1 KADIMITHU 17 - Kemethajüh (N) (Re-editing) Bible (BSI)

Elijah nu Kemegi

¹ Gilead yyi Tishbe wina kegho atusenjüh-kechüwa kesü ma nyan Elijah na Kadimi Ahab wi khi, “Hangkeben Apvüwa Israel Nyizawa, hi ma kekuli sa ketenwa nyan wina hi atsangholo npi kekhichi chu ciwi amapi keni nyelela kecheng atsankegho nyelela akejan na nmila benle kesa hi no wi kiza ben.”

² Tsaseng wi Apvüwa na Elijah wi khi,

³ “Apen ha teshi nu nishu wiwa wala Jordan na nishuwa Kherith kuza kete wi kuthi walo.

⁴ No ciwi akuza tssü tsü jjüben, nu hi aduwe kizzawa ya kedsakejjü piegho no cülo kiza chidha.”

⁵ Elijah na Apvüwa jühkhukechi tsü kina nu wala Kherith kuza kete witsü ben wa.

⁶ Ma akuza tssü tsü jjü, nu aduwe kizzawa na aghanen nu minulen kaghapen amesa nu asa piegho ma cü.

⁷ Matsü keu seng wi atsankegho nmila kesalina akuza tsüna qha.

Elijah nu Zarefath wi Denyilewa

⁸ Tsaseng wi Apvüwa na Elijah wi khi,

⁹ “Khili wan Sidon kete Zarefath nyutiwa wi wa nu ciwi benlalo. Hi ciwi hang keben denyile kesü kedsakejjü pi no cülo kiza chidha.”

¹⁰ Tsaseng wi Elijah na Zarefath wi wa, nu ma anyuti kaghapeng jenka kete wi gho nan ciwi denyile kesü na achan gha keben muya. Ma nzawa wi khi, “No nchala atssü sengho hi jjüya thsülo.”

¹¹ Nu nzawa na tsü senghole wa keten wi ma ci neng chi nu khi, “Ighena amesa la pahan sengholo.”

¹² Nzawa na luneng, “Hi amesa kesüla nmile kesa hangkebenwa Apvüwa n-Nyiza nyan wina kishen ben. Hi keben na akhuzza wi awheng amesheng kesü nu alakhü wi oliv deli keu ketan benle. Hi hewi achan pvü whala ajjen wi itsawa ishinyi ghena atsse kuti sayale ghabenle. Tsüna ishinyi ghena kedsakejjü sakhenwa sa nu tsaseng wi ishinyi na khwenthi shüa tendha.”

¹³ Elijah na nzawa wi khi, “Ahatha n-nala, wala ntsse salo. Isala atuwa sala no mangwa ben khe tsüpi amesa shamlu kizzakeu kesü gü sengho hi cü nu ciwi ccüna pi ntsawa nshinyi ghena güyalo.

¹⁴ Kepaghenanye Apvüwa Israel Nyizawa na hati khiben: ‘Hi, Apvüwa na atsankegho kesunchi keten tsathang npi tuwi akhuzza wi awheng nyelela alakhü wi adeli tsü nmila sa nben.’ ”

¹⁵ Denyilewa na wa Elijah na ma kekiza ti sa, nu ghanan kejon mathu tsüdi kedsa qo benya.

¹⁶ Apvüwa na Elijah wi khishi ketheng ti akhuzza wi awheng nu alakhü wi adeli na nmila nsa.

¹⁷ Matsü pahan seng wi denyile tsawa na naa; ma nmehai pfüpfü wala asakhen wi shüa.

¹⁸ Nzawa na Elijah wi khi, “Anyiza nyiwa, no mangkesa na imiwi hati saben nu? No hewi gho hi kesamithu pi Anyiza kiza nu itsawa ya shü thsüale sa kwe?”

¹⁹ Elijah na khi, “Pvüzanyiwa pi hi cülo.” Ma nzawa kwen wina pvüzanyiwa tsü pieki ajjenshha tangwa wi ma benketen keshondhi witsü dula ma pi awe miwi chia.

²⁰ Tsaseng wi ma misikhhali kekhie sa, “O Apvüwa iNyiza, no mangkesa na denyilewa ha miwi qhethiketen kesa hati sacü nu? Ma ituwi ccatssü ntsawa hi noncca ghonan, no khili ma tsawa shü thsüdha le!”

²¹ Tsaseng wi Elijah na wala ma miwi kecheng tughu nkhwen nu kekhie sa, “O Apvüwa iNyiza, ghanyi hawa kahangli yala ma miwi gho neng thsülo.”

²² Apvüwa na Elijah kekhie kina cüa; ghanyiwa na ma hathashu shagha nu hangya.

²³ Elijah na ghanyiwa tsü pie neng dugho ma jja cü nu ma wi khi, “Ghangchilo, ntsawa na hangyadha le!”

²⁴ Nzawa na luneng, “Hi khili no ntsakhiwa Anyiza nyi kesü nu Apvüwa na no ccünengten le kesa chüyadha le!”