1 JOHAN 4 - Kemethajüh (N) (Re-editing) Bible (BSI)

Atsentsa Ghamu nu Milikemesa Ghamu

¹ Hi ketizenthu, Aghamu pvüten le khi ketenthu tsüdi n-nondi lalo, isala Anyiza wina kegho ghamu la nye khe tsüthu ghan-nanlo. Kepaghenanye milikemesa atusenjüh-kechüthu kejonla ayyi tsüdi wi wadha.

² Nthu na hati nu Anyiza Ghamu la nye khe chüya mehai: aghamu kesü le kesü lela Jisu Khrista na anyi sajjü ceng ghole kesa khishi ketenwa tsüna Anyiza wina kegho,

³ isala aghamu Jisu cüki nkekhishiwa tsüna Anyiza wina kegho nye. Nu aghamu tsüna nthu na zaya kesa Khrista ghinyiwa ghoten le kesa tsü, nu tsüna khili he ayyi wi bendha.

⁴ Isala itsangathu, nthu na Anyiza ji, nu nthu na milikemesa tusenjüh- kechüthu chayadha, kepaghenanye nthu wi kebenwa Aghamu tsüna ayyiwa ji kesathu wi keben ghamu miwi khangkiben.

⁵ Milikemesa tusenjüh-kechü tsüthu tsüna ayyi cüki khiden, nu ayyi nyithu na mathu jühkina den, kepaghenanye mathu na ayyiwa ji.

⁶ Isala ithu tsü Anyiza ji. Anyi kesü le kesü lela Anyiza chüben lethu, ithu jühkina den; nu thowa na Anyiza ji nye khe ithu jühkina nten. Tsalina hati nu ithu na atsentsawa Ghamu nu kesazzi ghamu chü kepapa saya mehai.

Anyiza na Ketizen

⁷ Hi ketizenthu, ithu khokho ketizenliya nalo, kepaghenanye ketizen tsüna Anyiza wina gho. Anyi thowa na nyu tizen ten khe ma Anyiza tsanga nu Anyiza chüben.

⁸ Anyi thowa na nyu tizen nten khe ma Anyiza nchü, kepaghenanye Anyiza na ketizen.

⁹ Anyiza na ketizen pi ithu ccüca kechi tsüna ithu yala ma wina kahang benya thsüle kesalina Anyiza na ma Tsa ntsawa kesütan tsü kesun pi ayyi wi chicü.

¹⁰ Ketizen na ha: ithu na Anyiza ketizen ghena nye, isala ma ithu tizen kesalina ma Tsawa kesun pi ithu ghena kesami hhansha sa thsüa.

¹¹ Hi ketizenthu, keujüla Anyiza na ithu tizen pi hacucu sa lethu, ithu la khokho ketizenli-u.

¹² Anyi thola Anyiza npi mu, isala keujüla ithu khokho ketizenliya lethu, Anyiza na ithu gweghe hangben, nu ma ketizen na ithu sa pi cencu cüben.

¹³ Ma ma Ghamu pi ithu cü ketheng ghena ithu na Anyiza wi hangben, nu ma ithu wi hangben kesa ithu na chütiben.

¹⁴ Abawa na ma Tsa kesun pi ayyi Hangshawa sa thsüle kesa ithu na muyadha nu khi pi nyu kepa kizaden.

¹⁵ Keujüla anyi kesü le kesü lela Jisu na Anyiza Tsawa le khishithu ma Anyiza wi hangben, nu Anyiza na ma wi hangben.

¹⁶ Nu ithu na Anyiza ketizen tsü ithu ghena ben kesa ithu na chü nu nondiben. Anyiza na ketizen, nu thowa na ketizen wi hangten khe Anyiza wi hangben nu Anyiza na ma wi hangben.

¹⁷ Ajühkekaghaten tsathang wi ithu yala kempvüza benya thsüle kesalina ithu wi ketizen sa pi cencu cüdha, nu ithu la Khrista ti sa nu ayyi ha wi hang keben ghena tsü benya ben.

¹⁸ Ketizen wi kemessi nmi, isala ketizen tsentsa tsüna kemessi tsüdi jügüden. Tsalina anyi thowa na messi ten khe ma ketizen tsentsa npi ben cenya.

¹⁹ Anyiza na atuwa sa ithu ketizen ghena ithu nyu tizenden.

²⁰ Keujüla anyi meshu kesü ma Anyiza tizenten le khi, isala ma cünyuwa nanmeghü lethu, ma milikemesa nyi kesü. Kepaghenanye ma mu keben ma cünyuwa tsü tizen meya lethu, ma mu nkeben Anyiza tsü tizenya nben.

²¹ Khrista na ayenkhukechi pi ithu kecü na ha: Thowa na Anyiza tizen ten khe ma cünyuwa la ntizenthu yishü.