1 KADIMITHU 18 - Kemethajüh (N) (Re-editing) Bible (BSI)

Elijah nu Baal Tusenjüh-kechüthu

¹ Matsü pahan seng wi kemegi mapi kechengwa wi Apvüwa na Elijah wi khi, “Hi atsankegho kesun pi ayyiwi chi cüden na no wala Kadimi Ahab tuwi nganlo.

² Tsalina Elijah na wa.” Tsü tsüwi Samaria wi azeng na nmehai ntsa saben,

³ tsalina Ahab na ma kadijjen wi kediwa Obadiya cichi. (Obadiya na lebentsentsa wi Apvüwa kinyi keten nyi kesü,

⁴ nu Jezebel na Apvüwa tusenjüh-kechüthu pathi keben wi Obadiya na anyi meza kesü ssi wa denini khang keni sala mathu pi alonshiku wi kuthi, atsse nu atssü pvü pi mathu cü.)

⁵ Ahab na Obadiya wi khi, “Ithu wala ayyi maben wi atssükebvüpen nu aghaku ghüsa tsüdi wi ithu goru nu gadathu ghena aghang kemejjü muyala nye khe ghang wa na. Isanu ithu na ithu sahang kesüla npathi la na.”

⁶ Manyi tsüti cenya nu ayyi khi gishü nu kepapa dulu wi bhale sa, nu manyi alen kepapa wi wa.

⁷ Obadiya na wa keten wi ma alenca wi zulila Elijah metuya. Obadiya na ma chüya nu wa ma tuwi kukedu nu keü, “Kediwa, ha ntsakhiwa no kwe?”

⁸ Ma luneng, “Anle, hi Elijah le. Wala hi hewi benle npvüwa Kadimiwa kiza lo.”

⁹ Obadiya na luneng, “Hi mangwa sazzi theng nu no Kadimi Ahab ya hi pathi thsü mvuben nu?

¹⁰ Hi hangkebenwa Apvüwa n-Nyiza nyan wina kishen ben, Kadimiwa na ayyi wi diyyi tsüdi wi no bhadha. Khathansha wi diyyiwa wi kekhang kesenwa na no ma diyyiwa wi nmile khi khe, Ahab na kekhang kesenwa ya no nmule khi kishen thsüden.

¹¹ No khili hi wala no hewi benle ma kiza thsü mvuben nye?

¹² Keujüla hi bvü meyi Apvüwa ghamu na no ssinu nyu nkechü pen wi wa lethu khati sa nu? Isanu hi Ahab kiza la no hewi benle nu ma gho no mu meyala lethu, ma hi pathiaben. Meshenyalo hi ghanyi keben tsüwi na leben tsentsa sa Apvüwa kinyi kegho nyi kesüle.

¹³ Jezebel na Apvüwa tusenjüh-kechüthu pathi keben wi hi mathu meza kesü ssi wa denini khang keni sala mathu pi alonshiku wi kuthi, nu atsse nu atssü pvü pi mathu kecü cüki tsü nza kwe?

¹⁴ Tsalina no khati nu hi wala no hewi benle kadimiwa kiza lo khiya mehai nu? Ma hi pathia keben na?”

¹⁵ Elijah na luneng, “Hi hang kebenwa Apvüwa Kemisintsa hi ma kekuli sa ketenwa nyan wina hi nansü kadimiwa tuwi ngan tenle kesa khishiben.”

¹⁶ Tsalina Obadiya na wala kadimi Ahab kiza, nu Ahab na Elijah metule wa.

¹⁷ Ahab na ma mukeya wi khi, “No hewi benla — Israel wi kekivvü nkemehai ntsa sachi ketenwa!”

¹⁸ Elijah na luneng, “Hi kekivvü sa kechiwa tsü nyele. Isala no nu nba nshinyi le. No Apvüwa yenkhukechithu tsü nkinala Baal tsikezhüthu tsü kinyiben.

¹⁹ Khili ahza khuchi nu Israel nyi tsüdi gho Karmel Yikha wi hi metu thsülo. Baal tusenjüh-kechüthu 450 nu acenpvü nzawa Asherah tusenjüh-kechüthu 400 nu mathu kiqa ketenwa kadijja Jezebel gweghe ssigholo.”

²⁰ Tsalina Ahab na Israel nyithu nu Baal tusenjüh-kechüthu tsüdila gho Karmel Yikha wi kemetulilo cichi.

²¹ Elijah na anyithu wi shhu nu khi, “Matsü khathu khati nthu leben wi kesütu benten nu? Keujüla Apvüwa tsüna Anyiza lethu, ma kinyikülo; isala keujüla Baal tsüna Anyiza lethu, ma kinyikülo!” Isala anyithu na mangla nkhi.

²² Tsaseng wi Elijah na khi, “Khili Apvüwa tusenjüh-kechü na hi ketan sadha, isala Baal tusenjüh-kechüthu na 450 ben.

²³ Amesü süpon keni sengholo; Baal tusenjüh-kechüthu ya kesü khupi pathi, tsü hahzighe pi achan miwi chi — isala anni pi nchila. Hi la amesü süpon kepawa tsü khupi tsü makesü saya na.

²⁴ Isanu Baal tusenjüh-kechüthu ya mathu cenpvü wi kekhie sa thsü, nu hi la Apvüwa wi kekhie sa na. Isathu, kekhie luneng nu anni kesunchi kecü cenpvüwa tsüna Anyiza le!” Anyithu na luneng, “Tsü yaqo le, no kekhi tsüti sa na!”

