweti na anyi hazar ngwe nu tagü miwi qanca dugho. Benhadad na bvü wa anyunuti wi ajjen kesü non wi kuthi wa.

³¹ Ma kekhu wi kedithu na ma wi wa nu khi, “Israel nyi kadimithu na nyu nantizen tenle kesa ithu na zayale. Aleshithsü pi ithu geshi qhanya nu ali pi ithu sun kejiya nu Israel kadimiwa wi wa thsülo. Ma no kahang heisha cüla nchüle.”

³² Tsalina mathu na aleshithsü pi mathu geshi qhanya nu ali pi mathu sun kejiya nu Ahab wi wa nu khi, “Nmaghawa Benhadad na no ma kahangli heisha cülo khieben.” Ahab na luneng, “Mantsadha, ma khilila hangben kwe? Ma icünyuwa kesü ti kesale!”

³³ Benhadad kedithu na azensu kemehai kesü tsü ghang keben wi Ahab na “icünyuwa” khi kechi wi mathu na wan ma jüh tsü khuya nu khi, “No kekhi ti Benhadad na ncünyuwa le!” Ahab na ahza khuchia. “Ma ssinu hi wi gholo.” Benhadad na kegho wi Ahab na ma pi ma gorugari wi chiya.

³⁴ Benhadad na ma wi khi, “Hi iba na nba wi khukeya anyunutithu tsüpi no cü neng shaden, nu iba na Samaria wi kesa ti no la no ghena Damaska wi asenkesapen kesü saya mehai.” Ahab na khineng, “Ajjügi hathu miwi na hi no lisha chicüaden.” Tsalina Ahab na ma ssinu keponghu kesü sa nu ma ya bvü thsüa.

Atusenjüh-kechü kesü na Ahab Kemeshensa

³⁵ Apvüwa na ayenkhukechi kenie wina atusenjüh-kechü akhang kesü jawi atusenjüh-kechü kesü na ma pvüshangwa na ma shon cülo khi. Isala ma tsüti tsü nsamvu,

³⁶ tsalina ma anyi tsüwa wi khi, “No Apvüwa jühkhukechi tsü n-niela kesa ghena no hi teshi nu bvü meyi ssensitemi kesü na no ghan shaben.” Isanu ma bvü meyi ssensitemi kesü na gho ma ghan.

³⁷ Tsaseng wi atusenjüh-kechü hawa ha anyi kepa wi khi, “Hi shon cülo.” Anyi hawa na tsüti sa cüa; ma taghan ma shon cü nu ma patena.

³⁸ Atusenjüh-kechüwa na athsü pi ma mmi qhanya nu matsisa kemili pvü wa alen wi ngan nu Israel Kadimiwa na tsü pvüdhi kewa hieben.

³⁹ Kadimiwa na pvüdhi wa keten wi atusenjüh-kechüwa na ma cichi nu khi, “Njenkeben Kadimiwa, hi aghi sa keben wi süpahi kesü na aghinyi kesü ghansen hi wi gho nu khi, ‘Anyi ha hieben lalo; keujüla ma pi bvü thsü lethu, no kahangli pi tsü dhiben nyelela rükatssü hazar kecheng pi kedhikejü sa ben.’

⁴⁰ Isala hi pala kepa wi ghena dhamang wa nu anyi tsüwa na bvüle.” Kadimiwa na luneng, “No ketanla no keshü khie keyadhani. No tsü kutimen dhiben.”

⁴¹ Atusenjüh-kechüwa na athsü pi ma mmi keqhan tsü mezüqhe, nu kadimiwa na wan ma atusenjüh- kechü nyi kesüle kesa chüya.

⁴² Atusenjüh-kechüwa na kadimiwa wi khi, “Hawa ha Apvüwa jüh le: ‘Hi anyi tsüwa pi shü thsülo khichi ketheng wi no ma pi bvü thsü kesa ghena no kahangli pi tsü dhiben, nu nsüpahizi na ma süpahizi pi bvü thsü kesa ghena mathu yasa ben.’ ”

⁴³ Kadimiwa na ma leben güccü nu ahathanala ma jjen Samaria wi wha neng.