1 KADIMITHU 16 - Kemethajüh (N) (Re-editing) Bible (BSI)

¹ Apvüwa na Hanani tsa Jehu atusenjüh-kechüwa wi khi nu Baasha ghena ketsijüh hapi ma cü:

² “No mangla nkenye nyi kesü isala hi no pi inyi ccüliwa sa thsü. No khili Jeroboam ti samidha nu inyithu ssi wa kesami wi chidha. Mathu kesami ghena ilebenketsu cüssidha,

³ tsalina hi Jeroboam tuwi kesa ti no nu ntheghi la yasatha sa cüden.

⁴ Ntheghi kesü le kesü lela anyunuti wi keshüwa kamang tsü affüthu na dsa ben, nu alli wi keshüwa kamang tsü kamang kemcüwathu na mcüaben.”

⁵ Baasha na ma kempvüza sala kekuli cükithu na Israel kadimithu cükikezhü wi zhü theng.

⁶ Baasha na shü nu pi Tirzah wi vhüa, nu ma tsa Ela na ma shiwa sa kadimi saya.

⁷ Apvüwa na Baasha nu ma theghi keshun ketsijüh tsüna atusenjüh kechüwa Jehu na pi cü, kepaghenanye Baasha na kesamithu sapi Apvüwa shun. Ma ma tuwi Kadimi Jeroboam na kekuli ti nkemehai kesa ketan nyela Jeroboam theghi tsüdila pathi kesalina Apvüwa lebenketsu cüssia.

Israel Kadimi Ela

⁸ Judah Kadimi Asa na kadikesa mapi ngwe nu tughowa wi Baasha tsa Ela na Israel Kadimi saya, nu ma Tirzah wi amapi keni kekhang sen.

⁹ Ma kekhu wi kedi kesü Zimri kadimi gorugarithu gishü pahanthu kenonccawa na acho kiden pi ma shun. Ghanan kesü Tirzah wi Ela na kadijjen wi kediwa Arza jjen wi adina pvü ben.

¹⁰ Zimri na ajjen wi dula Ela pathi nu ma shiwa sa kadimi saya. Hati kesa hana Judah Kadimi Asa na kadikesa mapi ngwe nu tagüwa wi sa.

¹¹ Zimri na kadimi saya meyi ma Baasha theghithu tsüdi pathikhia. Ma shili nu ma pvüshang npvüzathu tsüdi pi shü thsüa.

¹² Tsalina Apvüwa na atusenjüh-kechüwa Jehu wina Baasha keshun tsü kenie wina Zimri na Baasha theghi tsüdi pathia.

¹³ Baasha nu ma tsa Ela manyi na atsikezhü kekinyi nu Israel ssi wa kesami wi chi kesalina manyi na Apvüwa Israel Nyizawa lebenketsu cüssia.

¹⁴ Ela kekuli cükithu na Israel kadimithu cükikezhü wi zhü theng.

Israel Kadimi Zimri

¹⁵ Judah Kadimi Asa na kadikesa mapi ngwe nu tagüwa wi Zimri na Tirzah wi Israel miwi ghanan tagü kekhang sen. Israel nyi süpahithu na Filistia wi Gibbethon nyunutiwa tsü vü senben,

¹⁶ nu mathu na Zimri na acho kiden pi kadimiwa shun nu ma pathidha le kesa zakeya wi mathu tsüdila ciwi na mathu benchüwa Omri pi Israel Kadimiwa le thangchia.

¹⁷ Omri nu ma süpahithu na Gibbethon teshi nu wa Tirzah vüya.

¹⁸ Khathansha wi Zimri na anyunutiwa tsüna qancadha le kesa muya khe ma kadijjen khweti non witsü dula anni pi kadijjen tsü mecang kevüli chi nu ma anni wi shüa.

¹⁹ Ma sami pi Apvüwa keshun ghena hati sa. Ma tuwi Jeroboam na kekuli ti ma ketanla ma kesami nu Israel ssi wa kesami wi chi nu Apvüwa nkenenwa sa.

²⁰ Zimri kekuli pi ma kematang kekuli cükithu na Israel kadimithu cükikezhü wi zhü theng.

Israel Kadimi Omri

²¹ Israel nyithu na gishü zighe pi keni sa: Pahan na Ginath tsa Tibni pi kadimi sa thsü mvu sa, nu kepathu na Omri na kesawa nen.

²² Asakhen wi Omri nen kebenthu na khangya; Tibni na shü nu Omri na kadimi saya.

²³ Tsalina Judah Kadimi Asa na kadi sakeya changha nu kesüwa mapi wi Omri na Israel Kadimi saya, nu ma amapi taghakeni kekhang sen. Ma atuwa amapi tugho Tirzah wi kekhang sen,

²⁴ nu tsaseng wi rükatssü hazar tugho pi anyi kesü ma nyan Shemer wi Samaria yyishiphon wa tsü shüya. Omri na yyishiphon wa tsü khwetiya nu ciwi anyuti kesü saya, nu tsüpi kheni yyishiphon tsü pvüwa Shemer nyan wina pi Samaria ciya.

²⁵ Omri na ma tuwi kadimithu miwi sami kayi pi Apvüwa shun.

²⁶ Ma tuwi Jeroboam na kesa ti ma kesami sa nu anyithu ssi wa atsikezhü kekinyi thsü ghena kesami tsüna Apvüwa Israel Nyizawa lebenketsu cüssia.

²⁷ Omri kekuli nu ma sacenkeya cükithu tsüdila Israel kadimithu cükikezhü wi zhü theng.

²⁸ Omri na shü nu pi Samaria wi vhüa, nu ma tsa Ahab na ma shiwa sa kadimi saya.

Israel Kadimi Ahab

²⁹ Judah Kadimi Asa na kadikesa mapi changha nu tazenwa wi Omri tsa Ahab na Israel kadimi saya, nu ma Samaria wi amapi ngwe nu keni kekhang sen.

³⁰ Ma ma tuwi kadimithu miwi sami kayi pi Apvüwa shun.

³¹ Ma Kadimi Jeroboam kesami ti sami lela ma nonkwe meya; ma wala Sidon Kadimi Ethbaal nga Jezebel yaya nu Baal kinyi.

³² Ma Samaria wi kekinyijjen kesü sapi Baal cüa, ma ghena kekinyipen kesü sa nu pi kekinyijjen wi chia.

³³ Ma acenpvü nzawa Asherah tsiketon la kesü zhü. Ma ma tuwi Israel kadimithu tsüdi miwi Apvüwa Israel Nyizawa lebenketsu cüssia.

³⁴ Ma kadikesa tsüwi Bethel wina keghowa Hiel na Jerikho sa neng. Apvüwa na Nun tsa Joshua wina khi ketheng ti Hiel na Jerikho giketegü wi ma tsa tssütsewa Abiram, nu tsü kaghapeng jenkathu kesa wi ma tsa bvükhenwa Segub na nmila.