1 JOHAN 2 - Kemethajüh (N) (Re-editing) Bible (BSI)

Khrista Na Ithu Kekiqawa

¹ Itsangathu, nthu ya nsami thsüle kesalina hi ha zhü pi nthu cüben; isala keujüla anyi kesü na sami lethu, ithu na meshu kesü Abawa wi ithu sheikepiwa na ben, tsüna ketsatanwa Jisu Khrista.

² Ma ithu ghena kesami hhansha kesawa tsü, nu ithu kesami ghena ketan nye, isala ayyi nyi maben kesami ghena la.

³ Keujüla ithu na Anyiza jühkhukechi tsü nieten lethu, ithu na ma chüben le kesa chüti ben.

⁴ Keujüla anyi kesü ma Anyiza chüben le khi, isala ma jühkhukechi tsü n-nie lethu, ma milikemesa nyi nu atsentsawa na ma miwi nmi.

⁵ Isala thowa na ma jühkina ten khe anyi tsüwa miwi na Anyiza ketizenwa tsü sacen yaben. Ha wina ithu ma wi ben le kesa chüti yaben.

⁶ Anyi thowa na ma Anyiza wi benten le khiten khe ma la Khrista kahang ti kahang-u.

Ayenkhukechi ketheü

⁷ Hi ketizenthu, hi ayenkhukechi ketheü nyela kaghawen nthu na aghatsan wina kebenwa ha zhü pi nthu cüben. Ayenkhukechi kaghawenwa ketsijüh tsü nthu na zayadha.

⁸ Isala hi khili ayenkhukechi ketheü kesü zhü pi nthu cüben, kepaghenanye atsentsawa tsüna Khrista wi nu nthu wi la muyaden. Kepaghenanye kejangwa tsüna bvü tendha, nu atsentsawa kewegü, tsüna wegü bendha.

⁹ Anyi thowa na ma kewegü, wi ben le khi, isala ma cünyuwa nanmeghü ten khe ma khilila kejang wi ben.

¹⁰ Thowa na ma cünyuwa tizen ten khe ma kewegü, wi hangden, tsalina ma miwi nyu ccümeshü pi sami thsü kesa mangla nmi.

¹¹ Isala thowa na ma cünyuwa nanmeghü ten khe ma kejang wi ben; ma kejang wi hang nu ma khiewa waten khe nchü, kepaghenanye kejangwa na ma sa pi nmu thsü ladha.

¹² Itsangathu, Khrista ghena kesami teshi pi nthu cü kesalina hi ha zhü pi nthu cüben.

¹³ Abathu, nthu na adechhü wina ketenwa tsü chü kesalina hi ha zhü pi nthu cüben. Kepvünyithu, nthu na nkemehaiwa chaya kesalina hi ha zhü pi nthu cüben.

¹⁴ Ghanyithu, nthu na Abawa chü kesalina hi ha zhü pi nthu cüben. Abathu, nthu na adechhü wina ketenwa tsü chü kesalina hi ha zhü pi nthu cüben. Kepvünyithu, nthu na züben, nu Anyiza jüh na nthu wi hangben, nu nthu na nkemehaiwa chaya kesalina hi ha zhü pi nthu cüben.

¹⁵ Ayyiwa nu ayyi wi keben tsanqaithu tsü ntizen lalo. Keujüla nthu na ayyiwa tizen ten lethu, Abawa ketizen na nthu miwi nmi.

¹⁶ Kepaghenanye ayyi wi keben ji — asajjü kenen, anyon kenen, nu keben wi kekapvü, hathu tsüdi Abawa wina kegho nyela ayyi ji.

¹⁷ Ayyiwa nu ciwi keben anyi na nmvu ketenthu tsüdila nmila tendha, isala Anyiza kenen sa ketenwa na anuphan hang benden.

Khrista Ghinyiwa

¹⁸ Itsangathu, asakhen tsü tetsakidha! Khrista ghinyiwa na ghoben kesa pi nthu kekiza tsüti khili tsü ha Khrista ghinyithu kejon na shhughodha, tsalina asakhen tsüna tetsakidha kesa ithu chüben.

¹⁹ Mathu na ithu zi makesü nkenye ghena ithu ja wina bvüdha, kepaghenanye keujüla mathu na ithu zi makesü lethu, mathu na ithu gweghe ben kesa. Isala mathu na bvü kesa tsüna mathu kesütanla ithu zi wi nyele kesa chüti yadha.

²⁰ Isala Khrista na Kemetha Ghamu pi nthu miwi meyisha chicü nu nthu na atsentsawa chüben.

²¹ Hi zhü pi nthu cü kebenwa ha nthu na atsentsawa nchüle kesa ghena nye, isala nthu na tsü chüben, nu nthu na khiela atsentsawa wi milikemesa gho nten kesa tsü la chüben.

²² Isalethu thowa na milikemesawa nu? Anyi kesü le kesü lela Jisu tsüna Khrista nyele khi ketenwa tsü. Tsüti kesawa tsüna Khrista ghinyiwa tsü — ma Abawa nu Atsawa la meya mvu saden.

²³ Kepaghenanye thowa na Atsawa meya mvu saten khe Abawa la meya mvu saden; thowa na Atsawa yayaten khe Abawa la yayaden.

²⁴ Tsalina nthu aghatsan wina zakeya ketsijühwa tsü pi nthu leben wi chiya metsilo. Keujüla nthu na ketsijühwa tsü yaya lethu, nthu na keshüthangla Atsawa nu Abawa gweghe hang yaben.

²⁵ Nu hawa ha Khrista na anuphan kahang pi ithu cüle khishichi kethengwa tsü.

²⁶ Nyu na nthu mechule kiden kebenthu cüki tsü hi zhü pi nthu cüben.

²⁷ Isala nthu ghena tsü Khrista na ma Ghamu meyisha pi nthu miwi chicüdha. Ma Ghamu na nthu miwi keben chu nyu yala nthu nsansi thsüla mehai. Kepaghenanye ma Ghamu na pala tsüdi cüki pi nthu sansi ben, nu ma pi sansi kebenwa tsüna milikemesa nyela atsentsawa. Tsalina Aghamu kesansijüh tsü kina, nu Khrista wi benyalo.

²⁸ Itsangathu, ma kegho tsathang wi ithu na kejüghe yala kuthi nbenla kempvüza saben le kesalina ma wi benyalo.

²⁹ Keujüla nthu na Khrista tsüna tsatan kesa chüben lethu, anyi thowa na ketsatanwa saten khe ma Anyiza tsanga sayadha kesa nthu na chütiben.