1 KADIMITHU 12 - Kemethajüh (N) (Re-editing) Bible (BSI)

Aghawa Mizzathu na Kivvükesa

¹ Rehoboam na Israel aghawa anyithu tsüdi Shekhem wi saghu nu ma pi kadimi sathsüle keben witsü wa.

² Khathansha wi Kadimi Solomon tubvü sen nu Ejipt wi wa kesawa Nebat tsa Jeroboam na jühtheü ha zaya khe ma Ejipt wina kheneng gho.

³ Aghawa mizza nyithu na nyu kesun pi ma cichi, nu mathu tsüdi gweghe wala Rehoboam wi khi,

⁴ “Nba Solomon na ithu miwi nmehai ntsa nu akhhi kekiyan pi ithu miwi chile. Keujüla no akhhi hathu tsü sapi mbhi thsüa nu ithu kahang ya ccakayi yathsü lethu, ithu na nkekhu wi benden.”

⁵ Ma luneng, “Ghanan kecheng seng wi ghonenglo hi nthu kiza ben na.” Tsalina mathu na bvüa.

⁶ Kadimiwa Rehoboam na anyi keqhaithu ma ba, Solomon kesansithu wi kecenkinali. Ma keü, “Nthu na hi khatile anyi hathu lunenglo khiten nu?”

⁷ Mathu na luneng, “Keujüla no anyi hathu ghena kemehaiwa sa lethu, no mathu kekhie kenenwa sapi cülo, isathu mathu na keshüthangla jühkeya wi ben nu no kekuli sa ben.”

⁸ Isala ma anyi keqhaithu na ma kesansijüh tsü teshi theng nu ma shüshathu wi wa nu tsüthu wi kecenkinali wa.

⁹ Ma mathu wi keü, “Nthu na hi khati salo khiten nu? Hi anyi mathu khhi tsü sapi mbhi cülo hi wi khie kebenthu wi ha mangwale khi nu?”

¹⁰ Mathu na luneng, “No hawa ha pi mathu nkizathu yishü: ‘Ikwen zanzza kizzawa ha na iba geshi miwi shakile!

¹¹ Iba na akhhi kekiyan pi nthu miwi chi; hi tsü sapi kiyanki thsüaden. Iba na kekihhele pi nthu kihhe; hi ajjüssi ghanu ti kesa pi nthu kihhe cüden,’ tsüti mathu kiza lo.”

¹² Ghanan kecheng seng wi Jeroboam nu anyithu tsüdila Kadimi Rehoboam na mathu kecükegwe kechi ti kheneng gho.

¹³ Kadimiwa na keqhaithu kesansijüh tsü teshi theng nu ajüh khang ntsa khipi anyithu kiza,

¹⁴ anyi kepvünyithu na khipi ma kekiza ti sa. Ma khi, “Iba na akhhi kekiyan pi nthu miwi chi; hi tsü sapi kiyanki thsüaden. Iba na kekihhele pi nthu kihhe; hi ajjüssi ghanu ti kesa pi nthu kihhe cüden. le.”

¹⁵ Hawa ha Apvüwa kemeshen, ma Shilo wina kegho atusenjüh-kechüwa Ahijah wina Nebat tsa Jeroboam wi khi ketheng tsü sacenle kesalina. Tsalina kadimiwa na anyithu jüh nkinala.

¹⁶ Anyithu na kadimiwa na mathu jüh nkinala kesa mukeya wi mathu na jisha, “David nu ma theghi teshilo! Mathu na ithu ghena mangwa sacü theng nu? Israel nyithu, ithu na kepapa jjen wi wha na! Rehoboam ya ma ketanla ma ghangya thsülo!” Tsalina Israel nyithu na matang shagha,

¹⁷ Rehoboam teshi pi Judah yyiwi hang keben nyithu miwi ketan kadimi sa thsüa.

¹⁸ Tsaseng wi Kadimi Rehoboam na meten pi kekuli sa kebenthu miwi kediwa Adoniram kesun pi Israel nyithu wi chi, isala mathu na alon pi ma kecenthia. Hati kesa wi Rehoboam na kaghajila ma gorugari wi duya nu Jerusalem wi bvüa.

¹⁹ Tsü nten na Israel kadiyyi aghawa nyithu na David kadishi tsü matang nu shun wa.

²⁰ Israel nyithu na Jeroboam na Ejipt wina kheneng ghodha le kesa zakeya wi mathu na anyithu keccünengli kesü wi ma cichi nu ma pi Israel kadimiwa sa thsüa. Judah mizza ketan David shicübvüghathu jühkeya wi ben.

Shemaiya na Atusenjüh-kekhi

²¹ Rehoboam na gho Jerusalem cukeya wi Judah nu Benjamin mizza wi süpahi kemehai ntsathu 180,000 cighuya. Ma aghi wa nu Israel aghawa mizzathu miwi tsü kekhang sen nengyale sa.

²² Isala Anyiza na Shemaiya atusenjüh-kechüwa wi kiza nu

²³ ketsijüh hapi Rehoboam nu Judah nu Benjamin nyithu tsüdi wi chü thsü:

²⁴ “Nthu cünyu Israel nyithu tsü nssikaghashenla. Nthu tsüdila ajjen wi whalo. Mangwa khati sadha khe tsüna hi kemeshenle!” Mathu tsüdila Apvüwa jühkhukechi tsü kina nu ajjen wi wha neng.

Jeroboam na Apvüwa wina Khapeghe Bvükesa

²⁵ Israel Kadimiwa Jeroboam na Efraim yyishiphon diyyiwa wi Shekhem nyutiwa tsü khweti nu matsü keu ciwi hang. Tsaseng wi ma tsü teshi nu wa Penuel nyutiwa tsü khwetiya.

^26-27 Ma ketanla ma wi khi, “Khili ha tsüwi ha, keujüla inyithu na Jerusalem wi wa Kekinyijjen wi ahhansha sapi Apvüwa cü lethu, mathu leben kemili pi Judah Kadimi Rehoboam wiwa ashusa wa nu hi pathiaben.”

²⁸ Kecenkinali kesa seng wi kadimiwa na suna pi amesü zza asüpon keni zhüya nu ma nyithu wi khi, “Nthu na Jerusalem wi kinyi wale kesa dhu mtsü. Israel nyithu, ha nthu cenpvüthu Ejipt wina nthu ssi keshhughowa tsüle!”

²⁹ Ma suna pi amesü zza süpon kesathu tsü kesü pi Bethel wi nu kepawa pi Dan wi chia.

³⁰ Tsalina anyithu na Bethel nu Dan wi wala kekinyi ghena samia.

³¹ Jeroboam na yyishiphon shonithu wi la kekinyipenthu sa, nu ma Levi mizza nkenye wi lela pi keqhaikedithu sa thsüa.

Bethel wi Kekinyi tsü Kemeshensa

³² Jeroboam na asha tazenwa taghamanga ghanan wi tsü Judah wi sa keten ti kesa keccüna kho kesü la sachi. Ma Bethel wi kekinyipen miwi tsü ahhanshathu sapi ma suna pi sa ketheng amesü zza süpon tsü cü, nu ma keqhaikedithu pi Bethel wi ma kekinyipen sa ketheng witsü kekuli sa thsüa.

³³ Asha tazenwa manga ghanan, ma ketanla atsathang ssan ketheng witsü, ma Bethel wi wa kekinyipen miwi ahhansha kesü sapi ma Israel nyithu ghena sa kechi akhowa tsü kemini sa.