²⁵ Tsaseng wi Elijah na Baal tusen- jühkechüthu wi khi, “Nthu na anyi kejon ghena nthu na atuwa sa amesü süpon kesü tsü seng wa kidenyalo. Nthu cenpvü wi kekhie sa, isala anni pi achan tsü nmecangla.”

²⁶ Mathu na amesü süpon sengho mathu kecüwa tsü khuya, tsü kiden-keshaya, nu mathu na aghanen na wa ghanan lapvü kecu Baal wi khie. Mathu na jisha, “Ithu luneng chilo, Baal!” nu mathu na nashü nu kekinyipen sa ketheng tsü vü. Isala mathu keluneng mangla ngho.

²⁷ Ghanan lapvü witsü Elijah na mathu nankeqhe shagha nu khi, “Tsü miwi misipfü khielo! Ma acenpvü kesü le! Ma aghanan wi khhali nu jenmi wa benla ben, nyelela ma kijünyi wa dhashe! Nyelela ma jen benshe, nthu na ma pamechü nchithu yishü le!”

²⁸ Tsalina atusenjüh-kechüthu na tsü miwi misipfü khie, nu mathu keccüna yen kenie wina alliseng nu annu pi ajjü npi keshhugho chu mathu gwo handhi.

²⁹ Minulen wi kekinyi tsü kecu wi mathu na aghepvü nu magha lela mathu luneng nchi, nu ahhai mangla za meya.

³⁰ Tsaseng wi Elijah na anyithu wi khi, “Hi tetsaki gholo,” nu mathu tsüdila gho ma vüla saghuya. Ma Apvüwa kekinyipen yasa kesawa tsü sapfüya.

³¹ Ma Apvüwa na Jakob nyan pi Israel ci kecüwa tsathu amizza taghakeni tsü kesüsü nyan wina alon taghakeni khuya.

³² Ma alon tsüthu pi Apvüwa kekinyi ghena kekinyipen kesü saya. Ma atssü liter taghamejü-u pi danya kemehai ghena ayyiku kesü chhü pi tsü kevüliya.

³³ Tsaseng wi ma achan pi kekinyipen miwi chiya, amesü süpon sa tsü hahzighe pi achan miwi chiya, nu ma khi, “Atssü pi alakhü mejü pongya nu tsüpi kekinyi nu achan miwi keshusha chilo.” Mathu na tsüti sa,

³⁴ isanu ma khi, “Tsüti sa nenglo,” nu mathu na tsüti sa. Ma khi, “Kuti tsüti sa nenglo,” nu mathu na tsüti sa.

³⁵ Atssü na llepongca sendu kekinyipen chhü kevüli ketheng tsü pongya.

³⁶ Minulen wi kekinyi tsü witsü atusenjüh-kechüwa Elijah na kekinyipenwa tsü tetsaki gho nu kekhie sa, “O Apvüwa, Abraham, Isak, nu Jakob Nyizawa, khili no Israel Nyizawa nu hi nmaghawa, nu ha tsüdila no hi salo kesa ti sadhale kesa chütha yathsülo.

³⁷ Hi luneng chilo, Apvüwa, hi luneng chilo; isanu anyi hathu ya no Apvüwa, Anyiza, no ketanla mathu ssi neng sen nu no wi ghobenle kesa chüya thsülo.”

³⁸ Isanan Apvüwa na anni kesunchi pi ahhanshakesa, achan, nu alonthu tsü mecang thsüa, ayyi na sah ntsa sa nu ayyi kechhüku wi atssü tsüna qha wa.

³⁹ Anyithu na ha mukeya wi mathu na ayyi wi qancadu nu magha, “Apvüwa, no Anyiza le! Apvüwa ketan na Anyiza le!”

⁴⁰ Elijah na ahza khuchia, “Baal tusenjüh-kechüthu tsü ghanyalo; mathu kesüla nbvü thsüla!” Anyithu na mathu tsüdila ghanya, nu Elijah na mathu ssinu Kishon Kuza wi cü nu mathu pathia.

Kemegi Sakhenkesa

⁴¹ Tsaseng wi Elijah na Kadimi Ahab wi khi, “Khili wala dsajjüya yilo. Hi atsan na ghole keshigü hhai za bendha.”

⁴² Ahab na dsajjüle wa kesa jü Elijah na Karmel Yikha shoni wi ki ma li pi ma khu keni jüwi chila ayyi wi kukedu.

⁴³ Ma ma maghawa wi khi, “Wala atssükedone wiwa ghangchilo.” Amaghawa na wa nu kheneng gho khi, “Hi pala kesüla nmule.” Elijah na ma tagü tughu wala ghangchilo ma kiza.

⁴⁴ Tagü tughuwa wi ma kheneng gho nu khi, “Hi atssükedone wi akulukeshü cü kizzakeu kesü anyi kwen cu kesa na shhugho keten mule.” Elijah na ma maghawa wi kiza, “Kadimi Ahab wi wala atsangho pi ma npi kekhen jü na ajjen wi whalo kiza lo.”

⁴⁵ Matsü keu jüwi akulukeshü kejang na atssan pongya, ameghü na sho, nu atsan na shathi ntsawa gho dughoa. Ahab na ma gorugari miwi kiya nu Jezreel wi wha neng.

⁴⁶ Apvüwa kekhang na Elijah miwi gho; ma ma thsü pi ma geshi qhanya nu Ahab tuwi na bvü sen nu Jezreel wi wa.