1 JOHAN 5 - Kemethajüh (N) (Re-editing) Bible (BSI)

Ithu Ayyi miwi khangkeya

¹ Anyi thowa na Jisu na Khrista le nondi ten khe ma Anyiza tsanga kesü; nu thowa na aba kesü tizen ten khe ma tsawa la tizenden.

² Ha wina ithu khati nu ithu na Anyiza tsangathu tizen ten khe chüyaben: tsüna ma ayenkhukechithu tsü kenie wina Anyiza tizenben.

³ Kepaghenanye ithu na Anyiza tizen keten tsü jjügi ma ayenkhukechithu tsü nie ketenwa tsü. Nu ma yenkhukechithu na ithu ghena nkiyan,

⁴ kepaghenanye Anyiza tsanga tsüdila ayyiwa tsü chaya mehai. Nu ithu kenondi ghena ithu na ayyiwa miwi khang yaden.

⁵ Thowa na ayyiwa tsü chaya mehai nu? Jisu na Anyiza Tsa le kesa nondi keten nyi ketan.

Jisu Khrista Cüki Chüzawa

⁶ Jisu Khrista na ma baptaiz kesa wi atssü nu ma keshü wi ajjü sengho. Ma atssü ketan nsengho, isala atssü nu ajjü manyi qho sengho. Nu Aghamu na tsü atsentsa le kesa sheipi ben, kepaghenanye Aghamu na atsentsa.

⁷ Ciwi chüza kecheng ben:

⁸ Aghamu, atssü, nu ajjü; nu kecheng tsüdila asheikepi makesütan saben.

⁹ Ithu na anyi sheikepi nondiden; isala Anyiza sheikepi na tsü miwi khangki, nu ma ma Tsawa cüki sheikepi ha khuchidha.

¹⁰ Tsalina anyi thowa na Anyiza Tsawa tsü nondi ten khe asheikepi ha ma leben wi ben; isala thowa na Anyiza n-nondi khe ma sa pi milikemesa nyi kesü sadha, kepaghenanye ma Anyiza na ma Tsawa cüki sheikepi tsü n-nondi.

¹¹ Asheikepi tsüna ha: Anyiza na anuphan kahang pi ithu cüdha, nu anuphan kahang ha na ma Tsawa wi ben.

¹² Anyi thowa na Atsawa tsü ben khe kahang ha ben; nu thowa na Anyiza Tsawa tsü nmi khe kahang la nmi.

Anuphan Kahang

¹³ Nthu Anyiza Tsawa nondi ketenthu na anuphan kahang benle kesa pi nthu chüya thsüle kesalina hi ha zhü pi nthu cüben.

¹⁴ Ithu na Anyiza tu wi kempvüza ben, kepaghenanye ithu na ma kemeshen wina katsüha khie lela ma ithu hhai kina cüben kesa chütiben.

¹⁵ Ithu na khathansha ma wi khie khe ma ithu hhai kina cüden; nu ithu na ha atsentsa le kesa chü keben ghena ithu ma wi mangwa khie khe ma tsü pi ithu cüben kesa la chüben.

¹⁶ Keujüla no ncünyuwa ssi wa keshü wi chia nkesa kesami sa keben mu lethu, ma ghena Anyiza wi khielo isathu kahang pi ma cüben. Ha ssi wa keshü wi chi nkesa kesami kesathu ghena. Isala ciwi ssi wa keshü wi chia kesa kesami na ben, nu hi nthu na tsü ghena Anyiza wi khielo khi nben.

¹⁷ Kesazzi kekuli tsüdila kesami, isala ciwi ssi wa kesami wi chia nkesa kesami na ben.

¹⁸ Anyi kesü le kesü lela Anyiza wina pvüghaya kesawa na sami ben nten kesa ithu na chüben, kepaghenanye Anyiza Tsawa na ma nonccaya nu Nkemehaiwa na gho ma patena ya nben.

¹⁹ Ayyi maben na Nkemehaiwa kekhang kekhu wi ben lela ithu na Anyiza tsangathu le kesa ithu chüben.

²⁰ Anyiza Tsawa na ghodha nu ithu ya atsentsawa Nyiza tsü chüya thsüle kesalina chüshikeya pi ithu cüle kesa ithu chüben. Ithu na ma Tsawa Jisu Khrista wi hang keben ghena atsentsawa Nyiza wi hangben. Hawa ha atsentsa Nyiza, nu anuphan kahang.

²¹ Itsangathu, nthu na milikemesa cenpvüthu tsü ghüyalo!