1 KADIMITHU 10 - Kemethajüh (N) (Re-editing) Bible (BSI)

Sheba wi Kadijja na Hhainankegho

¹ Sheba wi kadijjawa na Solomon nyankemechan zaya, nu ma Jerusalem wi wala kekeü kedhu kesü pi ma ghan nanle sa.

² Ma ma ketsikinathu akhang keti kesü ssisen, cüdemvuthu, alon menkedhu, nu suna kejon pi sunsiesathu khhi sapvü nu gho. Khathansha wi ma gho Solomon metuya khe ma meshen keben kekeü tsüdi pi ma keü.

³ Solomon na tsüthu tsüdila luneng, ciwi ma khimetha chile kesa ma ghena kedhu mangla nmi.

⁴ Sheba wi kadijja na Solomon kemetsa zaya nu ma kadijjen kesa tsü mu.

⁵ Nzawa na Solomon miz wi ma kedsakejjü pi cü keten, ma kedithu kahang jjenthu, ma kadijjen wi kekulithu kecükepengyen nu mathu thsümeni pvü keten, kemishu wi ma hie keten amaghathu, nu ma Kekinyijjen wi ahhansha sapi kinyi ketenthu tsüdi mu. Ma tsüthu mu pi amansa nu ahathashu meyala.

⁶ Nzawa na Kadimi Solomon wi khi, “Hi hi diyyiwa wina no nu no kemetsa cüki zakeya tsüna ntsakhiwa le!

⁷ Isala hi ketanla gho tsüthu tsüdi npi mukeya chu hi tsü n-nondi. Isala hi tsü pahan ketan lela za meyale; no kemetsa nu keben-keyeng na nyu hi kekiza miwi ji kayi ntsa saben.

⁸ Nwubvüthu na khatila acenpvü bendha nu! Nu nmaghathu na keshüthangla ntuwi ben nu no kemetsa jüh kekhithu zakeya tsüna khatila acenpvü bendha nu!

⁹ Apvüwa n-Nyiza sengle! Ma no sapi Israel kadimiwa sa kethsü wina ma kenen pi no ccüca chidha. Kepaghenanye ma Israel ketizen na anuphan, ma no sapi mathu kadimiwa sa thsüdha, no ayenwa nu kemeshonwa tsü senya thsüle kesalina.”

¹⁰ Nzawa na aju sen keghothu tsüpi Kadimi Solomon cüa: Suna kilogram hazar mejü miwi nu cüdemvuthu nu alon menkedhu kejon. Nzawa na cüdemvu pi ma kecü na ji ntsawa sa nu ma khiela tsüjuju kutila mu meya.

¹¹ (Hiram hunjjen Ofir wina suna pvü keghowa tsüna ciwi juniper chan nu alon menkedhu kejonla pvü gho.

¹² Solomon na achan tsüpi Kekinyijjen nu kadijjen khwevü sa, nu pi akhwi kechüthu ghena harp nu lairthu la saya. Tsüna juniper chan kemehai ntsawa pvü pi Israel wi chiya; khili tsüti kesa nmu nengladha.)

¹³ Kadimi Solomon na mohho ntsa aju sapi Sheba wi kadijja kecü tsüdi miwi ma mangwa khie khe tsüdi pi ma cüa. Tsaseng wi kadijjawa na ma ketsikinathu ssisen Sheba yyiwi wha neng.

Kadimi Solomon Keben-keyeng

¹⁴ Amapi kaghapenla Kadimi Solomon na suna kilogram hazar ngwe nu kecheng kecen muya den;

¹⁵ tsüna asenkesathu na khajana pi kecü, asenkesa wi kekiyi mukeya, nu Arab kadimithu nu Israel nyi elakha ahngthu na kekinyi ju pi cü keten miwi mukeya.

¹⁶ Solomon na atsonhi ketiti meza keni saya, nu suna kilogram tagü kecen pi kesüsü miwi nyenya.

¹⁷ Ma atsonhi kizzazza meza kecheng la saya, nu suna kilogram keni kecen pi kesüsü miwi nyenya. Ma atsonhi hathu tsüdi pi Lebanon Yinong le khi keten keshondhiwa witsü chia.

¹⁸ Ma kadipen keti kesü saya. Tsüna pahanwa asayha nu kepawa na suna kemehai ntsawa pi mejuya.

^19-20 Acükhaku tugho zhü senki kadipenwa witsü chi theng, acükha kesü katen ghapeli wi ssensitemi kesüsü saghula taghakeni ton pi chi theng. Kadipenwa sengwa na amesü süpon li ton pi chi, nu kedonpen hahcü ghapeli witsü ssensitemi keton kesüsü na ben. Kadiyyi khiewila kadipen hati kesa npi muya.

²¹ Solomon na pi chi jjü keten hyithu tsüdi suna pi sa, nu Lebanon Yinong le khiketenwa wi ahyikhu tsüdila suna kemetha pi sa. Rükatssü khiela nsen kepaghenanye Solomon tsüwi tsüpi ma men keben nsa.

²² Ma hunjjen akhang kesü na Hiram hunjjenthu tsü gweghe atssükedone wi waden. Amapi kecheng kaghapengla ma hunjjenthu na suna, rükatssü, asayha, asiyeng, nu asukithu pvü nu gho neng den.

²³ Kadimi Solomon na kadimi kepathu miwi benki nu metsaki,

²⁴ nu ayyi nyi tsüdila ghola Anyiza na kemetsa pi ma cü ketheng tsü kina mvuthi sa.

²⁵ Ma wi keghothu tsüdila aju sengho ma cü—— rükatssü nu suna pi kesa tsanqaithu, agwomejuwa kaghazu, aghighe, cüdemvu, goru, nu gadathu. Amapi kaghapen hati sa.

²⁶ Solomon na gorugari meza taghamejü nu anyi goru kessithu hazar taghakeni saghuya. Ma tsüthu pahan pi Jerusalem wi theng nu kepathu pi anyunuti kepapa wi chi theng.

²⁷ Ma kadikesa tsüwi Jerusalem wi rükatssü na alon jümu ti sa, nu sedar chan na Judah yyishiphon ccüwi amba chan jümu ti ji ntsa sa.

²⁸ Solomon nyi asenkesathu na Musri nu Silisia wina pvü kegho tsü noncca.

²⁹ Mathu na Ejipt wi gorugari kesü na rükatssü meza tugho nu goru kesü na rükatssü meza nu deni pi shü pvü gho. Mathu na kheneng tsüthu pi Hitti nu Siriya nyi kadimithu wi jeü chicü.