1 KADIMITHU 1 - Kemethajüh (N) (Re-editing) Bible (BSI)

Kadimi David Keqhai Tsüwi

¹ Kadimi David na khilitsü anyi keqhai ntsa kesü sadha, nu ma maghathu na sükhuthsü pi ma mphi thsü lela ma n-yengla wadha.

² Tsalina ma kekhu wi kedithu na ma wi khi, “Njenkeben Kadimiwa, ithu na no ghena nza ghanyi kesü bha pi no gweghe ben thsü nu no noncca thsü na. Ma no gweghe jen nu no sateyeng benya thsüben.”

³ Tsalina Israel nyi maben jawi la nza atsikemehai kesü tsü bha, nu Shunem wi ghala kesü ma nyan Abishag tsü muya nu mathu na ma ssinu kadimiwa wi gho.

⁴ Ma atsimehai ntsawa, nu ma kadimiwa hie nu ma noncca, isala kadimiwa na ma ssimehai nsa.

Adonijah na Kadipen Nkakesa

^5-6 Khilitsü wi ha Absalom na shüdha, David nu Haggith manyi tsa hangkeben keqhai ntsawa na Adonijah. Ma akhüton kemehai nyi kesü. David na khiela pala katsü ha ghena ma ssikitagha meten. nu ma kadimiwa sa mvu ntsa saden. Ma ketanla ma ghena gorugarithu, goruthu, nu ma tuwi wa thsüle kesa anyi deni kidenya.

⁷ Ma wala Joab (ma jja na Zeruiya) nu keqhaikediwa Abiathar manyi ccüneng, nu manyi na ma kiqale cenya.

⁸ Isala keqhaikediwa Zadok, Jehoiada tsa Benaiya, atusenjüh- kechüwa Nathan, Shimei, Rei, nu David ghikehiethu na Adonijah nkiqa.

⁹ Ghanan kesü wi Adonijah na Enrogel tssükebvüpen kete Amaghang Lonshi wi kaghaneni, amesü süpon, nu amesü zza kekunonthu pi ahhansha sala kinyi. Ma Kadimi David tsa kepathu nu Judah wi kadimi kekhu wi kedithu ya ma ahhansha kesa kho witsü gholo cichi,

¹⁰ isala ma ma cünyuwa Solomon, atusenjüh-kechüwa Nathan, Benaiya, nu kadimi ghikehiethu ncichi.

Solomon pi Kadimiwa Kesa thsü

¹¹ Tsaseng wi Nathan na Bathsheba wi Solomon jjawi wa nu ma wi keü, “Haggith tsawa Adonijah na ma ketanla ma pi kadimiwa sayadha le kesa no nchü kwe? Nu Kadimiwa David na tsü cüki mangla nchüle!

¹² Keujüla no nu ntsawa Solomon kahangli hangshaya mvu lethu, hi no kiza na,

¹³ wan wala Kadimi David wi keülo, ‘Njenkeben Kadimiwa, no hi wi itsa Solomon na nshiwa sa kadimi sa thsüle khi kishen ntheng kwe? Isalethu, khatinu Adonijah na kadimi sayadha nu?’ ”

¹⁴ Nu Nathan na khi, “Isanu no Kadimi David ccünengtu keben wi hi ghola tsüna ntsakhiwa le khi ben na.”

¹⁵ Tsalina Bathsheba na kadimiwa we wi dula ma metu. Ma qhai ntsawa sadha, nu ghala Shunem wina keghowa Abishag na ma nonccaben.

¹⁶ Bathsheba na wala kadimiwa tuwi kukedu, nu ma nzawa wi keü, “No mangwa yamvu ben nu?”

¹⁷ Nzawa na luneng, “Njenkeben Kadimiwa, no hi wi itsa Solomon na nshiwa sa kadimi sa thsüle khi n-Nyiza Apvüwa nyan wina kekishen kesü satheng.

¹⁸ Isala Adonijah na kadimi sa wadha, nu no tsü cüki mangla nchü.

¹⁹ Ma amesü süpon, kaghaneni, nu amesü zza kekunon kejon pi ahhansha sa, nu ma ntsathu, keqhaikediwa Abiathar, nu nsüpahizi benchüwa Joab mathu cichi pi kemishu wi chi, isala ma ntsawa Solomon tsü ncichi.

²⁰ Njenkebenwa, Israel nyi tsüdila no thowa pi nshiwa sa kadimi sa thsülo khi mathu kizaten khe ghangben.

²¹ Keujüla no tsüti nsa lethu, no shü meyi itsawa Solomon ishinyi pi nyu kematsa nyile sa ben.”

²² Ma ajühkhitu keben wi Nathan na gho kadijjen cuya.

²³ Atusenjüh-kechüwa na ghobenle kesa nyu na kadimiwa kiza, nu Nathan na kadimiwa tuwi kukedu.

²⁴ Tsaseng wi ma khi, “Njenkeben Kadimiwa, no Adonijah na nshiwa sa kadimi sabenle khishichidha kwe?

²⁵ Ma nansü amesü süpon, kaghaneni, nu amesü zza kekunon kejon pi ahhansha kesü sa. Ma ntsathu, nsüpahizi benchüwa Joab, nu keqhaikediwa Abiathar tsüdi cichi, nu mathu na khili mishu nu ‘Kadimiwa Adonijah kesie kahangwa salo’ khila jisha benle!

²⁶ Isala kediwa, ma hi nyelela keqhaikediwa Zadok, Benaiya, nu Solomon ncichi.

²⁷ Njenkebenwa, no ha tsüdi yaqole sa nu thowa na nshiwa sa kadimi saten khe pi nkekhu wi kedithu lela nkiza kwe?”

²⁸ Kadimi David na khi, “Bathsheba ya hewi dugho nenglo kiza lo” — nu ma dugho kadimiwa tuwi nganya.

²⁹ Isanu ma nzawa wi khi, “Hangkebenwa Apvüwa igükeccü tsüdi wi hi kekasha kecüwa nyan wina hi no wi khishiben,

³⁰ ntsa Solomon na ishiwa sa kadimi saben kesa Israel Nyizawa Apvüwa nyan wina hi no wi kishen ketheng tsü hi nansü tsü nieden.”

³¹ Bathsheba na kukedu nu khi, “Kadimiwa ipvüwa ya anuphan kahangwa salo!”

³² Tsaseng wi Kadimi David na nyu kesun pi Zadok, Nathan, nu Benaiya cichi thsü. Khathansha wi mathu na gho cuya khe,

³³ ma mathu wi khi, “Ajühkekaghatenpen wi hi kedithu ssinu nthu gweghe wala itsa Solomon ya hi gada miwi donki thsü, nu ma ssinu Gihon tssükebvüpen wi cülo,

³⁴ ciwi Zadok nu Nathan manyi na adeli pi Solomon nyen pi ma ya Israel kadimiwa sa thsülo. Tsaseng wi tutuwa khou nu ‘Kadimi Solomon na kesie kahangwa salo’ khi jishalo.

³⁵ Ma hewi ghola hi kadipen wi donki keten wi kheneng ma nie shhugholo. Ma ishiwa sa kadimi sa den, kepaghenanye ma pi Israel nu Judah miwi kekhang kesenwa sa thsüle hi ma kessiyadha.”

³⁶ Benaiya na luneng, “Tsü saben, nu Apvüwa n-Nyiza na tsü sa kecüwa salo!

³⁷ Apvüwa na Njenkeben Kadimiwa ssikegho ti ma Solomon la ssiketenwa sa nu ma kadi sapi no kadi miwila mehai kayi kecüwa salo.”

³⁸ Tsalina Zadok, Nathan, Benaiya, nu kadi ghikehiethu na Solomon pi Kadimi David gada miwi chiya nu ma ssinu Gihon tssükebvüpen wi wa.

³⁹ Zadok na ma Apvüwa ketenpen Nithsüjjen wina senkegho oliv deli kechi hikhuwa tsü khuya nu pi Solomon nyen cüa. Mathu na tutuwa khou nu anyithu tsüdila “Kadimi Solomon ya kesie kahangwa salo” khi jisha.

⁴⁰ Tsaseng wi mathu tsüdila kheneng ma niegho, mathu na anonkeghe wina jisha nu lalali khou, mathu hhai na ayyi la kulila sa.

⁴¹ Adonijah nu ma kejjenthu tsüdila mishu dhiwa keten wi mathu na ahhai tsü zaya. Nu Joab na tutuwa kekhou hhai zakeya wi nyu keü, “Anyunutiwa wi ahhai zaya keben ha mangwa jjügi saben nu?”

⁴² Ma ajühkhitu keben wi keqhaikediwa Abiathar tsa Jonathan na gho cuya. Adonijah na khi, “Dugholo, no anyi kemehai kesü — no jühtheü kemehai sengho tenla metsiben.”

⁴³ Jonathan na luneng, “Hi nmessile. Ajenkebenwa Kadimi David na Solomon pi kadimi sa thsüdha.

⁴⁴ Ma Zadok, Nathan, Benaiya, nu kadi ghikehiethu kesun pi Solomon gweghe wa thsü. Mathu na ma pi kadimiwa gada miwi ben thsüa,

⁴⁵ nu Zadok nu Nathan manyi na Gihon tssükebvüpen wi adeli pi Solomon nyen pi kadimi sa thsüdha. Tsaseng wi mathu na anyunutiwa wi du, anonkeghe wina jisha, nu anyithu na khili nthomehi ntsa saben. Nthu na tsü hhai tsü zayaben.

⁴⁶ Solomon na khili kadimiwa sadha.

⁴⁷ Tsümiwi ajühkekaghatenpen wi kedithu na wala lacaye pi Ajenkebenwa Kadimi David cü nu khi, ‘N-Nyiza na Solomon sapi nmiwi anyanmechanki kesawa sa, nu Solomon kadikesa na no kadikesa miwi la mehai kayi keyawa salo.’ Tsaseng wi Kadimi David na ma we wi du kukedu nu kinyi

⁴⁸ nu khi, ‘Ithu Israel Nyizawa Apvüwa seng nalo, ma nansü ishicübvüghathu jawi kesü pi ishiwa sa kadimi sa thsü, nu hi ya hangben nu tsü muya thsüdha le!’”

⁴⁹ Tsaseng wi Adonijah kejjenthu na messiya nu mathu tsüdi shagha papa len wi wa.

⁵⁰ Adonijah na Solomon messi ntsa saya, nu Apvüwa ketenpen Nithsüjjen wi du kekinyipen ghacüthu tsü ghansen ben wa.

⁵¹ Nyu na Kadimi Solomon wi Adonijah na ma messila wa kekinyipen ghacüthu ghansen nu hati khile ma wi kiza, “Hi atuwa, Kadimi Solomon na ma hi pi shü thsü nbenle kesa hi wi kishen thsü mvu ben.”

⁵² Solomon na luneng, “Keujüla ma ajühkeya wi ben lethu, ma lissen kesüla qancaya nben; isala ma tsüti nsa lethu ma pi shü thsüaben.”

⁵³ Kadimi Solomon na nyu kesun chi nu wala kekinyipen wina Adonijah ssigho thsü. Adonijah na kadimiwa wi wa nu ma tuwi kukedu nu kadimiwa na ma wi khi, “No ajjen wi whaya mehai.”